Nafarroako Gobernuak eta Iruñerriko Mankomunitateak aste honetatik aurrera autobus-zerbitzua puntako orduetan indartzea adostu dute, batez ere 7: 00etatik 8: 00etara eta 14: 00etatik 15: 00etara, COVID-19aren aurrean, eskari handiena duten lineetan okupazio-baldintzak eta erabiltzaileen osasun publikoaren prebentzioa eta babesa bermatzeko.

Modu horretan, aipatu orduetan jarritako autobusak 8 izatetik 14 izatera igaroko dira, eta, beraz, eskari handieneko lineetan dauden ibilgailu guztiak erabiliko dira.

Iazko urtearen amaiera aldera sartutako berrikuntza teknologikoari esker, pertsonak zenbatzeko sentsoreen bidez hiribildu bakoitzeko okupazioaren segimendua egin daiteke. Modu horretan, badakigu geltoki bakoitzean zenbat pertsona igotzen diren, zenbat jaisten diren, eta, ondorioz, espedizioaren zati ezberdinetan zenbatek egiten duten bidaia. Horrela, indartzeko autobusen kudeaketa egin daiteke denbora errealean.

Nafarroako Gobernuko Osasun eta Garraioko zuzendari nagusiek, Carlos Artundok eta Berta Mirandak, hurrenez hurren, eta Osasun Departamentuko idazkari orokor teknikoa den Pilar Garciak bilera egin dute Iruñerriko Mankomunitateko Garraio Saileko zuzendaria den Jesus Velascorekin, Eskualdeko Hiri Garraioaren egoera aztertze aldera, puntako orduetan linea batzuetan okupazio handia objektibatu ondoren.

Garraio segurua

Bi erakundeek adierazi dute “azterketa desberdinen arabera garraio publikoa bitarteko segurua dela birusaren transmisioaren aurrean”. Eta emandako arrazoien artean, honako hauek aurkitzen dira: gidariak eta bidaiari guztiek maskara erabiltzea, autobusak etengabe aireztatzea (geltoki bakoitzean ateak irekita eta airea etengabe berritzen duen klimatizazioarekin), ibilgailuen barruan bidaiatzeko denbora mugatua izatea (Iruñerriko Hiri Garraioaren kasuan, autobusen barruan batez beste 20 minutu igarotzen dira), edota autobusetan burutzen diren kontrol- eta desinfekzio-neurriak.

Gogoratu behar da gel hidroalkoholikoen banagailuak jarri direla ibilgailu horietan. Zehazki, banagailu bat jarri da autobus zurrun bakoitzean eta bi autobus artikulatu bakoitzean, ibilgailuaren sarreran eta irteeran. Grabazio baten bidez megafoniaz gogoraraziko da hura erabili behar dela, gainerako prebentzio-neurriak adierazteaz gain. Gainera, zerbitzuaren enpresa emakidadunak, Transports Ciutat Comtal Pamplona enpresak, instalazioak eta TUC ibilgailuen flota higienizatzeko eta kontrolatzeko protokoloen akreditazioa jaso du uda honetan; hots, herrialdean emandako lehenengoetariko bat.

Iruñerriko Mankomunitateak 148 autobusek osatutako flota du, eta horiei uda honetatik aurrera abian diren beste 10 ibilgailu batu behar zaizkie.

Irailaren 1az geroztik, hiri barruko garraio-zerbitzuaren ia %100 berrezarri da lanegunetan, nahiz eta eskaria iazko garai honetakoaren %70etik behera egon.