Landa Garapenerako eta Ingurumeneko Departamentuak, Nekazaritza eta Abeltzaintzako Zuzendaritza Nagusiaren bitartez, 2019ko uztailaren 8an Erdialdean izandako ezohiko uholdeek eta euriteek eragindako kalteak konpontzeko dirulaguntza guztien ordainketa burutu du.

Joan den astean sinatutako zenbait ebazpenen bidez, 1.822.000 euro ordainduko dira, diruz lagundutako obra guztiak egin ondoren. Zenbatekorik handiena Erdiguneko 21 toki entitateri ordainduko zaie, beren titulartasuneko nekazaritza-azpiegiturak konpontzeko eta ziurtatutako diru-laguntza, guztira, 1,2 milioikoa da. Hain zuzen ere, San Martin Unx, Tafalla, Leoz eta Pueyo, Ibargoiti eta Lerga dira aparteko laguntzen kapitulu honetarako zenbateko handienak dituzten udalak.

Bigarren laguntza-lerroa azpiegitura pribatuetako nekazaritza- eta abeltzaintza-ustiategietan kaltetutako elementuei eragindako kalteetarako da. Guztira 338.088 euro ordainduko dira, eragindako eremuko 38 onuradunen artean banatuta eta gehienez ere 20.000 euro emanez.

Hirugarren ebazpenak baimena ematen du uholdeek eragindako ureztatzaileen komunitateetako nekazaritzako azpiegiturak konpontzeko gastuetarako diru-laguntzak ordaintzeko. Guztira, 118.127 euro dira eta onuradunak Tafallako ureztatzaile-erkidegoak eta Acequia Molinar ureztatzaile-erkidegoak dira. Kapitulu honetan, beste bi diru-laguntza gehitu zaizkie Pitillasko Ureztatzaileen Elkarteari (19.774 euro) eta Acequia Bayungari (74.000 euro).

Inbertsioak gauzatu ondoren ordaindu dira

Laguntza mota horiek ordaintzeko ebazpen-datak ohiko epeen barruan sartzen dira; izan ere, exekuzioak amaitu berri den urtean egin eta osatu dira eta izapidetzeak barne hartu behar izan du emandako eskabide bakoitzaren eta obra bakoitzaren exekuzioaren berrikuspena, laguntzak ordaindu aurretik.

Jakina denez, mota horretako laguntzak Europako edo Estatuko laguntzen osagarriak eta subsidiarioak dira beti, hitzez hitz, “izenpetutako aseguru-polizen konpentsazioen osagarriak eta subsidiarioak, bai eta Estatuan edo Europar Batasunean antzeko egoeretarako egon daitezkeen beste laguntza batzuenak ere, eta, bereziki, Estatuko Gobernuak ezartzen dituenenak.”

Zehaztutako laguntza guztietan, Sailak zenbatekoaren %100 emango du, toki entitateei dagozkienetan izan ezik, horietan jakinarazitako kalteen %50 jartzen baitu.