navarra.es
Castellano | Euskara | Français | English
Ezagutzera eman
1038/97 Ebazpena, abenduaren 5ekoa, Nafarroako Unibertsitate Publikoko Errektoreak emana, 25 urtez gorakoak Unibertsitatean sartzeko probak arautzen dituen Erabakia argitara eman dadila agintzen duena
(1998ko 6. NAOn argitaratutako testua, urtarrilaren 14an)
Atarikoa
Errektoretza honek, Unibertsitateko Estatutuen 40. artikuluak ematen dizkion eskumenak erabiliz, Unibertsitateko Gobernu Batzordeak azaroaren 21ean harturiko Erabakia argitara eman dadila agintzea erabaki du. Erabaki horrek 25 urtez gorakoak Unibertsitatean sartzeko probak arautzen ditu eta Nafarroako Aldizkari Ofizialean argitaratu eta hurrengo egunean hartuko du indarra, ondokoari jarraikiz.
NAFARROAKO UNBERTSITATE PUBLIKOAN 25 URTEZ GORAKOAK UNIBERTSITATEAN SARTZEKO PROBAK ARAUTZEN DITUEN ERABAKIA
Gaur egun Nafarroako Unibertsitate Publikoan 25 urtez gorakoak Unibertsitatean sartzeko egiten diren probak arautuak daude 1971eko maiatzaren 26ko, 1981ko otsailaren 24ko eta 1982ko apirilaren 7ko aginduen bidez eta, horiez gain, Nafarroako Unibertsitate Publikoko Batzorde Sortzailearen Iraunkorraren 1990eko maiatzaren 8ko Erabakiaren bidez eta 1990eko azaroaren 22ko Batzorde Sortzaileko Buruaren 204/90 Ebazpenaren bidez.
Espainiako unibertsitateetan proba hauek egun duten egitura ikusirik eta, unibertsitate espainiar eta europarrean sartzeko orientazio berriei jarraikiz, gaur egun Nafarroako Unibertsitate Publikoan egiten diren probak aldatzea komenigarri ikusi da, gure Autonomia Erkidegoan LOGSE Batxilergoaren selektibitate probek eramango duten norabide berean hain zuzen ere.
Behar honi erantzuteko xedez eta UBIko Koordinazio Orokorrak proposaturik, Nafarroako Unibertsitate Publikoak azterketa bat egin du Unibertsitateko irakasleek osaturiko Batzorde baten bidez. Azterketaren emaitzak ikusita komenigarritzat jo da sartzeko probak ongi bereizitako bi zatitan egituratzea. Proba amankomun batean ikaslegaiaren heldutasuna eta prestakuntza orokorra neurtuko dira eta bigarren proba bereizi batean, eskatzaileak inskripzio garaian aukeratutako titulazioari dagozkion gai espezifikoak sartuko dira.
Beste alde batetik, Nafarroako Unibertsitate Publikoak ematen dituen titulazioak bildu behar izan dira, bigarren proba egiteko xedez, neurri handi batean LOGSEn arauturiko batxilergoa agintzen duen egiturari erantzunez.
Era berean, Unibertsitateko Aholkularitza Juridikoak proposaturik, indarrean diren arauen interpretazioa argitzen duten alderdiak erantsi dira, aipaturiko probetarako onarpen-eskaeren kudeaketa eta tramitazioari dagokienez.
Horregatik guztiagatik, UBIko Koordinatzaile Orokorrak proposaturik eta Aholkularitza Juridikoak emandako txostenarekin bat, Unibertsitateko Gobernu Batzordeak honakoa, erabaki du:
Lehenengoa. Araubide Juridikoa.
Nafarroako Unibertsitate Publikoak 25 urtez gorakoak Unibertsitatean sartzeko deitzen dituen probak 1971eko maiatzaren 26ko, 1981eko otsailaren 24ko eta 1982ko apirilaren 7ko Ministerio Aginduetan ezarritakoari eta erabaki honetan xedatutakoari jarraikiz arautuko dira.
Bigarrena. Deialdiak.
Nafarroako Unibertsitate Publikoak urtero egingo du 25 urtez gorakoak Unibertsitatean Sartzeko Probetarako deialdia. Deialdia gutxienez hirurogei egun lehenago iragarriko da eta probak otsail, martxo edo apirilean egingo dira oro har.
Hirugarrena. Eskatzaileen betebeharrak.
Unibertsitatean sartzeko 25 urtez gorakoentzako probetara aurkeztu nahi duten eskatzaileek honako baldintzak bete beharko dituzte:
1. 25 urte beteak izan edo probak burutzen diren urteko urriaren 1a baino lehenago betetzea.
2. Unibertsitatean sartzeko eskatzen den titulazio akademikoa ez izatea, ondoko idazatian xedatutakoari jarraikiz.
3. Aurreko idazatia interpretatzeko, Unibertsitatean sartzeko eskatzen den titulazioa edukitzea ala ez, alegia, honako irizpideak jarraituko dira:
-Soil-soilik lehen zikloko ikasketetarako, eskatuko den titulazioa UBIkoa nahiz Batxilergo baliokideren batekoa izango da, edo LHko 2. mailakoa, beti ere, egin nahi den titulazioan sartzeko aukera ematen duten adarren batekoa bada, honi buruz indarrean den arauteriarekin bat etorriz.
-Bi ziklotan egituraturiko ikasketetarako eskatuko den titulazioa Unibertsitatean sartzeko Probak edo titulazio baliokidea gainditu izatea, honi buruz indarrean den arauteriarekin bat etorriz.
Laugarrena. Aukerak eta titulazioak.
Nafarroako Unibertsitate Publikoan Sartzeko 25 urtez gorakoentzako Proben ondorioetarako, Unibertsitatean ematen diren titulazio eta berezitasunak ondoko aukeretan bilduko dira:
1. Aukera.-Giza Jakintza eta Gizarte Zientziak.
Lan Harremanetan Diplomatua.
Zuzenbidean Lizentziatua.
Gizarte Lanean Diplomatua.
Soziologian Lizentziatua.
Irakaslea, Atzerriko Hizkuntzaren espezialitatea.
Irakaslea, Haur Hezkuntzaren espezialitatea.
Irakaslea, Musika Hezkuntzaren espezialitatea.
Irakaslea, Lehen Hezkuntzaren espezialitatea.
Ekonomian Lizentziatua.
Enpresen Administrazio eta Zuzendaritzan Lizentziatua.
Enpresa Ikasketetan Diplomatua.
2. Aukera.-Natur eta osasun zientziak.
Erizaintzan Diplomatua.
3. Aukera.-Teknologia.
Nekazaritza Ingeniaria.
Nekazaritza Ingeniari Teknikoa, Baratzezaintza, Frutagintza eta Lorezaintzaren espezialitatea.
Nekazaritza Ingeniari Teknikoa, Nekazaritza eta Abeltzaintza Ustiapenen espezializazioa.
Nekazaritza Ingeniari Teknikoa, Nekazaritza eta Elikadura Industrien espezializazioa.
Industri Ingeniaria.
Industri Ingeniari Teknikoa, Elektrizitatearen espezializazioa.
Industri Ingeniari Teknikoa, Mekanikaren espezializazioa.
Telekomunikazio Ingeniaria.
Nafarroako Unibertsitate Publikoak titulazio berriak abian jartzen baditu, titulazio berri horiek artikulu honetan finkatutako aukeraren batean sartuko dira, edo beste aukera berriren batean, unibertsitate ikasketen eta Unibertsitatera Bideratzeko Ikasmailako eta/edo LOGSE Batxilergoko aukeren arteko lotespen-jarraibideekin bat etorriz.
Bosgarrena. Proben egitura.
Nafarroako Unibertsitate Publikoan 25 urtez gorakoak sartzeko probak bi zatitan egituratuko dira, bata ikaslegai guztiendako berdina, edozein dela sartu nahi duten titulazioa, eta bestea espezifikoa, egingo duten titulazioaren araberakoa.
1.-Guztiendako proba.
Guztiendako proban ondoko gaiei dagozkien azterketak egingo dira:
-Espainiar hizkuntza.
-Filosofia edo Historia.
-Atzerriko hizkuntza. Frantsesa, Ingelesa edo Alemanera aukeran.
2.-Proba espezifikoak.
Ikasleak zein titulaziotara sartu nahi duen, titulazio hori dagoen aukeraren arabera egingo dira proba espezifikoak, bosgarren artikuluan egindako titulazioen sailkapenari jarraikiz. Jarraian adierazten diren Aukeretako irakasgaien azterketak egin beharko dira.
1. Aukera.-Giza jakintza eta gizarte zientziak.
Proposatzen diren lau irakasgaietatik hiru hautatu beharko dituzte ikasleek:
-Gizarte Zientzietan aplikaturiko Matematika.
-Ekonomia.
-Testu analisia.
-Hizkuntza Klasikoak: Latina edo Grekera aukeran.
2. Aukera.-Natur eta osasun zientziak.
-Biologia.
-Kimika.
-Osasun Zientzietan aplikaturiko Matematika.
3. Aukera.-Teknologia.
Ikasleek nahitaez ondoko azterketak egin beharko dituzte:
-Matematika.
-Fisika.
eta ondoko 3 irakasgaien artetik bat hautatu:
-Biologia.
-Kimika.
-Marrazketa Teknikoa.
Seigarrena. Proben balorazioa.
Irakasgai bakoitza 0tik 10 puntura balioetsiko da eta proba bakoitzaren nota berau osatzen duten irakasgaien batezbesteko aritmetikoa eginez aterako da. Era berean, Sartzeko Proben azken nota guztiendako probaren eta proba espezifikoaren noten batezbesteko aritmetikoa izango da.
Bi proben batezbestekoa egin ahal izateko 4 edo 4tik gorako puntuazioa eskatuko da bakoitzean.
Probak gainditzeko gutxiena 5 puntuko behin betiko puntuazioa lortu beharko ditu ikaslegaiak.
Zazpigarrena. Probetan izena ematea.
Sartzeko Probetarako eskaera egiten duenak Unibertsitatean egin nahi duen titulazioa adierazi beharko du izena ematen duenean, eta honela dagokion proba espezifikorako ere emango du izena.
Eskatzaile bakoitzak soil-soilik titulazio bakar bateko proba bakar batean parte hartzeko eskatu ahalko du.
Eskabidean Filosofia ala Historia zein aukeratzen duen, eta guztiendako proban frantses, ingeles ala alemanera zein atzerriko hizkuntza hautatzen duen, adierazi beharko du eskatzaileak. Era berean, 1. eta 3. aukeren barruko titulazio batera sartzeko eskatzaileak hiru irakasgai hautatu beharko ditu proposatutakoetatik eta, 1. aukeraren barruan, proba espezifikoari dagozkion Latina ala Grekera hautatu beharko du. Irakasgai eta aukera horiek guziak dira erabaki honetako bosgarren artikuluan agertzen direnak.
Zortzigarrena. Orientazio eta hasierako ikastaroa.
Behin Sartzeko probak gainditutakoan, ikasleak Orientazio eta Hasierako Ikastaroak egin beharko ditu. Ikastaro horiek gainditzeko ikasleari ikastaro bakoitzaren %50era gutxienez bertaratu izatea eskatuko zaio. Bertaratze hori ez bada frogatzen ikasleek hurrengo ikasturtean egin ahalko dute matrikula; horretan ere betetzen ez badute gutxieneko bertaratzea beren eskubidea galduko dute.
Probak gainditzen dituzten ikasleek ikasturte horretan bertan edo hurrengo ikasturtean eman ahalko dute izena orientazio eta hasierako ikastaroetan. Bigarren urte horretan ez badute izena ematen edo han gutxieneko bertaratzea lortzen ez badute beren eskubideak galduko dituzte.
Bederatzigarrena. Sarbide zuzena.
Unibertsitatean sartzeko 25 urtez gorakoentzako probak, orientazio eta hasierako ikastaroak barne, gainditzen dituzten ikasleek hurrengo bi ikasturteak izango dituzte matrikula zuzenean egiteko eskatu duten titulazioan.
Epe horretan hala egiten ez badute eta geroago titulazio horretan ikasketak egin nahi badituzte, ez dute unibertsitatera sarbide zuzena izango, aitzitik, sarrera eskatu beharko dute gainerako ikasleendako ezarritako aurreinskripzio prozeduraren arabera, beti ere leku mugatuak dituen titulazio bat denean. Hortaz, soil-soilik eskatu ahalko dute onartuak izateko probak egin zituzten titulazio horretan, eta Unibertsitatean sartzeko nota izango da 25 urtez gorakoentzako probetan lortutakoa.
Hamargarrena. Xedapen indargabetzailea.
Nafarroako Unibertsitate Publikoko Batzorde Sortzailearen Iraunkorraren 1990eko maiatzaren 8ko Erabakia eta Batzorde Sortzailearen Buruaren 1990eko azaroaren 22ko 204/1990 Ebazpena indargabe gelditzen dira, bai eta Erabaki honetan ezarritakoaren kontra egiten duten xedapenak ere.
Hamaikagarrena. Azken xedapena.
Erabaki hau Nafarroako Aldizkari Ofizialean argitaratuko da.
