Unibertsitate, Berrikuntza eta Eraldaketa Digitaleko kontseilaria den Juan Cruz Cigudosa Luzaide eta Orreaga herrietara joan da gaur goizean, batetik, Luzaiden dituzten konektibitate-arazoak lantzeko, eta, bestetik, Orreagako agintarien iritzia jasotzeko, herriraino zuntz optikoa ekartzea errazteko herriko Udalak eta Nafarroako Gobernuak elkarrekin egin berri duten jardueraren inguruan. Bi bileratan izan da, halaber, Telekomunikazio eta Digitalizazioko zuzendari Nagusia, Guzmán Garmendia.

Luzaiden egindako bileran, honako hauek izan dira: alkatea eta Udaleko kudeatzailearen lehendakaria, Nicolas Camino; kudeatzailearen kidea eta Turismo, Hirigintza eta Kulturako zinegotzia, Salvador Bidegain; eta kudeatzailearen kidea eta Herri Lan, Osasun eta Gizarte Zerbitzuetako zinegotzia, Jose Antonio Castro. Bestalde, Orreagan egindako bileran, Luis Echeverria alkateak eta Bibiano Esparza prioreak hartu dute parte.

Luzaide eta bertako orografia

Luzaiden egindako bileran, batik bat bertako orografia dela-eta inguruan dituzten konektibitate-arazoak landu dituzte. Ildo horretan, kontseilariak azaldu die Foru Exekutiboak zuntz korporatiboa Ibañetan zehar eramateko aukera aztertzeko asmoa duela, nahiz eta onartu hori aukera “zaila” dela. Era berean, hainbat operadore pribaturekin akordio bat negoziatzen ari direla iragarri die. 

Horrez gain, zuntza Frantziatik ekartzeko aukera ere azaldu du; era horretan, zuzendari nagusia Akitaniako homologoarekin, Yann Pennec-ekin, hitz egiten ari omen da jada eta, baita, nazioarteko dimentsioa duten operadore pribatuekin ere, aukera hori ikertzearren.

Halaber, Cigudosak adierazi du “Udalarekin batera lan egin nahi dutela inguruko konektibitatea lantzeko, egoera geografiko berezia du-eta”. Horrela, “operadore pribatuekin hitz egiteko” jarrera agertu du, zuntza herrira iritsi dadin.

Orreaga eta zuntz optikoa ezartzeko lan egin berriak

Orreagan egindako bileran, zuzendariak agintarien eskutik jakin nahi izan du herriaren egoera nola aldatu den zuntz optikoa herrira iritsi berri den honetan, eta, era berean, operadore pribatuek sarea inguruko etxeetara eta saltokietara eramateko (“azken milia” bezala ezagutzen dena) egindako konexioa eta erabilera egiaztatu nahi izan ditu.

Orobat, Cigudosak jakin nahi izan du bertaratuek zer-nolako itxaropena duten konektibitateak Done Jakue Bidearen inguruko fluxua errazteko moduaren inguruan, Done Jakueren urte bete-betean. “Zuntza jartzea 5Gren lehen harria jartzea da, eta hori errealitate bilaka daiteke etorkizunean, erromes-kopuruarengatik eta kultur aldetik duen garrantziarengatik”, adierazi du Cigudosak. Orreagakoa, azpiegitura digitalak erabiliz, “lurralde-kohesioaren alde borrokatzeko moduaren adibidea” dela gehitu du.