navarra.es
Castellano | Euskara | Français | English
Ezagutzera eman
98/2005 Foru Agindua, ekainaren 8koa, Nekazaritza, Abeltzaintza eta Elikadura kontseilariak emana, Nafarroako Foru Komunitatean nekazarien behin-behineko datuak eta identifikazioa eguneratzeko prozedura arautzen duena, Europar Batasuneko ...
98/2005 FORU AGINDUA, ekainaren 8koa, Nekazaritza, Abeltzaintza eta Elikadura kontseilariak emana, Nafarroako Foru Komunitatean nekazarien behin-behineko datuak eta identifikazioa eguneratzeko prozedura arautzen duena, Europar Batasuneko Nekazaritza Politikaren ordainketa bakarraren erregimenean sartzeko
(2005eko 93. NAOn argitaratutako testua, abuztuaren 5ean)
Atarikoa
Kontseiluaren 2003ko irailaren 29ko 1782/2003 Erregelamenduak, Europar Batasunaren nekazaritza politikaren esparruan apligakarri diren zuzeneko laguntzen araubideetako xedapen komunak ezarri eta nekazarientzako zenbait laguntza-araubide abiarazten dituenak, zuzeneko laguntzen eredu berri bat ezarri du, ordainketa bakarraren erregimena izenekoa. Laguntzen sistema horren bidez laguntza bakarra ematen da ekoizpenetik bereizitako ustiapen bakoitzeko; laguntza hori nekazariek denboraldi zehatz batean -erreferentzia aldia izenekoan-jasotako zenbatekoen arabera kalkulatzen da eta 2000, 2001 eta 2002 urte naturalak hartzen ditu, oliba olioaren ekoizpenari ematen zaion laguntzan izan ezik, horrek 1999. urtea ere hartzen baitu.
Batzordearen 2004ko apirilaren 21eko 795/2004 Erregelamenduak aplikaziorako xedapenak ezarri ditu erregelamendu hark aurreikusitako ordainketa bakarraren erregimenari dagokionez. Beste gai batzuen artean, Batzordearen 795/2004 Erregelamenduko 12. artikuluak aurreikusten du estatu kideek identifikatu egin behar dituztela laguntza erregimen horretan parte har dezaketen nekazariak, erregimena aplikatzen den urtearen aurrekoari dagozkion laguntza eskubideak behin-behinekoz ezartzeko.
Horri begira, Nekazaritza, Arrantza eta Elikadura Ministerioak abian jarri du datuak biltzeko prozesu bat, 1782/2003 Erregelamenduko VI. eranskinean ageri diren laguntzei buruzkoa, autonomia erkidegoek bidalitako informaziotik abiatuta, laguntza mota guztiak integratuz, nahiz eta autonomia erkidego desberdinetan deklaratu izan. Horretatik kanpo dago hazien sektorea, Espainian ordainketa bakarraren erregimenetik kanpo geratu baita.
Apirilaren 15eko APA/1171/2005 Aginduak, ordainketa bakarraren erregimena aplikatzearen xedez nekazarien behin-behineko datuak eta identifikazioa eguneratzeari buruzkoak ("Estatuko Aldizkari Ofiziala", 2005eko maiatzaren 2koa), nekazarien identifikaziorako xedapenak ezartzen ditu, ordainketa bakarraren erregimenean sartzeko, eta erreferentziazko zenbatekoak eta hektarea kopuruak behin-behinekoz ezartzeko xedapenak ere ematen ditu. Aginduaren 11. artikuluak dioenez, autonomia erkidegoak izanen dira nekazariei datuak eman eta haiek proposatzen dituzten aldaketak tramitatuko dituztenak.
Prozesua modu ordenatu eta eraginkorrean egiten dela ziurtatzeko, eta nekazariei ahalik eta erraztasun gehien ematearren jakinarazpenak aurkezteko, beharrezkoa da azaldu diren prozesu horiek arautzea eta apirilaren 15eko APA/1171/2005 Agindua Foru Komunitatean garatzea.
Horrenbestez, eta Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz, agindu dut:
1. artikulua. Xedea.
Foru agindu honen xedea da Nafarroako Foru Komunitatean nekazarien behin-behineko datuak eta identifikazioa eguneratzeko prozedura arautzea, erreferentziazko unitate eta zenbatekoak behin-behinekoz ezartzeko, Kontseiluaren 1782/2003 Erregelamenduan eta Batzordearen 795/2004 zenbakikoan ezarritakoari jarraikiz.
2. artikulua. Definizioak.
Agindu honen ondorioetarako, Kontseiluaren 1782/2003 Erregelamenduan eta Batzordearen 795/2004 zenbakikoan ageri diren definizioak izanen dira aplikagarri eta, bereziki, ondoren azaltzen direnak:
a) "Nekazaria": edozein pertsona fisiko edo juridiko, edo pertsona fisiko edo juridikoen edozein talde, legeria nazionalak taldeari eta bere kideei ematen dien araubide juridikoa bat ala beste izan, ustiapena Komunitateko lurraldean badu eta nekazaritzako jarduera bat egiten badu.
b) "Erreferentzia aldia": 2000. urtetik 2002.era bitartekoa, 2000/2001, 2001/2002 eta 2002/2003ko merkaturatze kanpainei dagokiena. Hori hala izanik ere, oliba oliorako laguntzen erregimenak 1999/2000 merkaturatze kanpaina ere hartzen du, eta esne priman eta dagokion ordainketa gehigarrian erabiliko den erreferentziazko banakako kopurua 2006ko martxoaren 31n ustiapenean dagoena izanen da.
c) "Erreferentziazko zenbatekoa": erreferentzia aldiko urte natural bakoitzeko (Kontseiluaren 1782/2003 Erregelamenduko VI. eranskinean ageri diren laguntza erregimenetarako) nekazari bati dagozkion ordainketen zenbateko osoen batez bestekoa; zenbateko horiek Erregelamendu horren VII. eranskinaren arabera kalkulatu eta doituak.
d) "Erreferentzia unitateak": unitate horietan lagapen edo banaketa akordioak ezarri behar dira. 1782/2003 Erregelamenduko VI. eranskinean ageri diren erregimenetako ordainketa zuzenen bat sorrarazi duten hektarea edo abereen batez bestekoari dagozkio, laguntza motaren arabera. Ardi eta ahuntz aziendaren ordainketa gehigarriaren kasuan, eta behi aziendaren ordainketa gehigarriarenean, kalkulurako formula berezia baitute, erreferentzia unitateetan ez da abere kopurua azalduko, baizik eta erreferentziazko zenbatekoa.
Unitate hauek aplikatuko dira sektoreen arabera:
-Belarki laboreak, arroza, olioa, fekulatarako patatak, bazka idortuak eta tabakoa ekoizteko laguntzak: hektareak.
-Behi ume-hazleak, zezenak, lehen eta bigarren tarteko idiak, behi-azienda heldua eta hiltzeko aratxeak, estentsibo bihurtzeko prima, behi ume-hazleen prima nazional osagarria: abere kopurua.
-Behin aziendaren eta ardi-ahuntz aziendaren ordainketa gehigarria: euroak.
e) "Ekoizpen unitatea": erreferentzia aldian zuzeneko ordainketarako eskubidea eman zuen azalera bat gutxienez, bazkatarako azalera barne, edo zuzeneko ordainketarako eskubidea eman zuen abere bat, dagokion primarako eskubidearekin batera, hala denean.
f) "Jaraunspen aurreratua": apirilaren 15eko APA/1171/2005 Aginduan ezarritakoarekin bat, jaraunspen aurreratua izaten da ustiapeneko titularrek ustiapena, osorik edo parte bat, dohainik eta "inter vivos" egintzen bidez nekazaritzako jardueran eta horri dagozkion eskubideetan oinordeko direnei lagatzen dietenean edo lagatu dietenean.
g) "Banaketa akordioa". Agiri idatzi bat da eta horren bidez oinordekoek, erreferentzia aldian ordainketak dituen titular baten gozamendunek, edo titular berriek zatiketa kasuan, erabakitzen dute geroago ordainketa bakarrerako behin-behineko eskubideen zehaztaile izanen diren erreferentzia unitateak banatzea.
h) "Lagapen akordioa". Agiri idatzi bat da eta horren bidez lagatzaileak eta lagapen-hartzaileak erabakitzen dute geroago ordainketa bakarrerako behin-behineko eskubideen zehaztaile izanen diren erreferentzia unitateak banatzea.
3. artikulua. Datuak jakinaraztea.
Nekazaritza, Abeltzaintza eta Elikadura Departamentuak jakinarazpena igorriko die Kontseiluaren 1782/2003 Erregelamenduko VI. eranskinean ageri diren laguntza erregimenen bitartez erreferentzia aldian ordainketa zuzenak izan dituzten nekazariei; jakinarazpen horretan agertuko dira erreferentziazko zenbatekoak, hektarea kopurua eta ordainketen sorrarazle izan ziren ekoizpen unitateei dagozkien gainerako datuak, ordainketa bakarraren erregimeneko datu basean ageri direnak.
Interesa duen pertsonaren batek datuen jakinarazpena jaso ez badu, kopia bat eska dezake Nekazaritza, Abeltzaintza eta Elikadura Departamentuko edozein bulegotan.
Emandako datuetan akats materialak ikusten badituzte nekazariek, akats horiek zuzentzeko eska dezakete.
4. artikulua. Erreferentzia aldian zuzeneko ordainketak izan zituen nekazari batengandik ustiapen bat edo horren parte bat jaso duten nekazarien datuak identifikatu eta eguneratzea.
1. Erreferentzia aldian zuzeneko ordainketak izan zituen nekazari batengandik ustiapen bat edo horren parte bat jaso duten nekazariek eska dezakete jasotako ekoizpen unitateak direla-eta dagozkien erreferentzia unitateen behin-behineko esleipena.
a) Ustiapena edo horren parte bat egiazko jaraunspenagatik edo jaraunspen aurreratuagatik edo gozamen gisa jaso duten nekazariak, Kontseiluaren 1782/2003 Erregelamenduko 33.1.b) artikuluan eta 795/2004 Erregelamenduko 13.ean xedatutakoarekin bat.
Jatorrizko ustiapenaren jaraunsleak edo gozamendunak bat baino gehiago badira, ezinbestekoa izanen da banaketa akordio bat izatea. Akordioa ezartzen ahalko da laguntza sektore bakoitzeko erreferentzia unitate edo zenbatekoen portzentaje baten bidez, edo, bestela, jaraunsle edo gozamendun bakoitzari dagozkion erreferentzia unitateen kopurua zehaztuz, sektore hauek bereizita: belarki laboreak, oliba olioa, bazka idortuak, fekulatarako patata, tabakoa, behi aziendarentzako abeltzaintza primak eta ardi-ahuntz aziendarentzako abeltzaintza primak.
b) Erreferentzia aldian ordainketak lortu zituen titularraren (bakarkako pertsona fisikoa edo elkartua, edo pertsona juridikoa) nortasuna edo izena aldatu izana, Kontseiluaren 1782/2003 Erregelamenduko 33.2 artikuluan eta 795/2004 Erregelamenduko 14.ean xedatutakoarekin bat.
c) Erreferentzia aldian ordainketak lortu zituzten ustiapenen bat-egitea gertatu izana, Kontseiluaren 1782/2003 Erregelamenduko 33.3 artikuluan eta Batzordearen 795/2004 Erregelamenduko 15.ean xedatutakoarekin bat.
d) Erreferentzia aldian ordainketak lortu zituen ustiapen baten zatiketa gertatu izana, Kontseiluaren 1782/2003 Erregelamenduko 33.3 artikuluan eta Batzordearen 795/2004 Erregelamenduko 15.ean xedatutakoarekin bat.
Beharrezkoa izanen da artikulu honetako a) letran azaltzen diren moduetako edozeinetan ezarritako banaketa akordio bat.
e) Ustiapen bat edo horren parte bat laguntza eskubideen lagapena barne duen salerosketa bidez eskuratu izana, 1782/2003 Erregelamenduko 42.9 artikuluan eta 795/2004 Erregelamenduko 17.ean xedatutakoarekin bat.
Oro har, ezinbestekoa izanen da erosleak eta saltzaileak, biek batera, lagapen akordio bat ezartzea, bertan bilduz eskualdatutako ekoizpen unitateei dagozkien erreferentzia unitateak. Akordioan zehaztu beharrekoak: unitate kopurua eta erreferentziazko zenbatekoak ekoizpen eskualde eta labore bakoitzeko, abere mota edo sektore bakoitzean egokitzen den laguntza.
Hala ere, salerosketa "lur goldagarriko" lurzatiei badagokie, ukituek lagapen akordio bat egiteko aukera izanen dute, bertan eskatuz erosleari eslei diezazkiotela saldutako lurzati eta azalerei dagozkien ekoizpen unitateak. Halakoetan, Nekazaritza, Abeltzaintza eta Elikadura Departamentuak zehaztuko ditu eskualdatu beharreko erreferentzia unitateak, kontuan hartuz, alde batetik, saldutako lurzatien azalera eta ureztaketa mota, eta, bestetik, saltzailearen ustiapenean erreferentzia aldian laguntza izateko eskubidea duten eta ez duten belarki laboreetarako azalerak, lehorreko lurra eta ureztaketakoa bereizita.
Horren antzera, salerosketa behi ume-hazleen edo ardi-ahuntz aziendaren prima eskubideei badagokie, ukituek lagapen akordio bat egiteko aukera izanen dute, bertan eskatuz erosleari eslei diezazkiotela saldutako prima eskubideei dagozkien ekoizpen unitateak. Hori gertatzen denean, Nekazaritza, Abeltzaintza eta Elikadura Departamentuak zehaztuko ditu eskualdatu beharreko erreferentzia unitateak, kontuan hartuz saldutako eskubideen kopuruak zer frakzio duen behi ume-hazleen edo ardi eta ahuntzen erreferentzia aldiko batez bestekoaren aldean. Behi ume-hazleen eskubideak saltzen direnean, behi-aziendari dagozkion laguntza lerro guztiak sartuko dira salmentari lotutako erreferentzia unitateen kalkuluan; era berean, ardi eta ahuntz aziendaren eskubideak direnean saldutakoak, azienda mota horren guztiak sartuko dira.
2. Errege Bardeako lur azalerek berezitasun juridikoa baitute, "Katastroko titularra" izaera eskuratzea erosketa baten parekoa izanen da, artikulu honen ondorioetarako. Kasu horretan zilegi izanen da erreferentzia unitateak lagatzea katastroko aurreko titularraren eta titular berriaren artean.
3. Aipatu kontratuei dagozkien hektareak, ekoizpen unitateak eta zenbatekoak ezartzeko, lehenik laguntza eskubideak behin-behinekoz eta behin betikoz ezarri beharko dira,1782/2003 Erregelamenduko 46.3 eta 42.9 artikuluetan ageri dena galarazi gabe.
5. artikulua. Jarduera erreferentzia aldian hasi duten nekazariak.
Nekazaritzako jarduera erreferentzia aldian hasi duten nekazariek eska dezakete erreferentzia unitate eta zenbatekoak kalkula daitezela erreferentzia aldiaren barrenean jarduerari lotuta egiten dituzten urteak oinarri hartuta.
Aurreko lerroaldean aipatutako nekazariek egiaztatu beharko dute nekazaritza jardueran etenik gabe aritu direla hasi zirenetik aipatu den eskaera egiten duten arte; bestela, jardueran etenen bat egin badute, frogatu beharko dute foru agindu honen 7. artikuluan aurreikusitako ezinbesteko arrazoietakoren batengatik edo egoera berezietakoren batengatik izan dela.
Nekazaritzako jarduera erreferentzia aldian hasten duen nekazaria 4.1.a) artikuluko kasuan, edo 6. artikulukoan edo 7.enekoan ere sartuta baldin badago, 795/2004 Erregelamenduko 13.4 eta 18.2 artikuluen arabera egokienak diren hektareak eta erreferentziazko zenbatekoak esleituko zaizkio.
6. artikulua. Nekazariak identifikatzea ordainketa bakarraren erregimenean sartzeko, erreserba nazionaleko laguntza eskubideak esleitzearen ondorioetarako.
1. Erreserba nazionaleko laguntza eskubideak esleitzearen ondorioetarako, egoera hauek hartuko dira kontuan:
a) Egoera berezi batean dauden nekazariak, Kontseiluaren 1782/2003 Erregelamenduko 42.4 artikuluan eta Batzordearen 795/2004 Erregelamenduko 18. artikulutik 23 bis artikulura bitartekoetan azaltzen diren egoeren arabera. Hauek dira:
-Esne ekoizleak, Batzordearen 795/2004 Erregelamenduko 19. artikuluan xedatutakoari jarraikiz.
-Hildako edo erretiratutako nekazari baten lurrak, erreferentzia aldian hirugarren bati errentan emanak zituenak, jasotzen dituzten nekazariak, Batzordearen 795/2004 Erregelamenduko 20. artikuluan xedatutakoaren arabera.
-Inbertsioak egin edo lurrak eskuratu dituzten nekazariak, Batzordearen 795/2004 Erregelamenduko 21. artikuluan xedatutakoari jarraikiz.
-Lurrak errentan hartu dituzten edo errentan hartutako lurrak eskuratu dituzten nekazariak, Batzordearen 795/2004 Erregelamenduko 22. artikuluan xedatutakoari jarraikiz.
-Ekoizpena berbideratzeko programa nazionaletan parte hartu duten nekazariak, Batzordearen 795/2004 Erregelamenduko 23. artikuluan xedatutakoari jarraikiz.
-Laguntza eskubideak jasotzeko edo dituzten eskubideen balioa handitzeko, epai judizialen bidez edo administrazio egintza irmoen bidez legitimatuta dauden nekazariak, Batzordearen 795/2004 Erregelamenduko 23 bis artikuluan xedatutakoari jarraikiz.
b) Nekazaritzako jardueran 2002ko abenduaren 31aren ondoren hasi diren nekazariak, edo 2002an, baina urte horretan zuzeneko laguntzarik jaso gabe, eta jardueran segitzen badute, ezinbesteko kasuetan izan ezik, Kontseiluaren 1782/2003 Erregelamenduko 42.3. artikuluan xedatutakoari jarraikiz.
c) Esku-hartze publikoren bat duten berregituratze edo garapen programetarako eremuetan dauden nekazariak, Kontseiluaren 1782/2003 Erregelamenduko 42.5. artikuluan xedatutakoari jarraikiz.
2. Erreserba nazionaletik heldu diren eskubideak esleitzeko eskaerak Europar Batasuneko eta Estatuko arauetan ezarritakoaren arabera tramitatu eta ebatziko dira.
7. artikulua. Erreferentzia aldi gisa kontuan hartu behar diren urteak aldatzea aparteko zailtasunen ondorioak jasan dituen ekoizpena duten nekazariei.
1. Erreferentzia aldiaren barrenean ezinbesteko arrazoien edo aparteko egoeren (erreferentzia aldi horren aurretik edo aldian bertan izandakoen) ondorioak jasan dituen ekoizpena duten nekazariek eska dezakete erreferentzia unitate eta zenbatekoak kalkula daitezela erreferentzia aldiaren barrenean egoera horien ondoriorik gabeak izan diren urteak oinarri hartuta. Ezinbesteko arrazoiak edo egoera bereziak ez dira kontuan hartuko artikulu honetako 3. ataleko a) eta b) letretan ageri diren kasuetan, beste titular batek, ustiapen eta aldi bererako Europar Batasuneko Nekazaritza Politikako laguntzak eskatu eta lortzen direnean.
2. Ezinbesteko arrazoiak edo egoera bereziak erreferentzia aldi osoan izan badira, 1997. urtetik 1999.era bitarteko tartea aplikatuko da erreferentzia aldi gisa.
3. Foru agindu honen ondorioetarako, ondoko hauek dira ezinbesteko arrazoiak edo egoera bereziak:
a) Nekazaria hil edo desagertzea.
b) Nekazariak lanerako ezintasun luzea izatea.
c) Ustiategiko nekazaritza lurretan kalte handiak eragin dituen hondamendi natural larria.
d) Ustiategiko abeltegiak istripuz suntsitzea edo abereak istripuz galtzea.
e) Nekazariaren azienda guztia edo parte bat ukitu duen epizootia.
f) Abereen gaixotasunak errotik kentzeko programa baten barrenean abereak hil behar izatea.
4. Artikulu honetako 1. eta 2. atalak aplikatuko zaizkie, halaber, ingurumen arloko konpromisoen menpe egon izanaren ondorioz erreferentzia aldian zuzeneko ordainketak jasotzeari utzi dioten nekazariei, Kontseiluaren 1782/2003 Erregelamenduko 40.5 artikuluan xedatutakoari jarraikiz.
8. artikulua. Murrizketak, eskualdatutako erreferentzia unitatateen kopuruan.
1. Prima eskubideak eta azienda salerosteko kontratuetan, edo zatiketa eta jaraunspenetan, zeinetan abereen erreferentzia unitateak banatzen baitira, lagatzailearen ustiapenak edo jatorrizko titularrarenak bazkatarako azalera baldin badu, eskualdatutako prima eskubideen araberako bazka lurreko hektareak esleituko zaizkio erosleari edo, hala bada, jaraunsleei edo nekazari berriei. Hektarea kopurua kalkulatzerakoan kontuan hartuko da eskualdatutako erreferentzia unitateei dagozkien azienda larriko unitateak (ALUak), abere motaren arabera, bai eta jatorrizko titularraren abereen erreferentzia unitate guztiei dagokien ALUen batez besteko kopurua.
Abere batek laguntza bat baino gehiago jaso badezake, behin bakarrik hartuko da kontuan. Kontseiluaren 1782/2003 Erregelamenduko 131. 2.a) artikuluan aurreikusitako moduan eginen da ALUen kalkulua.
2. Azalerei buruzkoak diren salerosketa kontratuen edo jaraunspen aurreratuen kasuan, ezin izanen dira laga salerosketan edo jaraunspen aurreratuan azaltzen diren hektareak baino erreferentzia unitate gehiago.
9. artikulua. Inprimakiak eta eguneratze jakinarazpenen aurkezpena.
Nekazarien behin-behineko datuak eta identifikazioa, ordainketa bakarraren erregimenean sartzeari begira, eguneratzeko jakinarazpenak formulario edo inprimakiak erabiliz beteko dira, programa informatikoen bidez egindakoak barne. Nafarroako Gobernuko Nekazaritza, Abeltzaintza eta Elikadura Departamentuak emanen ditu.
Nekazaritza, Abeltzaintza eta Elikadura Departamentuko bulego nagusietan, eskualdeetakoetan eta barrutietakoetan egonen dira eskuragarri, bai eta departamentuaren web orrian ere: http://www.cfnavarra.es/agricultura.
Jakinarazpenak Nekazaritza, Abeltzaintza eta Elikadura Departamentuan aurkeztuko dira, eskualde eta barrutietako bulegoetan, Nafarroako Gobernuko Erregistro Orokorrean, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen arabera (urtarrilaren 13ko 4/1999 Legeak aldatua) onarturiko beste edozein administrazio erregistrotan.
2005eko uztailaren 15ean bukatuko da jakinarazpenak aurkezteko epea, nahiz eta Nekazaritza, Arrantza eta Elikadura Ministerioak luzatzen ahal duen.
10. artikulua. Jakinarazpenaren araubide juridikoa eta datuak eguneratzea.
Ordainketa bakarreko datuen behin-behineko eguneratzea interesatuek eman eta frogatzen dituzten eta behin betikoak ez direnez agintaritza eskudunak egiaztatzen dituen datuetatik abiatuta egiten da, eta horren kontra ez da zilegi errekurtsoa jartzea, nahiz horrek ez duen galarazten datu okerrak zuzentzeko eskaera egitea, eta dagokion unean laguntza eskubideen esleipena eskatzea, bai eta bere ustez hartu beharko lukeen ordainketa bakarreko laguntza eskatzea ere.
Xedapen Gehigarri Bakarra. Aplikaziotik salbuetsitakoak.
Foru agindu hau ez zaio hazien sektoreari aplikatuko, 1782/2003 Erregelamenduko 70. artikuluak ezarritako salbuespenen arabera.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratzen den egunean hartuko du indarra.
