Eskubide Sozialetako Departamentuak, "Tomás y Lydia Recari García" Fundazioarekin lankidetzan, Nafarroako Gizarte Zerbitzuetako Gizarte Berrikuntzaren II. Saria deitu du, gizarte-zerbitzuen kudeaketan eta prestazioan sormena sustatzeko. Erakunde irabazleak 6.000 euro jasoko ditu bere jarduera-programetako batera bideratzeko. Berritasun gisa, deialdi honetan 1.000 euroko saria aurreikusten da 2. eta 3. finalistentzat.

Eskubide Sozialetako kontseilari Mª Carmen Maeztu gaur goizean bildu da  “Tomás y Lydia Recari García” Fundazioko lehendakaria den Miguel Echarrirekin, gizarte-zerbitzuetako kalitatearen sariaren oinordekoa den sari honen II. edizioa aurkezteko. Aurreko sari hori 2019. urtera arte banatu da, baita ere Fundazio honen lankidetzarekin. Topaketan izan da, halaber, Errealitate Sozial eta Gizarte Politiken Plangintza eta Ebaluazioko Behatokiaren zuzendari nagusia, Luis Campos; unitateak urtero saria bultzatzen du.

Nafarroako Foru Komunitateko Gizarte Zerbitzuetako Gizarte Berrikuntzaren II. Sariaren helburua da irabazi asmoko edo irabazi asmorik gabeko erakunde publikoak eta pribatuak saritzea; hots, Nafarroako Foru Komunitateko Gizarte Zerbitzuen esparruan esku hartzen dutenak eta erronka sozialak berrikuntza eta gizarte-eraldaketako prozesu parte-hartzaileetan garatutako zerbitzu, produktu edo eredu berriekin landu dituztenak. Deialdiaren oinarriak jasotzen dituen laburpenaren bideoa egin da.

“Sariaren helburua da –adierazi du kontseilariak-  ikusgarritasuna ematea eta aurrekoak baino ideia berri eraginkorragoak, iraunkorragoak, bidezkoagoak edo eraldatzaileagoak sortzeko eta ezartzeko berrikuntza soziala integratu dute; era berean, kontuan hartuko da pertsonak haien garapenean duten inplikazioa, harreman berriak sortzea eta herritarrak ahalduntzea bultzatuz”.

Oinarri arautzaileak

Sarira aurkeztu nahi duten erakundeek arau erregulatzaileak kontsultatzeko, Errealitate Sozialaren Behatokiko web orrialdera jo dezakete eta proiektu bat aurkeztu dagokion inskripzio-inprimakian, uztailaren 18ra bitarte. Epaimahaiak, sariaren oinarriei erreparatuta, ondorengoak aintzat hartuko ditu: jorratzen duen erronka sozialaren garrantzia, prozesuaren parte-hartze eta ahalduntze maila, garatutako baliabidearen berritasun-maila, proiektuak gizartera ekarri duen egiturazko aldaketa eta hazteko edo etorkizunean errepikatzeko duen gaitasuna.

Erakunde irabazleak jasoko dituen 6.000 euroak eta Nafarroako Gobernuaren aintzatespen publikoa haren lana indartzeko, berrikuntza soziala hedatzeko, erakundearen proiekzioa bultzatzeko eta sortutako balio sozialaren publizitatea egiteko erabiliko dira.

Lehen edizioa 2020an egin zen, eta guztira 13 proposamen aurkeztu ziren. Irabazlea ikastetxeetan 6 eta 18 urte bitarteko adingabeen artean genero-indarkeria detektatzeko proiektua izan zen, Koine-Aequelistas Fundazioak egindakoa.