Tximinia behar bezala eraiki edo eraberritu behar da, tiroa edo kea kanporatzeko hodiek igarotzen dituzten forjatu eta estalkiek –kanporako bide bertikalean– berotik guztiz isolaturik egon behar baitute. Tximinia bat forjatutik ez isolatzeak edo behar bezala ez isolatzeak etxeak su hartzeko arrisku handia dakar.

• Begiratu isolamendua. Etxebizitza bat erosten baduzu edo zeurea eraberritzen baduzu, egiaztatu profesional baten laguntzaz tximinia ongi isolaturik dagoela eta kalitateko estandarrak betetzen dituela. Zure etxea eraberritzen baduzu, aprobetxatu isolamendua hobetzeko.
• Kontratatu profesionalak. Instalazioak araudiak beteko dituela bermatzen duten profesionalak kontratatu.

Zurak, erretzean, aerosolak jariatzen ditu, eta tximiniaren ebakuazio hodiaren edo tiroaren paretetan gelditzen dira. Bertan metatu, eta kreosota izeneko mundrunezko geruza bat sortzen da. Geruza horrek lodiera jakin bat hartzen badu, goritu eta erre egiten ahal da. Kreosota asko duen tximinia oso arriskutsua da, eta erraza da etxearen egituran su sorgune bat eragitea.

• Kedarra kendu aldian-aldian. Neguan tximinia egunero erabiltzen baduzu, kedarra urtero kendu behar duzu. Gutxiagotan erabiltzen baduzu –bigarren etxebizitza batean, adibidez–, bi edo hiru urtetik behin, gutxienez.
• Hobe da profesional batek egitea. Zeuk egin tximiniaren tiroaren ikuskapen errazak, baina garbiketa lanak profesional bati enkargatu. Altuerako lanak dira, eta segurtasun neurriak hartu behar dira. 

• Saihestu egur gainkargak. Behar den adina egur erabili, ez gehiago. Bero gehiegi emititzeak handitu egiten du tiroaren guneren batean sute sorguneren bat sortzeko arriskua.
• Egur lehorra eta gogorra: bero handiagoa, arrisku txikiagoa. Erabili egur lehorra eta gogorra (haritza, artea edo pagoa); kreosota gutxiago sortzen du, eta berotze-ahalmen handiagoa dute, egur hezeek –berdeek– edo bigunek (pinua, makala) baino.
• Sortu segurtasun gune bat tximiniaren ondoan. Ez ezarri suak hartzen ahal duen materialik tximiniako sutik bi metrora baino gutxiagora (altzariak, alfonbrak, arropa hezea...). Gogoan izan hobe dela tximiniak atea izatea, hala, gelak ez du su hartuko txinparten ondorioz. 
• Aireztatu gela etengabe. Gela une oro aireztatuta mantendu. Errekuntzak oxigenoa kontsumitzen du eta, gainera, tiroaren aire fluxua ez bada behar den bezalakoa, karbono monoxido maila igotzen ahal da, eta arriskutsua da hori.
• Ziurtatu sua guztiz itzalita dagoela. Begi bistakoa dirudien arren, funtsezkoa da sua guztiz itzaltzea. Ez joan lotara tximinia piztuta utzita. Bigarren etxebizitzetan, egiaztatu sua itzalita dagoela joan baino lehen.
• Instalatu su detektagailu bat. Ezarri su detektagailu bat toki egokian. Oso neurri ona da sute bat garaiz detektatzeko, eta horrek bizia salbatzen ahal dizu.