Nafarroako Lehendakari María Chivitek gaur arratsaldean jakinarazi du Foru Komunitateko ikastetxe guztien hezkuntza-jarduera bertan behera utziko dela COVID-19a dela eta, haur-eskoletatik hasi eta unibertsitateetaraino, Nafarroako Gobernuak hala dekretatuta, gutxienez bi astez, datorren astelehenetik aurrera (martxoak 16), nahiz eta bihartik aurrera (martxoak 13, ostirala) gomendatzen den.

María Chivitek, halaber, presentziazko prestakuntza etengo dela aipatu du, enplegurako lanbide heziketa, bai eta autonomoentzako, ekintzaileentzako eta gizarte ekonomiako entitateentzako prestakuntza ere ematen duten entitate publiko edo pribatu guztietan.

Eta aurreratu du bertan behera uzten direla espazio itxietan egiten diren jarduera kolektiboak, 1.000 lagun baino gehiagokoak badira. 1.000 pertsona baino gutxiagokoetan, heren batera mugatu da edukiera.

Neurri berriak iragarri ondoren, Lehendakariak adierazi du "badakidala, eta Gobernu osoak ere bai, ohiz kanpoko egoera baten aurrean gaudela, gure historia hurbilean ezezaguna, administrazio gisa ahalegin bat eskatzen diguna, baina herritar guztiei ere ahalegin berezia eskatzen diena bai neurriak bai gomendioak betetzeko. Osasunaz ari garenean, ardura handiz jokatu behar dugu, eta jakin behar dugu osasun publikoa nafar bakoitzari dagokigula". Ildo horretatik, esan du "badakit kostako zaigula egoerara egokitzea, baina une bakoitzean behar bezala jokatu behar dugu".

Horregatik, "konpromisoa eta pazientzia" eskatu ditu, eta nafar guztiei jakinarazi nahi izan die "hartuko ditugun neurri guztiak osasuna bezalako ondasun preziatu batean pentsatuz hartuko ditugula, eta, jakina, gure ekonomiari eta ekoizpen-sektoreei irtenbideak emanez, neurri horiek ez ezik, Europan eta munduan hartzen diren neurriek ere izan dezaketen eragina arintzeko". Ildo horretatik, adierazi du egoerari aurre egiteko neurriak hiru mailatan hartuko dituela Nafarroako Gobernuak: osasuna, gizartea eta ekonomia.

Bestalde, gomendio batzuk eman ditu María Chivitek. Zehazki, honako hauek: enpresei, telelana egiteko, eta familia eta lana uztartzeko ordutegi-malgutasuna emateko; pertsona guztiei, behar-beharrezkotzat jotzen ez diren bidaiak ekiditeko; eta adinekoei edo gaixotasun kronikoak dituztenei, beren etxea edo egoitza uztea ekiditeko.

(Albiste honi buruz gehiago jakin nahi baduzu, mesedez kontsulta ezazu gaztelaniazko bertsioa. Goiko nabigazio barra gorrian alda dezakezu hizkuntza).