Leitzako, Goizuetako, Aresoko eta Aranoko Oinarrizko Gizarte Zerbitzuen Mankomunitateak Gizarte Zerbitzuen Kalitatearen XII. Saria jaso du, duen esperientzia praktiko egokiarengatik: “Nafarroako Bhutantxo. Zaintzeen herria” proiektua “Butango bizi-filosofian” oinarritzen da; hau da, Tibet eta India artean kokatutako herrialdean, eta, 2016az geroztik, Goizueta eta Arano herrietan garatzen da. Proiektuaren helburua da zonako bizilagunen arteko tratu ona bultzatzea eta pertsonen arteko harremanak indartzea.

Eskubide Sozialetako kontseilari María Carmen Maeztuk eta Tomas y Lidia Recari Garcia Fundazioko lehendakariorde Miguel Echarrik saria eman diote erakundeari Nafarroako Jauregiko Tronuen Aretoan egindako ekitaldian.

Sari horien helburua da Nafarroako gizarte-zerbitzuen erakundeek garatzen dituzten jardunbide egokiak saritzea, erabiltzaileen arretari, langileen enpleguaren kalitateari nahiz erakundeen kudeaketa hobetzeari dagokienean.

María Carmen Maeztu kontseilariak sariak emateko ekitaldian honela nabarmendu du: “sari hau zerbitzuak hobetzen lanean jarraitzeko pizgarria da eta jardunbide egokiak ezarri dituzten erakundeek burututako jarduerak saritzeko modua”.

Horrez gain, Tomás y Lidia Recari García Fundazioari eskerrak eman dizkio urtetik urtera sarietan egiten duen lankidetzarengatik eta, baita ere, gainerako erakundeei aurtengo edizioan ere parte hartzeagatik, lankidetza-ildo horretan lanean jarraitzearren.

Bestalde, Miguel Echarrik, erakunde saritua zoriontzeaz gain, honako hau nabarmendu du: “erakundeetan kalitatearen kultura sustatzea ez da ekintza isolatua, prozesua baizik. Eta zuen jarduera sozialetan etengabe lantzen dituzuen jardunbide egokiei esker, benetan laguntzen duzue gure gizartea hobetzen”.

Erakunde sarituaren izenean saria Goizuetako alkate Unai Mirandak, Goizuetako Udaleko zinegotzi Maialen Apezetxeak, eta Leitzako zinegotziak diren Maialen Morenok eta Saioa Sagastibeltzak jaso dute.

Halaber, ekitaldian izan dira Babes Sozialaren eta Garapenerako Lankidetzaren zuzendari nagusia, Andrés Carbonero eta Sariaren epaimahaiko kideak: Errealitate Soziala, Politika Sozialen Plangintza eta Ebaluazioaren Behatokiko zuzendari nagusia, Luis Campos; Pertsonen Autonomiarako eta Garapenerako Nafarroako Agentziaren zuzendari kudeatzailea, Inés Francés; ATENA Fundazioaren kudeatzailea, Arantxa Garatea; eta AENOR Navarraren zuzendaria, Emilio Flamarique.

Erakunde sarituaren proiektua

Leitzako, Goizuetako, Aresoko eta Arellanoko Oinarrizko Gizarte Zerbitzuen Mankomunitate sarituaren “Nafarroako Bhutantxo. Zaintzeen herria” Butan proiektuaren helburua da ingurunean bizi diren pertsonen arteko harremanak estutzea haiek sentitutako eta adierazitako premien bitartez. “Gizarte-zerbitzuek beti proposatzen dute helburu hori, baina, aldi berean, zaila da lantzea”, azpimarratu du Maeztu kontseilariak. Gainera, “Epaimahaiak proiektuaren potentzialtasuna aintzat hartu du, duen izaera berritzaile, berezi eta orijinalarengatik, eta hori Nafarroako beste herri batzuetara ere eraman daiteke: belaunaldi artekoa eta diziplina anitzekoa izatearekin batera, pertsonak eta komunitatea bera ahaldundu egiten ditu, eta autogobernantzaren ildoan lan egiten du”, gehitu du.

Halaber, Maeztuk azaldu du esperientzia honek hiru programa dituela oinarri eta horien baitan garatzen dela: haurren, gazteen eta familien programa; emakumeen eta gizonen arteko berdintasuna sustatzea; eta prebentzioa. Erakundeak programa horien barnean honako jarduera hauek burutu ditu: tratu onak babesteko sarea abian jartzea, familiaren barruan izan daitezkeen arazoak edo premiak garaiz identifikatzearren, bereziki 0-3 urteko etapari erreparatuta; uztartzea eta erantzunkidetasuna sustatzeko ekintzak jorratzea, etxeko lanak eta zaintza banatzeko; eta emakumeak ahalduntzea batik bat kirol eta kultur arloan. Azkenik, Prebentzio Batzordea sortu du, eta komunitate osoak bertan ordezkaritza du.

Proiektu horren esparruan, hainbat jarduera ere egin dira, hala nola "zuk aukeratzen duzu, zure dantzak" lehiaketa, "Ligoteo osasungarriko tailerra", "Tailerra tabernetan, etxean bezala", "Zaintzen duten pertsonak zaintzen" eta "osasunez zahartzen" proiektuak. Baita hezkuntza-komunitatearekin batera eta familien eremuan egindako hainbat ekintza (argazki-lehiaketa, tratu onen inguruko istorioak edo zainketen "Gymkana") ere.

Goizuetako alkateak eta zinegotziak eskerrak eman dituzte sariarengatik jasotako zorion-agurrengatik, eta ondorengoa esan du: “proiektua burutzeko Goizuetako eta Aranoko herrietako eragile sozial guztiak inplikatu dira modu kooperatiboan, bakoitzak berea emanaz eta esperientziak trukatuaz, guretzat hori baita lan egiteko jorratu beharreko modua”. Era berean, honela gehitu du: “lan honek bere emaitzak eman ditu, baina garrantzitsuena prozesuan sortu diren harremanak dira”.

Erakunde saritua

Leitzako, Goizuetako, Aresoko eta Arellanoko Oinarrizko Gizarte Zerbitzuen Mankomunitateak datorren urtean 30 urte beteko ditu, eta lau herrietako bizilagunen bizi-kalitatea eta ongizatea bermatzeko helburu nagusiarekin sortu zen.

Gaur egun, profil profesional ezberdineko hamabost pertsonak osatzen dute plantilla. Hasieran, harrera eta gizarte-orientazioko programarekin hasi zen lanean, baina, egun, doako zerbitzu publikoa eta komunitarioa eskaintzen du, programa eta zerbitzuen zorro zabalarekin; tartean, norberaren autonomia sustatzeko programa eta mendekotasun-egoeran aurkitzen diren pertsonak artatzeko programa nahiz gizarteratzeko programa.