Nafar Lansarek- Nafarroako Enplegu Zerbitzuak (SNE-NL), Nafarroako Ikus-entzunezko Klusterrarekin (CLAVNA) lankidetzan, zinema eta telebistako argazkilaritza, produkzio, arte eta postprodukzioko lau ikastaro trinkotan izena emateko epea ireki du.

Azaroaren 9an hasiko dira, 40 plaza daude eskuragarri eta profesionalei zuzenduta daude, batez ere arte eszenikoen eta kulturalen sektoreetako espezialistei, beren profila ikus-entzunezko esparru horietara birbideratu nahi dutenei. Pandemiak gogor zigortu dituen teknikari horiek Nafarroan egingo diren hurrengo ekoizpenetan parte hartu ahal izatea da helburua.

Gainera, azpimarratzekoa da ikastaroak nazioko eta nazioarteko adituek ematen dituztela. "Sektorearen eskaerei arin erantzuteaz eta pandemiak jota dagoen kolektibo bat egokitzeaz gain, sinesgarritasuna handitu nahi dugu Nafarroan instalatzen diren ekoiztetxeen aurrean, kalitate goreneko prestakuntza emanez", adierazi du Mirian Marton SNE-NL-ko gerenteak prentsaurrekoan.

Gerentearekin batera, Arturo Cisneros Clavna-ko gerentea eta Txuma Huarte ATEN Nafarroako Ikuskizuneko Langileen Elkarteko gerentea izan dira. “Profesionalak behar ditugu Nafarroan gero eta handiagoa den ikus-entzunezko industriaren aurrean eta gaitasun zehatzak eman nahi dizkiegu hainbat kultura-industriatako (antzerkia, zuzeneko musika, dantza, zirkoa, horietako asko ATEN-en inguruan bildutakoak) soinu-, argiztapen-, ekoizpen-, errejidore- eta abarren arloko teknikariei”, gaineratu du Cisnerosek.

Izen-ematea Nafarroako Enplegu Zerbitzuaren webgunean dagoen Prestakuntza atalaren bidez egin daiteke. Ikastaroak azaroaren 9an hasiko dira eta CTL Irudi eta Soinu Eskola prestakuntza-zentro baimenduan emango dira (Marcelo Celayeta etorbidea 75). Nafarroako Zinematografia Ekoizpen Zentroak (CNPC) ere parte hartzen du ekimenean.

Lau ikastaroak

Alfredo Mayo argazki zuzendaria izango da irakaslea 80 orduko Zinemarako Argazki Ikastaroan. Bere ibilbide luzean, Berlanga, Saura, Montxo Armendariz eta Almodovar bezalako espainiar zuzendariekin lan egin du eta bere lorpenen artean, Argazki Onenaren Goya saria dago "Alouren gutunak" lanagatik (1990).

“Filmazioko ekoizpen-ekipoak” ikastaroa, 60 ordukoa, Josean Gomezek emango du. Josean Gomez estatuko ekoizpen-zuzendari garrantzitsua da eta bi izendapen ditu Goya Sarietako Produkzio Zuzendaritza Onenaren atalean “Boca a boca” (1995) eta “El misterio Galíndez” (2003) luzemetraiengatik.

Mamen Hernández nafarra izango da 66,5 orduko “Arte Departamentua, urratsez urrats. Zinema, TB eta Publizitatea” ikastaroaren irakasle titularra. Hernandez-ek esperientzia zabala du. Bere proiektu berrienen artean, Isabel Coixeten “Nieva en Benidorm” (2020) eta Nacho Álvarezek zuzendutako “Explota, Explota” (2020) luzemetraietan egindako lana azpimarratu dezakegu ( biak gaur egun karteldegian).

Gabriel Sitjas ikus-efektuen konpositoreak (Digital Compositor) 80 orduko “Postprodukzio digitala eta VFX” ikastaroa emango du. Nuke softwarean aditua izanik, nazioarteko estudio handiek kontratatu dute eta besteak beste, “Batman: the Darknight” (2008), “Captain America: The first avenger” (2011) eta “Lo Imposible” (2012) filmetan egin du lan.

Hurrengo errodajeak

Profesionalen beharrari,  Nafarroa lokalizazio gisa aukeratzen duten filmazioen hazkundeak eragindako eskaera gehitu behar zaio. Datorren azaroaren 2an hasiko da Tornasol eta Bowfingerr-ek ekoitzitako eta Imanol Uribe zuzendari euskaldunak zuzendutako filmaren filmazioa. Hogeita hamar bat profesional nafar ditu plantillan eta Espainiako hainbat ekoiztetxe lanean ari dira gure lurraldean 2021erako egingo dituzten filmaketetan.

Ikus-entzunezko edukien ekoizpena trakzio-industria bat da Nafarroako ekonomiaren motore gisa identifikatutako beste sormen- eta kultura-industria batzuentzat. Gainera, kalkulatzen da ekoizpen zinematografiko baten gastuen % 40 baino gehiago beste diziplina sortzaile batzuetan islatzen dela, hala nola musikan, interpretazioan, literaturan, marrazketan, argazkigintzan edo diseinu grafikoan.

Ikus-entzunezko edukien ekoizpen-sektoreak profesionalak eskatzen jarraitzen du, sektoreak Espainian eta, neurri txikiagoan, baita Nafarroan ere erakusten dituen hazkunde-indize handiei aurre egin ahal izateko. Izan ere, profesional horien presentzia pizgarria da zergen eta sektoreen aldetik, kulturaren eta sorkuntzaren industria ekonomiaren bultzatzailetzat jotzen baita.

Enpleguaren egoera Nafarroan

Nafarroan, sorkuntza-, arte- eta ikuskizun-jardueren sektore ekonomikoan, hobeto eusten dio zinemarekin eta telebistarekin lotutako enpleguari, kultura- eta arte-jardueren aldean; langileak kontratatzen dira eta, oro har, enplegua kalitate hobekoa da.

Otsailetik aurrera, jarduera-arlo horretako langabezia %50 hazi da, nahiz eta ikus-entzunezkoen, zinemaren, bideoaren eta telebistaren sektorean langabezia %15era igo den. Izan ere, aurten % 2,7 handitu da azpisektore horretako kontratazioa; ikuskizunen sorreran, berriz, % 71 murriztu da.

Sektorean langabezian dagoen profesionalaren profila gizonezkoa da, nazionalitate espainiarrekoa, goi-mailako ikasketekin eta aldizkako kontratazioak dituena; beraz, iraupen luzeko langabezia ez da %50era iristen.