Alfredo Sanzolek pasa den ostegunean ikastaroen irekiera hitzaldia eskaini ostean, astelehen honetan, ekainak 10, emanen zaie hasiera Nafarroako unibertsitatek antolatutako udako ikastaroei. STEM (zientzia, teknologia, ingenieritza eta matematikak) bokazioak sustatzea eta gaixotasun arraro neuromuskularren diziplina arteko arreta izanen dira landuko diren gaiak.

-“Ikasgelan STEM bokazioak pizteko baliabideak” , Nafarroako Unibertsitate Publikoak antolatutako ikastaroa, ekainaren 11tik 13 izanen da, euskaraz, Iruñeko Planetarioan. Bertan, ikasle gazteekin STEM (zientzia, teknologia, ingeniaritza eta matematika) ikasketak garatzearen garrantzia azpimarratuko da, beraien etorkizun profesionala eta gizartean osoki parte hartzeko aukera bermatuz. Hala, STEM ikasketekiko zaletasuna pizteko irakasleek ikasgai horiek erakargarri egiteko bideak aztertu, eta tresnak eta baliabideak ezagutuko dituzte parte hartzaileek.

-“Gaixotasun arraro neuromuskularrei ekiten jakintza-alor anitzeko eran”, NUPek antolatutako ikastaroa ekainaren 13 eta 14an izanen da Osasun Zientzien Fakultatean. Gaixotasun arraro izendatzen dira 10.000 biztanleko 5 pertsona baino gutxiagori eragiten dietenak, gainera larriak, kronikoak, ahulgarriak eta, gehienetan, ezgaitzaileak izaten dira gaitzok. Oro har ez dira oso ezagunak, prebalentzia tasa txikia dute eta ezaugarri kliniko bereziak. Horregatik, gaixoei arreta ematerakoan beharreazkoa da diziplina ezberdinen arteko elkarlana, medikuntza, asistentzia zein gizarte arloak batuz. Ikastaroa gizarte osoari dago zuzendua, gaixotasun arraro neuromuskularrekiko interesa duen edonori eta zehazki, Osasun Zientzien, Gizarte Lanaren eta Hezkuntzaren arloko unibertsitateko ikasle eta irakasleei eta aipatutako arloetako profesionalei.

Ikastaro hauen inguruko informazioa zabaltzeko eta matrikula egiteko webgunea: https://udakoikastaroak.navarra.es/