Nafarroako Gobernuko  Lurralde Antolamenduko, Etxebizitzako, Paisaiako eta Proiektu Estrategikoetako  Departamentuak alokairuaren eskaintza publikoa handitu du, Nasuvinsak Ardoin (Zizur Nagusia) amaitutako babes ofizialeko 34 etxebizitza berri esleituta. Alokairuko lehen sustapen publikoa da, eta energia ez-fosilak soilik erabiltzen ditu berokuntzako eta ur beroko sistema martxan jartzeko

Etxebizitza berri horiek gehitu zaizkie 2019an Mutiloan (Aranguren) emandako 42ri eta datorren urtearen hasiera aldera Erripagainan esleituko diren beste 62 etxebizitzari.

Sustapen horiek Nafarroako Social Housing Planean kokatzen dira, eta Foru Gobernuak bultzatzen duen eredu berriari erantzuten diote. Eredu horren bidez, alokairuko parke publiko eskuragarria handitu nahi da erabat publikoa den sustapen eta kudeaketatik eta berrikuntza arkitektoniko handiko eta energia-eraginkortasuneko eraikinetan, Passivhaus estandarretan.

Datozen hilabeteetan, jada gauzatzen arituko dira 350 etxebizitza, Nafarroako Social Housing Planaren %90a baino gehiago osatu arte, eta 100 milioi euro inguruko inbertsio orokorrarekin. Zenbateko hori Inbertsioen Europako Bankuko (IEB) funtsekin, Nafarroako Gobernuaren diru-laguntzekin eta Nasuvinsa sozietate publikoaren finantza-baliabide propioekin finantzatuko da.

Bigarren lehendakariorde eta Nafarroako Gobernuko Etxebizitzako titularra den José Mª Aierdik Ardoin amaitutako 34 etxebizitza ikuskatu ditu gaur, Euskal Herriko Arkitektoen Elkargo Ofizialeko (EHAEO) dekano Patxi Chocarrorekin eta Nafarroan duen delegazioaren lehendakaria den Josecho Velazekin batera. Han izan dira, baita ere, Zizur Nagusiko alkatea, Jon Gondán; Nasuvinsako zuzendari kudeatzailea, Alberto Bayona; eta proiektuaren talde teknikoko arkitektoa, María Hurtado.

Lurraldearen Antolamenduko, Etxebizitzako, Paisaiako eta Proiektu Estrategikoetako Departamentuaren eta EHAEOren arteko lankidetza-konpromisoa dela-eta egin da bisita, Foru Komunitatean eraikuntza iraunkorra eta kalitate arkitektoniko eta energia-eraginkortasun handikoa bultzatu nahi baitute, ekimen publiko nahiz pribatuko eraikuntza berriaren sustapenean.

Erregai fosilik gabe

Aierdi lehendakariordeak honela adierazi du: “Ardoiko sustapen berriarekin beste urrats bat eman dugu Green Deal Europe / Europako Itun Berdearen klima eta ingurumen arloko erronkak betetzerakoan, berogailu-sistemaren funtzionamendurako eta etxeko ur beroaren hornidurarako soilik energia berde ez fosilak erabiltzen dituen alokairuko lehen sustapen publiko bilakatzean”.

“Basoko biomasaren galdarak alokairuko etxebizitza publiko berri guztiak bereizten jarraitzen du, energiaren iturri nagusi gisa, baina, oraingoan, elementu berritzaile gisa, aerotermia gehitu dugu, berokuntzako ekipo osagarria elikatzeko, mantentze-lanen bidezko geldialdi puntualetan edota matxurak gertatzen direnean. Era horretan, erregai fosilak erabat alde batera utzi ahal izango ditugu eta, horrela, atmosferara berotegi-efektuko gasen emisioa murrizten lagunduko dugu”, azaldu du José Mª Aierdik.

Lehendakariordeak iragarri du, Navarra Social Housing bidez etxe pasiboaren eredua finkatu ondoren, “sustapen publikorako erronka berria etxebizitza positiboa izango dela, kalitatea eta energia-eraginkortasun handia eskaintzeaz gain, funtzionamendurako kontsumitzen duena baino energia gehiago ekoiztuko duena, berogailua biomasa galdara bidez hornitzeko, etxeko ura berotzeko edota eraikina hozteko”.

Bestalde, EHAEOko dekanoa den Patxi Chocarrok enpresen eta administrazio publikoen arteko lankidetzak duen garrantzia aipatu du, kasu honetan Nasuvinsaren eta Arkitektoen Elkargoaren (EHAEO) artekoa. “Lankidetza honek Nasuvinsa garatzen ari den etxebizitzen sustapenen kalitate handia azpimarratzen du, proiektu onenak, eta, beraz, eraginkorrenak, egiteak duen garrantzia indartzearekin batera. Arkitektoen Elkargoaren eta Nasuvinsaren arteko lankidetzaren emaitzak oihartzuna izaten ari dira sektorean Espainia osoan, jarraitu beharreko eredu gisa”, adierazi du EHAEOko dekanoak. 

5 milioi euroko inbertsioa

Ardoiko proiektua idazteko eta egikaritzeko Nasuvinsa sozietate publikoak guztira 5.111.800 euroko inbertsioa egin du.

Murias Ibañez Aldi Baterako Enpresa Elkarteak burutu ditu proiektuaren obrak; proiektua Víctor Esparza Lafuente (obra-zuzendaritza) eta Fernando Vas Talamas arkitektoek idatzi dute; instalazioen zatiaz, aldiz, Naven Ingenieros, SL enpresako Jose María Moro Aristu arduratu da.

Era berean, obrako lanen zuzendaritza-lanak Iker Louzao Arsuaga eta José Ramón Sampayo arkitekto teknikoek egin dituzte, eta Ricardo Usar Ganuza, Nasuvinsako arkitekto teknikoa, berriz, ikuskapen teknikoaz arduratu da.

2, 3 eta 4 logela

Ardoin egindako 34 BOE berri jada esleitu ditu Nasuvinsa sozietate publikoak Errolda Bakarraren bitartez, eta giltzak azaroan zehar emango zaizkie maizterrei.

Belaskoaingo etorbidearen alde banatan kokatutako bi bizitoki-bloke dira; zehazki, aipatu etorbideko 46. zenbakian eta Euntzeluzea kaleko 2. zenbakian, bakoitza 16 eta 18 etxebizitzakoa, hurrenez hurren.

Bi eraikinak energia-eraginkortasunaren Passivhaus estandarren arabera eraiki dira, eta sotoetan garajeko plazak, trastelekuak eta instalazio orokorren gelak dituzte.

Belaskoaingo etorbideko blokeak behe solairua eta hiru altuera ditu, solairu bakoitzeko lau etxebizitza, eta Euntzeluzea kaleko blokeak laugarren solairu bat du, bi etxebizitza eta terrazekin. Behe solairuko pisu guztiek ere terraza bat dute.

32 etxebizitza hiru logelakoak dira, eta 82 eta 89 metro karratuko azalera erabilgarria dute; beste bi, aldiz, 2 eta 4 logelakoak dira, 72 eta 103 metro karratuko azalera erabilgarriarekin, hurrenez hurren.

Denek bi bainugela dituzte, logela bateko etxebizitzak izan ezik, eta sukalde eta egongela independenteak, baina ate gidaridunarekin konektatuta.

Zoru bero-emailea

Bi eraikinak Kontsumo Ia Nuluko Eraikuntzaren (KINE) Europako zuzentarauaren arabera diseinatu dira, eta eraikitzeko Passivhaus estandarrak jarraitu dira, nazioartean energia-eraginkortasun handiko ziurtagiririk zorrotzenetarikoa, Nasuvinsak eraikuntza berriko sustapen guztietan aplikatzen duena.

Fatxada aireztatua eta harkaitzezko artilezko inguratzaile termikoa dituzte; baita isolamendu termikoko plaka bereziak ere estalkian eta beheko solairuetan. Arotzeria PVCkoa da, beira hirukoitzekoarekin, eta etxebizitza bakoitzak aireztapen mekanikoko sistema kontrolatua du, beroa berreskuratzeko aukerarekin.

Sotoko solairuan biomasa galdara aurkitzen da, bertako egur-ezpalak erretzeko, berokuntza-sistemaren energia-iturri nagusi gisa eta etxeko ur beroa ekoizteko. Ezpalak kaletik deskargatzen dira, hornidura errazteko zehazki diseinatutako bi ahoren bitartez. Biltegia galdararekin konektatuta dago, erregai natural horren hornidura automatizatzeko aukera ematen duen amaigabe baten bidez.