Nafarroako Gobernuak udalei 25 milioi euro ematea proposatu du urtea amaitu baino lehen, COVID-19ko epidemiak eragindako beharrei aurre egin ahal izateko. Horietatik, 15,5 milioi euro udalerri eta kontzeju guztien jarduera ekonomiko eta soziala suspertzeko erabiliko lirateke, eta beste 9,5 milioi euro, berriz, Foru Komunitateko udal guztiak COVID-19 a dela-eta jasaten ari diren gastu eta diru-sarrera txikiagoak arintzeko, bereziki, haur-eskolei eta musika-eskolei, kirol-zerbitzuei, aparkalekuei, zaharren egoitzei, eguneko zentroei eta hiri-garraioari dagokienez.

Helburu hori aintzat hartuta, Foru Exekutiboak, gaurko bileran,  Foru Lege proiektua onartu du, eta, horren bitartez, 25 milioi euroko ezohiko kreditua proposatzen da COVID-19ak eraginda toki-erakundeek hartu behar izan dituzten ezohiko eta premiazko neurrien ondorioz sortutako premiak estaltzeko. Aurrez, testuak Toki Araubidearen Foru Batzordearen oniritzia jaso du, eta, ondoren, Nafarroako Parlamentura bidaliko da, erabakia har dezan.

Lurralde Kohesioko kontseilaria den Bernardo Cirizak gaur ezagutzera eman du funts hori banatzeko proposamena. Cirizak ondorengoa nabarmendu du: “25 milioiko funts honek, batetik, toki-erakundeei aukera emango die COVID-19ak eragindako gastu handiagoak eta diru-sarrera txikiagoak konpentsatzeko, eta, bestetik, injekzio ekonomiko garrantzitsua izango da, Nafarroa Suspertzeko Planaren esparruan, aurrera egin ahal izango baitute azpiegiturak eta zerbitzu publikoak hobetzen nahiz gure herri eta hirien suspertze ekonomikoa eta soziala bultzatzen”.

Gogoratu behar da ezohiko funts hau Toki Ogasunen Partaidetza Funtsari atxikitako diruzaintzako soberakinaren kontura finantzatuko dela.

15,5 milioi udalerrien suspertze ekonomiko eta sozialerako

Tokiko ekonomia bultzatzeko helburuarekin, Foru Exekutiboak proposatu du 13,5 milioi euro bideratzea toki-erakundeek honako hauetan inbertsioak egin ditzaten: energia-eraginkortasuna, hiriko mugikortasun iraunkorra, udal eraikinak egokitzea, banda zabaleko konektibitatea eta eraginkortasuna uraren erabileran. Udal-azpiegiturak eta -zerbitzuak hobetzea lortzeaz gain, inbertsio horiek bat datoz Klimaren eta Energiaren aldeko Alkatetzen Itunarekin eta 2030erako Garapen Iraunkorreko Helburuekin, eta tokiko sektoreak klima-aldaketaren aurkako borrokan eta gure herri eta hirietan isurpenak murrizten laguntzen du.

Gainera, nabarmendu behar da inbertsio horietan udalerri onuradunari gutxienez %15eko baterako finantzaketa egitea eskatzen zaiola; horrela, horrek efektu biderkatzailea izango du tokiko ekonomietan.

Inbertsio horiek gauzatzeko epea 2021eko martxoaren 14tik irailaren 30era bitartekoa izango da.

Era berean, milioi bat euro jasotzen dira proiektuan, tokiko jarduera ekonomikoaren funtsezko sektoreei eusten laguntzeko; hala nola, merkataritza, turismoa eta ostalaritza, bereziki kaltetuak izan baitira alarma-egoeraren ondorioz jarduerak eteteagatik. Modu berean, beste milioi bat euro erabiliko dira lana, bizitza pertsonala eta familia uztartzera bideratutako udal-jarduerak egitea sustatzeko.

15,5 milioi euro udalerrika banatzeko irizpide gisa, biztanle-kopurua hartuko da batik bat.

9,5 milioi euro COVID-19aren inpaktu negatiboa arintzeko

Nafarroako Gobernuak ezohiko funtsaren beste 9,5 milioi euro erabiliko ditu COVID-19aren ondorioz 2020ko ekitaldiko udal-aurrekontuetan sortutako inpaktu negatiboa arintzeko. Modu horretan, epidemiak bereziki kaltetutako funtsezko zerbitzu publikoei eustea bermatu nahi da. 9,5 milioi euro horietatik, 1,5 milioi 0-3 urteko haur-eskoletan sortutako defizitak arintzeko bideratuko dira; 200.000 euro musika-eskoletarako; 3,1 milioi kirol-zerbitzuetarako; 500.000 euro hirugarren adinekoen egoitza eta eguneko zentroetarako; 600.000 euro aparkalekuetarako; milioi 1 euro bidaiarien hiriko garraiorako; eta 2,6 milioi toki-erakundeek gastu handiagoei eta diru-sarrera txikiagoei aurre egiteko.

Udalerri bakoitzeko inpaktu-indizea kalkulatzeko, bederatzi aldagai hartuko dira kontuan: udalerri eta kontzejuetako biztanleria, familiek 0-3 urteko zentroetarako duten ekarpenaren aurreikuspena, musikako udal-eskoletako matrikulazioa, udal-jabetzako kirol-instalazioak, adinekoen egoitzetako eta eguneko zentroetako plazak (udal-titulartasunekoak), COVID-19aren kutsatze-kopurua udal-titulartasuneko adinekoen egoitzetan, adinekoen egoitzak eta eguneko zentroak (Udalarenak) kudeatzeko eredua eta aparkatzeko plaza arautuak.