Nafarroako Gobernuak Lesakako Udalarekin lankidetza hitzarmena sinatu du gaur herri hori Nasuvinsako Alokairuko Poltsara gehitu da etxebizitza hutsak errentamendura bideratzeko, eta hala Bortzirietako herri horretan dagoen alokairurako eskaerari erantzuna eman ahal izateko, Horretarako, Exekutiboak aholkularitza eta formazioa eskainiko die udal langileei erabilerarik gabeko etxeak atzeman eta zerbitzu hori nola eman gauzatzeko.

Hitzarmena gaur goizean seinatu dute José María Aierdi, Lurralde Antolamenduko, Etxebizitzako, Paisaiako eta Proiektu Estrategikoetako kontseilari eta bigarren lehendakariordeak eta Ladis Satrustegi, Lesakako alkateak. Gainera, ekitaldian izan dira Alberto Bayona, Nasuvinsako kudeatzailea eta Garazi Conde, Lesakako udaleko teknikaria.  

Lankidetza akordioak jasotzen duen moduan, Lesakako Udalak konpromisoa hartuko du Alokairuen Poltsa programari buruzko informazioa emateko bizilagunei, etxeak mugiarazi eta errentamenduko eskaerari erantzun ahal izateko. 

Abantailak eta bermeak

Nafarroako Gobernuak 2016an zabaldu zuen Alokairuen Poltsa programa Foru Komunitateko lurralde osora, ordura arte Iruñerriko eta Tuterako udalerrietan baino ez baitzen aritzen. Azken bost urteotan, Nafarroako hainbat eskualdetako hamabost bat udalek bat egin dute lan-poltsarekin, Foru Gobernuarekin lankidetzan aritzeko etxebizitza hutsen mobilizazio-politikan, babestutako alokairuaren eskaintza zabaltzeko eta, aldi berean, jabeei segurtasuna eta bermeak eskaintzeko.

Azpimarratzekoa da etxebizitza hutsak alokairu-poltsari atxikitzeak bermatzen duela jabeari errenta unean-unean kobratzea, etxebizitza mantentzea eta egoera onean itzultzea.

Gainera, azken lau urteotan programa hau suspertzeko eta gaur egun indarrean dagoen programa bultzatzeko sartu diren berrikuntza nagusien artean, honako hauek azpimarra daitezke: 1.500 euroko diru-laguntza aurreratua eta itzuli beharrik gabekoa ematea edo hiru hilekoren baliokidea, lortutako etekinen zerga-desgrabazioak, etxebizitzen jabeek jasotako errentaren gehikuntza (baita Nasuvinsak hilean 50 euro arte ordaintzen dituen komunitate-gastuak ere), bizigarritasuna hobetzeko kudeaketa sinplifikatzea (eraginkortasun energetikoa eta konponketak), etxebizitza alokairura egokitzeko birgaitze-gastuak interesik gabe finantzatzea (12.000 euro arte) edo energia-eraginkortasunaren ziurtagiria ematea sozietate publiko horren kontura, besteak beste.

Lesakarekin batera, Zarrakaztelu, Viana, Tafalla, Leitza, Lekunberri, Burgi, Oibar, Bera, Berriozarko, Burlata, Antsoain, Tutera, Barañain, Zangoza, Agoitz, Lizarra eta Baztan, Murelu Hautsi, Beriain eta Goizueta daude.

Nasuvinsak kudeatzen duen Alokairuen Poltsak %63ko igoera izan du azken bost urteetan, 800 etxebizitza ingururekin. Kokapen geografikoari dagokionez, hamar pisuetatik 8 baino gehiago Iruñerrian daude, zehazki 640 (%82), Erriberan 66 (%8), Lizarran 32 (%4) eta Pirinioetan 26 (%3).