Nafarroako Gobernuak despopulazioari buruzko departamentuarteko batzordea sortuko du, fenomeno demografiko hau arintzea xede duten politikak koordinatzeko. Toki Administrazioko eta Despopulazioko zuzendari nagusi Jesús María Rodríguezek eman du ezagutzera batzorde berri horren sorrera, CCOOk ostegun honetan Lizarran antolaturiko despopulamenduari buruzko jardunaldien barnean.

Biztanleen eta bereziki landa-eremuetako bizilagunen etengabeko galeraren fenomenoari aurre egiteko, Nafarroako Gobernuko Errealitate Sozialaren eta Gizarte Politiken Plangintza zein Ebaluazioaren Behatokiak Foru Komunitatearen diagnosi sozioekonomikoa landuko du Lurralde Kohesioko Departamentuarendako.

“Lanaren muina izanen da Nafarroa lurralde-ikuspegitik aztertzea, hainbat testuinguru kontuan hartuz: demografikoa, lan girokoa, soziala, produktiboa eta teknologikoa”, adierazi du Rodríguezen jardunaldian izandako agerraldian.

Rodríguezen hitzetan, despopulazioaren fenomenoa “zeharkako arazoa da Gobernuarendako eta honek ikuspegi globalarekin aurre eginen dio, Gobernu osoaren arazoa baita, ez bakarrik lurralde edo departamentu jakin batzuena”.

Horren kariaz, despopulazioari buruzko departamentuarteko batzordea sortu nahi da, arazo horren inguruko eskuduntza duten departamentu guztiak barne hartuz, biztanleen galeraren fenomenoa moteldu eta herri txikien desgerpen-arriskuari aurre egiteko.

Aldi berean, despopulazio-arriskurik handiena duten eremuetan biztanle kopuruari eustea eragozten duten arrazoiak eta zailtasunak zehazten ari dira, jendeak herrietan bizi edo lan egitea oztopatzen duten toki zein foru administrazioaren eskuduntzei loturiko eragozpenak ezagutzeko, biztanleria egonkortzen lagundu duten balizko ekimenak antzemateko eta 10 urteko epean biztanleria finkatzen lagunduko duten ekintza zehatzak erabakitzeko.

Zenbait ekintza-proposamen, joan den legealdian landutako Pirionoko haranen egoera sozioekonomikoari buruzko batzorde txostengileak proposaturiko ekintzen ildotik, estu-estu lotuta daude arrisku handieneko eremuetan zoru industriala garatzearekin; errepideak, azpiegiturak eta hiri arteko garraioak hobetzearekin; lehen sektorea indartu eta Nekazaritza Politika Bateratua berrikustearekin; turismoaren kudeaketa iraunkorra garatzearekin edota banda zabala herri guztietara hedatzearekin.

Abian diren lan guztien bitartez, Nafarroako despopulazioari buruzko foru lege dekretua landu nahi da epe ertain-luzean.

Arriskurik handiena duten Nafarroako eremuak

Nafarroako hiru udalerritik bat dago despopulazio arriskuan, % 38, erronka demografikoari buruzko Gobernuaren ordezkariak landutako datuen arabera. Europar Batasunak 12,5 biztanle kilometro koadroko dentsitatean finkatu du despopulamendu arriskua.

Nafarroan, Zangoza, Lizarrerria, Pirinioak eta Erdialdea dira despopulamendu arriskurik handiena duten eremuak.

Nafarroako Udal eta Kontzejuen Federazioak (NUKF) bizilagunen azken hamarkadako bilakaerari buruz esku artean darabiltzan datuen arabera, 2017an, sei eskualdek biztanleria galdua zuten.

Pirinioa da, % 12,92ko jaitsierarekin, despopulazioaren fenomenoak gehien kaltetu duen eskualdea; ondotik daude Zangoza (-% 5,17), Jurramendi (-% 2,12), Erdialdea (-% 1,92), Lizarrako Erribera (-% 1,31) eta Izarbeibar (-% 0,95).