Nafarroako Gobernuak garapenerako nazioarteko lankidetzan esku hartzen du lau esku-hartze mota finantzatuta:

• Esku-hartze sozial eta ekonomikoak garapen bidean dauden herrialdeetan: biztanleriaren bizi-baldintzak hobetu nahi dituzte, denbora eta ekonomia arloko dimentsio ezberdineko jardueren bitartez; hau da, lehendik dagoen garapen-proiektu batean txertatzen diren mikroekintzetatik hasi eta jarraipen eta iraunkortasun handiagoko efektuak lortu nahi dituzten eta gauzatzeko urtebetetik gorako epea eskatzen duten programetaraino.
• Laguntza humanitarioa, hondamendi naturalek edo giza jatorriko gatazkek eragindako muga-egoerak artatzera bideratua; horren helburua da oinarrizko eta berehalako premiei erantzutea.
• Garapenerako eta sentsibilizaziorako hezkuntza-proiektuak: garapen bidean dauden herrialdeei eragiten dieten arazoekiko gizarteak duen pertzepzioa hobetzen laguntzen dute, elkartasuna, lankidetza aktiboa eta elkarren mendeko munduaren gainean kontzientzia kritikoa hartzea sustatzearekin batera.
• Gazte kooperanteak sentsibilizatzeko "Joan, parte hartu eta konta iezaguzu" programa: Nafarroako gazteen artean sentsibilizazioa eta elkartasunaren balioa sustatzen du, gazteek nazioarteko lankidetza-proiektuetan edo -programetan parte hartuz, edo lankidetzako ikastaro praktikoen bidez. Ikastaro horien funtsezko osagaia praktikoa da garapen-bidean dauden herrialdeetan.