Descárgate la app
Asturias eta Vianako printze-printzesak Vianako Printzea Sariak emateko ekitaldiaren buru izan dira
2010ko ekainaren 9a
Asturias eta Vianako printze-printzesak Vianako Printzea Sariak emateko ekitaldiaren buru izan dira
Printzeak 18.45ean iritsi dira Baluartera, eta bertan Miguel Sanz Sesma Nafarroako Gobernuko Lehendakariak eta Foru Komunitateko agintari nagusiek harrera egin diete: Elena Torres Nafarroako Parlamentuko lehendakariak; Elma Saiz Gobernuaren ordezkariak Nafarroan, eta Yolanda Barcina Iruñeko alkateak. Ondoren, Felipe jaunak eta Letizia andreak hiru sarien epaimahaietako lehendakarien, kontseilarien eta enpresa babesleen agurra jaso dute, besteak beste: María Bayo Kulturaren Vianako Printzea Sariaren epaimahaiko lehendakaria, Miguel Induráin Elkartasunaren Vianako Printzea Sariaren epaimahaiko lehendakaria, eta Alexander Kalache Mendekotasunaren Artapenerako Vianako Printzea Sariaren epaimahaiko lehendakaria. Era berean, Juan Ramón Corpas Mauleón Kultura eta Turismo kontseilariak; María Isabel García Malo Familia, Gazteria, Kirol eta Gizarte Gaietako kontseilariak; Txomin García Euskadiko Kutxako lehendakariak; eta Rosa Jaso Caja Navarra Fundazioko lehendakariak berorren gorentasunak agurtu dituzte.
Eraikinean sartu ondoren, printze-printzesak Baluarteko areto nagusira agertokiaren ondoko atetik sartu dira, eta bertan egin da Vianako Printzea Sariak emateko ekitaldia, 1.000 gonbidaturen aurrean.
Ekitaldia kanpo-ahots batek gidatu du eta aldi berean zeinu-mintzairan interpretatu da. Sariak eman aurretik, Espainiako eta Nafarroako ereserkiak interpretatu dira, eta ondoren Nafarroako Gobernuko Lehendakariak hartu du hitza. Ondoren, Vianako Printzea Sariaren lehenengo 20 edizioak laburtzen zituen bideoa proiektatu da.
Sanz Lehendakariak sarituei eskerrak eman dizkie, konpromisoa dutelako “askotan irismen laburreko interesen inguruan mugitzen den mundu honetan; zuok eskaintzen diguzuen ibilbidea eta zuon proiektuak erreferentzia dira justizia eta duintasun printzipioetan oinarritutako mundu orekatu eta solidarioa izateko hartu beharreko bidea zein den jakiteko”. Amaitzeko, hurrengoa esan die: “Zorionak Nafarroarekin lotzen zaituzten sari hauengatik; Nafarroako herritarrak sari horien bidez aberastu egiten gara, zuon ekarpenei esker”.