Gaurko bilkuran harturiko akordio baten bidez, Nafarroako Gobernuak premiazkotzat jo du, nahitaezko desjabetzeari dagokionez, Ujué / Uxuen araztegi bat eraikitzeak eragiten dien ondasun eta eskubideen okupazioa. Instalazio berriaren bidez herriak arazte-sistema biologikoa izanen du, eta ura tratatzeko ahalmena handituz herria hazteko planei atea irekiko zaie. Gaur-gaurkoz, hondakin-urak tratatzeko hiru hobi septiko ditu Uxuek.

Lurralde Kohesiorako Departamentuaren menpekoa den eta ur-saneamenduaren eta arazketaren ardura duen NILSA enpresa publikoak garatu duen proiektua lizitazio-aldiaren bukaeran dago, eta aurreikusten da 923.750 euroko kostua izanen duela, saneamendu-kanonaren bidez finantzatuko dena.

Araztegia herriaren hegoaldean egonen da, eta ekialde eta mendebaldeko isurketak instalazio horretaraino eramanen dituzten bi hustubide eraiki beharko dira. Bakterio-geruzan oinarrituriko arazketa-sistema eta azken kontrolerako hezegune bat izanen ditu araztegiak. Trataturiko urak hustubide batetik eramanen dira Aitzandietako sakaneraino.

Eraikuntzari ekin aitzin, NILSAk eta Mairagako Mankomunitateak hilabete honetan burutu dituzte saneamendu-sareak berritzeko lanak, hurrenez hurren 

48.000 eta 226.000 euroko ekarpenak eginik.

Aipatzekoa da Uxue, 182 biztanleko herria, Erdialdeko turismo-gune bat dela, eta ostalaritza-, turismo- eta kultur jarduera aipagarriak dituela. Udala kanpin bat edo oporretarako gune bat sortzeko aukera aztertzen ari da, eta beraz, etorkizunean biztanle-kopurua handitzeko asmoa dago. Hartara, hobi septikoak oinarri dituen arazketa-sistema ez litzateke nahikoa.  

Instalazio berriak segundoko 1,1 litroko emaria tratatuko du batez beste, eta gehienezko ahalmena 7,74 litrokoa izanen du. Euri-jasa handiek edo ekaitzek eraginiko uholdeak izatekotan emaria segundoko 2,65 litrokoa izanen dela aurreikusten da; ondorioz, tartea dago araztegiak ur-kopuru handiagoak jasotzen ahal izateko.