navarra.es
Castellano | Euskara | Français | English
Ezagutzera eman
183/1998 Foru Agindua, ekainaren 3koa, Hezkuntza eta Kultura kontseilariak emana, Nafarroako Foru Komunitateko ikasketa eta lanbide titulu ez-unibertsitarioak luzatzeko prozedura arautzen duena
(1998ko 74. NAOn argitaratutako testua, ekainaren 22an)
Atarikoa
Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoak 4.4. artikuluan ezartzen du ikasketa eta lanbide tituluak Estatuak homologatuko dituztela eta tokian-tokian eskumena duten hezkuntza administrazioek luzatuko, Lege horretan berean eta horretarako emanen diren arau oinarrizko eta berariazkoetan zehazten diren baldintzetan.
Maiatzaren 5eko 733/1995 Errege Dekretuaren bidez (1995-6-2ko "EAO"), hezkuntza administrazio eskudunek hainbat ikasketa eta lanbide titulu luzatzeko bete beharreko arauak onetsi ziren, ikasketa hauetakoak hain zuzen: Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoan araututako irakaskuntzetako tituluak eta hizkuntza ikasketa espezializatuen lehenbiziko mailari dagozkion irakaskuntzak antolatzeari buruzko irailaren 2ko 967/1988 Errege Dekretuan aipatzen diren titulazioak (1988-09-10ko "EAO").Halaber, titulu horien ofizialtasuna bermatu zen, Espainiako lurralde osoan duten baliozkotasunari eta nazioarteko errekonozimenduari dagokienez.
Abuztuaren 1eko 1326/1997 Errege Dekretuaren bidez irakaskuntza ez-unibertsitarioen arloko zerbitzu gehiago utzi ziren Nafarroako Foru Komunitatearen esku, 1070/1990 Errege Dekretuaren bidez eskualdatu zirenez gainera. Horrenbestez, Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoan ezarritako irakaskuntzen ikasketa eta lanbide tituluak luzatzeko ahalmena eskualdatu zen eta, halaber, eginkizun horri atxikiriko zerbitzuak.
Aurreko guztia betetzeko asmoz, bidezko da Nafarroako Foru Komunitateko ikasketa eta lanbide tituluak luzatzeko prozedura aratzea.
Ikasketa eta Ikastetxeen Antolamendurako Zerbitzuak proposaturik eta Nafarroako Gobernua eta Administrazioa arautzen dituen apirilaren 11ko 23/1983 Foru Legearen 36.2.6) artikuluak eman dizkidan ahalmenak erabiliz, agindu dut:
Lehena. Prozedura hastea.
1.-Tituluak eta ziurtagiriak luzatzeko prozedura hasiko da interesatuak eskatu eta dagozkion eskubideak ordainduta, Bigarren Hezkuntzako Graduatu titulua luzatzeko prozedura izan ezik, ofizioz hasi eta dohainik emanen baita.
2.-Derrigorrezkoak ez diren irakaskuntzetako tituluak luzatzeko eskaerak ikasi den Bigarren Hezkuntzako Institutuan aurkeztuko dira edo, ikastetxe pribatua bada, zein ikastetxeri dagoen atxikita, hantxe.
Bigarrena. Titulua luzatzeko proposamena.
1. -Bigarren Hezkuntzako graduatu tituluak luzatzeko proposamenak ikasketak bukatu diren ikastetxeko zuzendariek egin beharko dituzte.
2. -Batxilergo eta Heziketa Zikloetako tituluen proposamenak institutuetako zuzendariek egin beharko dituzte. Ikastetxe eta hezkuntza maila bakoitzetik bat eginen da eta bertan sartuko dira ikastetxe publiko horren ikasleak eta hari atxikita dauden ikastetxe pribatuetako ikasleak.
3. -Araubide bereziko irakaskuntzen titulu eta ziurtagirien proposamenak ikastetxe publikoek eginen dituzte. Ikastetxe eta hezkuntza maila bakoitzetik bat eginen da eta bertan sartuko dira ikastetxe publiko horren ikasleak eta hari atxikita dauden ikastetxe pribatuetako ikasleak.
4. -Titulua luzatzeko proposamena eginen da, bakar- bakarrik, interesatuak baldintza akademikoak bete eta, behar izanez gero, dagozkion tarifak ordaindu baditu.
5. -Titulua luzatzeko eskaera aurkeztu eta ikusten bada espedienteak ez dituela betetzen behar diren baldintzak, eskaera aurkeztu den ikastetxeko zuzendariak interesatuari jakinaraziko dio, posta ziurtatuaren bidez eta jaso izanaren agiria emanda, zergatiak azalduz. Gainera, adieraziko dio ordaindutako dirua itzul diezaioten eska dezakeela, ikastetxean berean.
6. -Tituluak luzatzeko proposamenak Hezkuntza eta Kultura Departamentuak ikastetxeei emanen dien euskarri informatikoan aurkeztu beharko dira eta, horrekin batera, edukien zerrenda erantsi beharko da, ikastetxeko idazkariak ziurtatu eta zuzendariak ikus-onetsia. Inprimaturik aurkezten diren proposamenak bikoizturik aurkeztu beharko dira.
7. -Ikastetxeek bidaltzen dituzten proposamenak Zerbitzuak Ikuskatzeko eta Ikuskapen Teknikorako Zerbitzuak ikus-onetsiko ditu.
8. -Proposamenak ziurtatzen dituzten ikastetxeetako zuzendari eta idazkariek eta proposamenak ikus-onetsi eta izapidatzen hasteko ardura duen Zerbitzuak Ikuskatzeko eta Ikuskapen Teknikorako Zerbitzuak kasuan kasuko titulu eta ziurtagiriak eskuratzeko ikasleak bete beharreko baldintza akademikoak betetzen dituela egiaztatzeko ardura izanen dute.
9. -Batxilergoa eta Lanbide Heziketako Heziketa Zikloak ematen dituzten Institutuetako zuzendari eta idazkariek eta araubide bereziko irakaskuntzak ematen dituzten ikastetxeetakoek begiratuko dute eskatzaileek, titulu eta egiaztagiriak luzatu eta inprimatzeko, indarra duten legeek zehaztu dituzten tarifak ordaindu ote dituzten.
Hirugarrena. Proposamenak bidaltzeko epeak.
1. -Ikastetxeek Hezkuntza eta Kultura Departamentura bidali beharko dituzte tituluak eta ziurtagiriak luzatzeko proposamenak, ondoko epeen barruan:
A) -Uztailean, ikasketak ekainean amaitu dituzten ikasleen tituluak luzatzeko proposamenak.
B) -Urriko lehen hamabostaldian, ikasketak irailean amaitu dituzten ikasleen tituluak luzatzeko proposamenak.
2. -Aurreko lerroaldean ezarri epeetan ikastetxeak proposatu izan ezin dituen ziurtagiri eta tituluak luzatzeko eskaerak, urtero urtarrilean eta apirilean, ikastetxeak Hezkuntza eta Kultura Departamentuan aurkeztu beharko dituen beste poposamenekin batera sartu ahalko dira.
3. -Ikastetxeek behar diren neurriak hartuko dituzte tituluak eta ziurtagiriak jaso behar dituzten ikasleek, eskatu eta dagozkion tarifak ordaindu ondoren, behar diren izapideak epe jakin batzuen barruan egin ditzaten, aurreko idazatietan ezarritako guztia bete ahal izateko.
4. -Halaber, ikastetxeek behar diren neurriak hartuko dituzte atxikita dituzten ikastetxeek behar diren izapideak epeen barruan egin ditzaten, aurreko idazatietan ezarritakoa betetzerik izan dadin.
Laugarrena. Luzatzeko izapideak.
1. -Titulu eta ziurtagirien luzatze-data Hezkuntza eta Kultura Departamentuan proposamenari ematen zaion erregistro sarrerako egun berbera izanen da.
2. -Titulu horien edizioa abenduaren 22ko 382/1997 Foru Dekretuan ezarritakoari jarraikiz eginen da (1998-2-6ko Nafarroako Aldizkari Ofizial).
Bosgarrena. Prozedura amaitzea.
Foru Agindu honek aipatzen dituen tituluak luzatzeko prozedura ebazteko gehieneko epea urte batekoa izanen da, proposamenari Hezkuntza eta Kultura Departamentuko Erregistroan sarrera ematen zaion egunetik hasita. Dohainik ematen diren tituluei dagokienez, prozedura epe horretan berean amaitu beharko da, ikasketak bukatzen direnetik kontatzen hasita.
Seigarrena. Kopiak.
1. -Titulu edo ziurtagiri baten kopia luzatu ahalko da akats materialak zuzendu edo bertako datuak legez aldatu beharra dagoenean eta, halaber, jatorrizko titulua galdu, lapurtu, urratu edo hondatuta dagoenean.
2. -Ikastetxeek kopia luzatzeko izapideari hasiera emateko, beharrezkoa izanen da jatorrizko titulua aurkeztea edo interesatuak gordetzen duen zatia, titulua identifikatzeko modukoa, lapurtu edo galdu den kasuetan izan ezik. Interesatuei kopiak eman bezain pronto, jatorrizko titulua edo aurkeztu den zatia deuseztatuko da.
3. -Kopiak luzatzeko, jatorrizkoa luzatzeko erabili zen antzeko prozedurari segituko zaio.
4. -Titulua galdu, lapurtu edo erabat urratuta egoteagatik, beste kopia bat eman behar baldin bada, aurreko titulua baliorik gabe geldituko da automatikoki. Gertaera hori Nafarroako Foru Komunitateko lanbide eta ikasketa tituluen Erregistroko datu bankuan adieraziko da, zergatik izan zen aipatuz.
5. -Luzatzen diren kopietan zergatik izan zen azaldu beharko da, aurkian, behealdeko ezkerreko angeluan, behar den eginbidearen bitartez.
6. -Luzatzen den kopian jatorrizkoan adierazi zen erregistroko identifikazio klabe berbera inprimatu beharko da.
7. -Titulua luzatzeko prozesuan akats materiala egin eta interesatuari eman baino lehen antzematen bada, beste inprimaketa bat egin beharko da, hasierako tituluak zuen erregistro zenbaki berbera izanen duen beste kartulina- euskarri batean, erregistroko datu-bankuan behar diren zuzenketak egin ondoren.
8. -Kopia bat luzatzeko, interesatuak behar den tarifa ordaindu beharko du, Administrazioari egotzi beharreko akats materiala dela kausa luzatzen denean izan ezik.
Zazpigarrena. Tituluak ematea.
1. -Titulu eta ziurtagiriak, behin luzatu ondoren, interesatuek beraiek, nortasuna egiaztatuz, edo horretarako baimena duen pertsonak jaso beharko dituzte proposamena egin duen ikastetxean. Hortaz, ikastetxeek interesatuei jakinarazi beharko diete tituluak hartzeko dituztela.
2. -Tituluaren atzeko aldean, goiko ezkerreko angeluan, ikastetxeak eduki behar duen tituluak jaso eta emateko erregistro liburuko idazpenaren eginbidea jaso beharko da.
Xedapen Gehigarri Bakarra
1. -Foru Agindu honetan araututa dagoen prozeduraren bidez luzatzen diren titulu eta ziurtagiriek atzerrian balioa izan dezaten, Ikasketa eta Ikastetxeen Antolamendurako Zerbitzuko zuzendariak edo, horren ordez, horretarako baimena duten kargudunek sinaduren errekonozimenduaren izapidea eginen dute, legeztatu aurretik.
2. -Ikasketa osoak edo partzialak egin izana atzerrian egiaztatu behar den kasuetan, aurreko lerroaldean aipatu den sinaduren errekonozimenduaren eginbidea eginen da, bakar-bakarrik, ikasketa horien agiri ofizialetan.
Azken Xedapenetako Lehena
Hezkuntza zuzendari nagusiari baimena ematen zaio Foru Agindu hau aplikatu eta garatzeko behar diren xedapenak eman ditzan.
Azken Xedapenetako Bigarrena
Foru Agindu honek Nafarroako Aldizkari Ofizialean argitaratu eta biharamunean hartuko du indarra.
