navarra.es

Castellano | Euskara | Français | English

Bilatzaile erabili!

90/2015 Foru Agindua, martxoaren 10ekoa, Landa Garapeneko, Ingurumeneko eta Toki Administrazioko kontseilariak emana, Nekazaritzako Lurzatien Informazio Geografikorako Sistemaren (NELIGS) erregulazioa eta bera Nafarroan kudeatzeko arauak ezartzen dit

 

(2015eko 75. NAOn argitaratutako testua, apirilaren 21ean)

Nekazaritzako politika bateratuaren finantzaketari, kudeaketari eta jarraipenari buruzko Europako Parlamentuaren eta Kontseiluaren abenduaren 17ko 1306/2013 (EB) Erregelamenduaren 68. artikuluak kudeaketarako sistema integratuaren elementuen artean, nekazaritzako lurzatiak identifikatzeko sistema aipatzen du. 70. artikuluak dioenez, identifikazio sistema hori Batasuneko kide diren estatuek ezarri behar dute, katastroko agiriak edo mapak edo bestelako baliabide kartografikoak oinarritzat harturik, informazio geografikorako sistema informatikoetan erabiltzen diren teknikak baliatuz.

Espainian, nekazaritzako lurzatiak identifikatzeko sistema Nekazaritzako Lurzatien Informazio Geografikorako Sistema (NELIGS) da. Nekazaritzako lurzatien informazio geografikorako sistema arautzen duen abenduaren 19ko 1077/2014 Errege Dekretuak NELIGS delakoa Espainian aplikatzeko arauak ezartzen ditu, eta adierazten du sistema hori kudeaketarako baliabide gisa erabiliko dela kudeaketa eta kontrolerako sistema integratuan eta Batasunaren nekazaritza politika bateratuko beste laguntza araubide batzuetan, azalerarekin zerikusia duten haietan, hain zuzen ere.

Autonomia erkidegoak arduratuko dira NELIGS sistema ustiatu eta mantentzeaz, bakoitza bere lurraldean, eta aldatzeko eskaeren tramitaziorako prozedurak ezartzeaz, aipatu Errege Dekretuaren 5. eta 7. artikuluekin bat.

Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan eskudantziak erabiliz, agindu dut:

1. artikulua. Xedea.

1. Agindu honen xedea da Nafarroako Foru Komunitatean onestea Nekazaritzako Lurzatien Informazio Geografikorako Sistemaren (NELIGS) ustiatze eta mantentze araubidea erregulatzen duten arauak, baita NELIGS sistema aldatzeko eskaeren tramitaziorako prozedura eta foru agindu honen eranskinak ere.

2. artikulua. NELIGSen aplikazio eremua.

1. NELIGS nekazaritzako lurzatiak identifikatzeko sistema da, laguntzen araubidea kudeatzeko eta kontrolatzeko, Nekazaritzako politika bateratuaren finantzaketari, kudeaketari eta jarraipenari buruzko Europako Parlamentuaren eta Kontseiluaren abenduaren 17ko 1306/2013 (EB) Erregelamenduaren 68. artikuluak aipatzen baitu, baita lurzatiak identifikatu beharreko laguntzen araubideetarako ere. Beraz, nekazaritzako politika bateratuaren esparruan nekazaritzako lurzatiak identifikatzeko erreferentziako oinarri bakarra da.

2. Laguntzarako eskabide bakarreko dagokion deialdian zehaztuko da zein eremutan erabil daitezkeen NELIGS sistema ez den lurzatiak identifikatzeko erreferentziak, eta adierazi beharko da erabili beharreko kasuan-kasuko erreferentziak.

3. NELIGSen dagoen informazioak ez du eskubiderik sortzen legez onarturiko mugetarako eta beste jabetza batzuetarako, ezta nekazaritzako politika bateratuaren esparruko laguntzei lotuta ez dauden lurren erabilerak definitzeko ere.

3. artikulua. Definizioak:

–Lur goldagarria: Laboreak ekoizteko erabiltzen diren lurrak edo laboreak ekoizteko eskuragarri daudenak, landatu gabekoak baitira. Belarrak edo bestelako bazka-laboreak (ereinak) landatzeko erabiltzen badira, horiek sartu beharko dira ustiategiko laboreen txandaketan bost urtetik beherako epean.

–Larreak: Belarrak edo bestelako belarki-bazka naturalak (berezkoak) edo landatuak (ereinak) ekoizteko erabiltzen diren lurrak, baldin eta ustiategiko laboreen txandaketan bost urtez edo gehiagoz sartu ez badira.

–Zuhaixka-larreak: Ustiategiko laboreen txandaketan bost urtez edo gehiagoz sartu ez diren belarrak edo bestelako belarki-bazka naturalak (berezkoak) edo landatuak (ereinak) ekoizteko erabiltzen diren lurrak, baldin eta lur horietan bazkarako balio izaten ahal duten beste zuhaixka espezie batzuk badira, betiere belarrak eta gainerako belarki-bazkak nagusi izanda.

–Zuhaitz-larreak: Belarrak edo bestelako belarki-bazka naturalak (berezkoak) edo landatuak (ereinak) ekoizteko erabiltzen diren lurrak, ustiategiko laboreen txandaketan bost urtez edo gehiagoz sartu ez badira, baldin eta lur horietan bazkarako balio izaten ahal duten beste zuhaitz espezie batzuk badira, betiere belarrak eta belarki-bazkak nagusi izanda.

–Larreen onargarritasunaren koefizientea: Elementu elkorrak, hala nola landarerik gabeko tokiak, malda handiegiak, edo zeharkatu ezin diren landaretza direla eta, modu eraginkorrean erabateko aprobetxamendua galarazten duten ezaugarriak dituzten larreei, zuhaitz-larreei edo zuhaixka-larreei koefiziente bat esleituko zaie, NELIGS esparruaren onargarritasun portzentajea islatzen duena; esparru horretan gehieneko azalera onargarria esparruaren azalera koefiziente horrekin biderkatuta ateratzen dena izanen da.

4. artikulua. NELIGSeko informazioa.

1. NELIGSeko informazioa publikoa da eta Europar Batasuneko laguntzak jasotzen ahal dituzten lurzatien informazioa dauka, azalerari dagokionez; halaber, eranskinean ezartzen den moduan erabilera eta aprobetxamenduak definituak dituzten lursailaren eta lurzatien eta esparruen euskarri grafikoa dauka, lursailaren errealitatearekin bat eginen baitute.

2. Nafarroako NELIGSko informazioa kontsultatzen ahalko da Landa Garapeneko, Ingurumeneko eta Toki Administrazioko Departamentuaren http://sigpac.navarra.es web orriaren bidez edo Nekazaritza, Elikadura eta Ingurumeneko Ministerioaren http://sigpac.magrama.es/fega/visor web orriaren bidez.

3. Landa Garapeneko, Ingurumeneko eta Toki Administrazioko Departamentuko NELIGSen web orriak Nafarroako Foru Komunitateko lurzati eta esparru guztien mugatze geografikoa dauka eta honako hauek guztiak aipatzen ditu: banakako erreferentzia, nekazaritzako erabilerari dagozkion ezaugarriak, onargarritasun koefizientea larreetan, ustiapen sistema (lehorrekoa, ureztaketakoa), oinarrizko ordainketaren araubideko eskualdea, nekazaritzako ingurumenaren aldetik ahulagoak diren larreen designazioa eta bestelako informazio garrantzitsua. Horrez gain, beste kartografia batzuk daude horren barnean: egiturazko elementuak identifikatzeko geruza grafikoa, eta sasoi bakoitzerako, lurzati berrantolamenduaren prozesuan dauden lurzatien informazio grafikoa eta alfazenbakizkoa, 2.2 artikuluan ezartzen den moduan adierazi behar baitira. Orri horretan ere zenbait urtetako ortoargazkiak daude eskura.

5. artikulua. NELIGSa eguneratzea.

1. NELIGS sistemako esparruak deklaratzen dituen nekazaria erantzule nagusia izanen da NELIGSen erregistratutako informazioa, grafikoa nahiz alfazenbakizkoa, benetakoa izan dadin eta errealitatearekin bat egin dezan, honako ondorio hauetarako: Nekazaritzako politika bateratua kontrolatu eta kudeatzeko sistema integratuaren laguntzak eskatzeko, ordainketa zuzenak eta landa garapenerakoak kudeatu eta kontrolatzeko, baita azalerak deklaratzeko NELIGS sistema, erreferentzia gisa, erabiltzen duten beste edozein diru-laguntza edo erregistro publiko ere.

Bereziki, eskatzaileak egiaztatuko du mugatze grafikoak eta NELIGS esparruaren erabilerak bat egiten dutela lursailaren errealitatearekin eta esparruak ez dituela aukeratu ezin diren elementuak (hala nola, bideak, eraikinak eta izaera iraunkorreko beste elementu elkor batzuk). Azkenik, larreen esparruetan, egiaztatuko du esparruari esleitutako larreen onargarritasunaren koefizienteak behar bezala adierazten duela horretarako onartzen den azaleraren portzentajea.

2. Bestetik, Landa Garapeneko, Ingurumeneko eta Toki Administrazioko Departamentuak, ekitaldi bakoitzeko laguntzarako eskabide bakarra aurkezteko epea hasi aurretik, NELIGSn eguneratuko ditu aurreko urtean aldaketa jasan duten Nafarroako Lurralde Aberastasunaren Zerga Erregistroko katastroko lurzatien identifikazioa, morfologia eta ustiapen sistema (lehorrekoa/ureztaketakoa).

Horrez gain, NELIGSko informazioa eguneratuko du, eskuragarri dagoen beste edozein informazio erabiliz, hala nola, Mahastien Erregistrokoa, tokian berean egiten diren kontrolak, ortoargazkiak, sateliteko irudiak, erabileren mapak eta aprobetxamenduak.

3. Laguntza bat eskatu edo ordaindu ondoren, eguneraketa horiek agerian jartzen badute NELIGSen erregistratutako informazioa ez dela zuzena, dagokion arau-hauste eta zehapen araubidea aplikatuko da, eta hala behar denean, bidegabeki jasotako ordainketen itzulketa. Eskatzailea salbuetsita egonen da baldin eta frogatzen badu agintaritza eskudunari ezarritako epeetan jakinarazi diola atzemandako ezadostasuna, berari egozten ahal ez zaizkion arrazoiengatik hori onartu ez baita, informazioa eskatzaileak berak emana izan nahiz beste iturri batzuetatik etorria izan, 1077/2014 Errege Dekretuaren 6. artikuluaren arabera.

6. artikulua. NELIGS aldatzeko eskaerak.

1. Nafarroan dagoen NELIGS esparru baterako interesa duena ez badago konforme NELIGSen erregistratutako informazioarekin, aipatu esparruari dagokionez, lurraldearen errealitatearekin bat egiten ez duelako, hori aldatzeko eskaera aurkeztu beharko dio Landa Garapeneko, Ingurumeneko eta Toki Administrazioko Departamentuari.

2. NELIGSeko aldaketak aurkezteko, pertsona interesduntzat hartuko dira lurzatien jabe, katastroko titular edo maizter diren pertsona fisiko edo juridiko guztiak, bai eta NELIGS esparruetan laborantzako lanak edo bazka-aprobetxamendua egiten duten gainerako guztiak ere, baldin eta esparru horiengatik, Batasunaren nekazaritza politikaren barrenean, laguntzarako eskabidea edo azaleren aitorpena aurkezten badute; edo pertsona horien legezko ordezkariak.

3. Eskaerak telematika bidez aurkeztuko dira, Landa Garapeneko, Ingurumeneko eta Toki Administrazioko Departamentuarekin dagokion lankidetza hitzarmena horretarako izenpetua duten entitate laguntzaileen bitartez, edo, bestela, Departamentuko bulegoen bitartez. Eskatzaileak berak ere zuzenean aurkezten ahalko ditu, bere ziurtagiri digitala erabiliz, Nafarroako Gobernuaren web orrian eskuragarri dagoen aplikazioaren bidez.

4. Eskabideak aurkezteko bi epe izanen dira:

a) Lehendabiziko epea laguntzarako eskabide bakarraren epearekin batera izanen da, abenduaren 19ko 1075/2014 Errege Dekretuan arautzen baita, aldaketak aurkezteko epea barne. Epe horretan aurkeztutako eskaerek ondorioa izanen dute urte horretan zehar aurkeztutako laguntzak emateko.

b) Bigarren epea irailaren 1etik abenduaren 31ra arte izanen da. Epe horretan aurkeztutako eskaerek ondorioa izanen dute hurrengo urteko laguntzak emateko.

5. Aldaketarako eskaera esparru horrek duen katastroko lurzatiaren berezko informazio grafikoari edo alfazenbakizkoari buruzkoa denean (katastroko mugak eta ustiapen sistema -lehorrekoa/ureztaketakoa), eskaera hori Lur-ondasunen Erregistroan edo Udalean aurkeztu beharko da, kudea dezaten. Dena dela, hiri eremuen kasuan, katastroko lurzati bat baino gehiago beren baitan biltzen dituzten NELIGS lurzatiak zehazten ahalko dira.

7. artikulua. NELIGSen aldaketa motak.

Interesdunek aurkezten dituzten aldaketarako eskabideak mota hauetan sailkatuko dira:

–1. mota: erabilera aldaketa esparru oso batean, esleitutako erabilerarekin ados ez egoteagatik.

–2. mota: ustiapen sistemako aldaketa (lehorrekoa/ureztaketakoa) esparru oso batean, esleitutako ustiapen sistemarekin ados ez egoteagatik, NELIGSko erabilera guztietarako, nekazaritzarako ez direnak izan ezik.

–3. mota: esparru baten zatiketa, haren parte bati esleitutako erabilerarekin ados ez egoteagatik.

–4. mota: esparru baten banantzea, haren parte bati esleitutako ustiapen sistemarekin (lehorrekoa/ureztaketakoa) ados ez egoteagatik.

–5. mota: lurzati baten banantzea, hirigune baten barrenean, nekazaritzako erabilera izateagatik.

–6. mota: lurzati baten morfologia/azalera aldaketa.

–7. mota: Aldaketa esparru oleikoak ukitzen dituzten alegazioetan.

–8. mota: fruitu oskoldunen eta algarroben esparruak ukitzen dituzten alegazioak.

–9. mota: Aldaketa larreen onargarritasun koefizientean, larreak baino ez dituen esparru batean. Horretarako II. eranskinean dauden balioak erabiliko dira.

–10. mota: Aldaketa esparru oso baten bataz besteko maldan.

–11. mota: Honako hau egitea egiturazko elementuetan: sartzea, kentzea, tipologia aldaketa eta/edo geometria aldaketa.

–12. mota: landu gabe utzitako esparru batean nekazaritzako jarduera berriro hastea.

–13. mota: Beste aldaketa eskaera batzuk, aipatutakoetan sartzen ez direnak.

8. artikulua. Aurkeztu beharreko agiriak

Aldaketarako eskabideak tramitaziorako sarbidea izan dezan, agiri hauek aurkeztu beharko dira:

a) Eskatzailea pertsona fisikoa bada, interesdunaren NANaren fotokopia, edo Departamentuari kontsultatzeko baimena.

b) Eskatzailea pertsona juridikoa bada, legezko ordezkariaren NANaren fotokopia, eta ordezkaritza frogatzeko agiria.

c) Eskaera hirugarren batek sinatu behar badu, baimen agiria eta hirugarrenaren NANa beharko dira.

d) Aurreko kasu guztietan, pertsona interesdunaren izaera frogatu beharko da alegatutako esparrua edo lurzatia eskaera bakarrean sartzen ez denean edo katastroan interesduna haren titular gisa agertzen ez denean. Agiri hauetakoren bat aurkeztu beharko da:

–Salerosketako eskritura publikoa, Jabetza Erregistroaren ohar soila, testamentua edo oinordeko-adierazpena.

–Errentamenduko kontratua, apartzeria edo jabeak sinatutako dokumentu pribatua, haren aprobetxamendua erabiltzeko eta disfrutatzeko ahalmena ematen baitu, edo bestelakoak, lurzatia erabiltzeko eskubidea egiaztatzen baitute.

e) Proposatutako aldaketa justifikatzen duen dokumentazioa, zeina, aldaketa motaren arabera, honako hau izanen baita:

–Kasu guztietan, aldaketarako arrazoiaren azalpen labur bat.

–3., 4. eta 5. motetako aldaketetan, beharrezkoa izanen da irteera grafikoari buruzko krokisa aurkeztea, non argi identifikatuko baita esparruko zein aldetan egin nahi den aldaketa.

–Aukeran, aldaketaren xedeko beste edozein frogagiri aurkezten ahalko da, besteak beste honako hauek: data duten argazki geoerreferentziatuak, landako kontrolaren akta baten kopia, eskatutako aldaketa justifikatzen duen txosten teknikoa, profesional eskudunak sinatua, eta abar.

f) Eskaera erakunde laguntzaile baten bidez aurkeztuz gero, entitate horri baimena eman beharko zaio, NELIGSen aldaketa egiteko eskaera sinatu eta Erregistroan eman dezan.

2. Eskaera harturik, aurkeztutako agiriak eskatutakoak direla egiaztatuko da. Agiri guztiak ez badaude, gehienez ere 10 eguneko epean osatu ditzala eskatuko zaio eskatzaileari, eta adieraziko zaio, hala egin ezean, eskaerari uko egiten diola ondorioztatuko dela eta espedientea artxibatu eginen dela. Halaxe jakinaraziko zaio.

9. artikulua. NELIGS aldatzeko eskaeren ebazpena.

1. 1. eta 3. motetako aldaketetarako eskabideen kasuan, aldatu nahi den NELIGS erabilera Larrea (PS), Bazkalekua zuhaixkekin (PR), Bazkalekua arbolekin (PA) baldin bada eta nekazaritzako ingurumen aldetik ahulagoa den larre gisa katalogatua bada, abenduaren 19ko 1075/2014 Errege Dekretuaren 21. artikuluan ezarritakoa hartuko da kontuan.

2. 2, 4 eta 6. motako aldaketetarako eskabideak lehendabiziko epean aurkezten direnean, aurreko urteko abenduaren 31 baino lehenagotik katastroan ageri direnak bakarrik onetsiko dira. Eskaera bigarren epean aurkezten bada, aldaketak katastroan jasoa egon beharko du aurkezten den urteko abenduaren 31rako.

3. 1. eta 3. motetako aldaketetarako eskabideen kasuan, erabilera Mahastia (VI) baldin bada, edo mahastia beste zerbaitekin (mahastiaren eta fruta-arbolen elkarketa -VF-, mahastiaren eta olibadiaren elkarketa -VO- edo fruitu lehorren eta mahastiaren elkarketa -FV-), Mahastien Erregistroarekin koordinatuta ebatziko dira.

4. 11. tipologiako eskaerak ebazteko kontuan hartuko da abenduaren 19ko 1078/2014 Errege Dekretuaren II. eranskineko 3. atalean (BCAM 7) xedatua, bertan ordainketa zuzenak, landa garapenerako urteko zenbait prima edo mahastizaintzaren sektorearen aldeko zenbait programarengatik egiten diren ordainketak jasotzen dituzten onuradunek bete beharreko baldintzazkotasun arauak ezartzen baitira.

5. Nekazaritza eta Abeltzaintzako zuzendari nagusiak ebatziko ditu aldaketarako eskabideak, aurkezten diren egunetik hasi eta sei hilabeteko epean.

Xedapen Gehigarri Bakarra. Arau osagarria.

Foru agindu honetan aurreikusten ez denetan, Nekazaritzako lurzatien informazio geografirako sistema arautzen duen abenduaren 19ko 1077/2014 Errege Dekretuari jarraituko zaio.

Xedapen Indargabetzaile Bakarra. Arauak indargabetzea.

Indargabetzen da otsailaren 1eko 41/2011 Foru Agindua, Landa Garapeneko eta Ingurumeneko kontseilariak emana, Nekazaritzako Lurzatien Informazio Geografikorako Sistemaren (NELIGS) erregulazioa eta bera Nafarroan kudeatzeko arauak ezartzen dituena.

Azken Xedapen Bakarra. Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

I. ERANSKINA. NELIGSen zehaztutako erabilerak

Nekazaritzako erabilerak.

–Laborantzarako lurrak.

NELIGS ERABILERA	DESKRIBAPENA
IV	Berotegiak eta plastikopeko laboreak
TA	Lur goldagarriak
TH	Baratzea

–Labore iraunkorrak.

NELIGS ERABILERA	DESKRIBAPENA
CF	Zitrikoak-Fruta-arbolak elkarketa
CI	Zitrikoak
CS	Zitrikoak-Fruta oskoldunak elkarketa
CV	Zitrikoak-Mahastia elkarketa
FF	Fruta-arbolak-Fruta oskoldunak elkarketa
FL	Fruitu lehorrak eta olibadia
FZ	Fruitu lehorrak
FV	Fruitu lehorrak eta mahastia
FY	Fruta arbolak
OC	Olibadia-Zitrikoak elkarketa
OF	Olibadia-Fruta-arbolak
OV	Olibadia
VF	Mahastia-Fruta-arbolak
VI	Mahastia
VO	Mahastia-Olibadia

–Larreak.

NELIGS ERABILERA	DESKRIBAPENA
PA	Bazkalekua arbolekin
PR	Bazkalekua zuhaixkekin
PS	Larrea

–Beste batzuk.

NELIGS ERABILERA	DESKRIBAPENA
ZC	Eremu berrantolatua, ortoargazkia agertzen ez dena
ZV	Eremu zentsuratua

Nekazaritzarako ez beste erabilerak.

NELIGS ERABILERA	DESKRIBAPENA
AG	Ur-lasterrak eta urguneak
CA	Bideak
ED	Eraikinak
FO	Oihana
IM	Elkorrak
ZU	Hirigunea

II. ERANSKINA. rgarritasun koefizientea larreetan

RTZEN AHAL DEN AZALERAREN PORTZENTAJEA	LARREAN RGARRITASUNAREN KOEFIZIENTEAREN BALIOA (%)
≥ %0 eta < %20	0
≥ %20 eta < %30	25
≥ %30 eta < %40	35
≥ %40 eta < %50	45
≥ %50 eta < %60	55
≥ %60 eta < %70	65
≥ %70 eta < %80	75
≥ %80 eta < %90	85
≥ %90	100

Jar zaitez gurekin harremanetan | Erabilerraztasuna | Lege abisua | Webaren mapa