Nafarroako Gobernuak, Nafarroako Berdintasunerako Institutuaren (INAI –NBI) bitartez, genero-indarkeriaren kontrako Espezializazio Juridikoaren XIX. Jardunaldia sustatu du, eta emakume biktimekiko indarkeria detektatzeko eta haiek artatzeko, babesteko eta justizia egiteko baliabideetan zuzeneko erantzukizuna duten profesionalen prestakuntzaren aldeko apustua berretsi du. Iruñeko Abokatuen Elkargoak antolatutako prestakuntza-saioa Iruñeko, Tuterako, Lizarrako eta Tafallako abokatuen elkargoekin egindako hitzarmenaren barruan kokatzen da, indarkeria-egoeran aurkitzen diren emakumeei laguntza juridikoa eta aholkularitza espezializatua bermatzeko.

Nafarroako Gobernuak, Nafarroako Berdintasunerako Institutuaren (INAI –NBI) bitartez, genero-indarkeriaren kontrako Espezializazio Juridikoaren XIX. Jardunaldia sustatu du, eta emakume biktimekiko indarkeria detektatzeko eta haiek artatzeko, babesteko eta justizia egiteko baliabideetan zuzeneko erantzukizuna duten profesionalen prestakuntzaren aldeko apustua berretsi du. Iruñeko Abokatuen Elkargoak antolatutako prestakuntza-saioa Iruñeko, Tuterako, Lizarrako eta Tafallako abokatuen elkargoekin egindako hitzarmenaren barruan kokatzen da, indarkeria-egoeran aurkitzen diren emakumeei laguntza juridikoa eta aholkularitza espezializatua bermatzeko.

Inaugurazio-ekitaldian, honako hauek izan dira: Lehendakaritzako, Berdintasuneko, Funtzio Publikoko eta Barneko Lehendakaria, Javier Remírez; Nafarroako Berdintasunerako Institutuko (INAI/NBI) zuzendari kudeatzailea, Eva Istúriz; eta Iruñeko Abokatuen Elkargoko dekanoa, Blanca Ramos.

Emakumeen Arreta Juridikorako Zerbitzuan (EAJZ) iaz 1.018 emakume artatu zituzten guztira: 471 Iruñean, 297 Tuteran, 133 Lizarran eta 117 Tafallan.

Lehendakaritzako, Berdintasuneko, Funtzio Publikoko eta Barneko Lehendakari Javier Remírezek ondorengoa adierazi du: “Nafarroako Foru Komunitateko Administrazioak bermatu behar du emakumeen aurkako edozein indarkeria-adierazpenaren biktima den emakumeak abokatuen laguntza izatea, salaketa ezarri baino lehen eta prozedura osoan edo prozedura judizial eta administratibo guztietan”.

Modu horretan, "laguntzeaz arduratzen diren profesionalen espezializazioa bermatzearen" aldeko apustua berretsi du.

Nafarroako Berdintasunerako Institutuko (INAI –NBI) zuzendari kudeatzailea den Eva Isturizek “Emakumeen Arreta Juridikorako Zerbitzuak (EAJZ) egiten duen lana" nabarmendu du, indarkeriaren biktimak diren emakumeei aholkularitza eta laguntza letratu egokia eskainiaz.

“Zuen ahalegina eta dedikazioa ezinbestekoak dira emakumeen aurkako indarkeria guztiak ezabatzen aurrera egiteko, eta, beraz, emakumeen eta gizonen arteko berdintasuna lortzeko”, ziurtatu du Isturizek. Horrez gain, etengabeko prestakuntzak eta espezializatuak lehentasunezkoak izan behar dutela adierazi du.

Bestalde, Iruñeko Abokatuen Elkargoko dekanoak, Blanca Ramosek, esan du jardunaldiaren helburua dela “espezializazio juridikoa jorratzea, emakumeen aurkako indarkeria bezalako gaitzari aurre egiteko modu bat bezala”.

Era horretan, azpimarratu du prestakuntza-ekintza hau “esperientziak, ezagutzak edo hausnarketak ikuspegi juridikotik trukatzeko foro teknikoa dela, bai arlo penalean, bai zibilean, familiakoan edota administrazio edo lan-arloan”.

Jardunaldian hiru hitzaldi eskaini dituzte. Lehena Emakumeen gaineko Indarkeriaren Salako Fiskaltzara atxikitako fiskalak, María Jesús Cañadasek, eman du, eta biktima agertzea, epaiak gauzatzea eta ez betetzeak aztertu ditu.

Ondoren, Marc Molins y Reich abokatuak eta Zuzenbidean doktoreak genero astungarria eta biktimen eskubideak versus defentsa eskubidea aztertu ditu.

Azken hitzaldia Emakumeen aurkako Indarkeriaren Agoitzeko 1. Auzitegiko epaile titularrak, Aaron Anduezak, eman du, eta emakumeen gaineko indarkeriaren auzitegietan eskumen eta gai zibilen inguruko ebazpen berriak azaldu ditu, babesteko aginduari nahiz familia-prozesuei dagokienean.

Emakumeen Arreta Juridikorako Zerbitzua (EAJZ)

Emakumeentzako laguntza juridikoa Nafarroako Foru Komunitateko Administrazioak eskaintzen du 2000. urteaz geroztik, Nafarroako Emakumeen Institutuak (orduan horrela deitzen zen) eta Nafarroako Abokatutzako lau Elkargok, Nafarroako emakumeentzat Arreta Juridikoko Zerbitzua abian jartzeko Hitzarmena sinatu baitzuten. Informazioa, aholkularitza, akonpainamendua eta laguntza juridikoa doan eskaintzen du zerbitzuak emakumeen aurkako indarkeria-kasuetan eta emakumeentzako interes orokorreko prestakuntza ere bai.

Aurten, berrikuntza gisa, tailerrak antolatu dituzte Abokatuen Elkargo ezberdinetan, eta lantalde ezberdinek gaiak landu eta prestakuntzaren diseinua eta edukiak berrikusi dituzte, 2017an egindako kanpo ebaluazioan ondorioetariko bat hori izan baitzen. Kanpoko ebaluazio horri esker, baliabideen ahuleziak eta indarrak ezagutu ahal izateaz gain, hobetzeko etorkizuneko arloak proposatu ahal izan dira.

Halaber, Emakumeen Arreta Juridikorako Zerbitzuari dagokionean, aurten arreta eskaini zaie aipatu ebaluazioan hobetzeko arlo bezala ezarritako jarduerei: erabiltzaileen asebetetzea neurtzea, prestakuntza praktikoagoa egitea indarkeriako ofiziozko txandako pertsonek eta EAJZko hileko informazioa jasotzeko modua hobetzea.

Horrez gain, emakumeenganako indarkeriaren kontra jarduteko apirilaren 10eko 14/2015 Foru Legearen arabera, prestakuntza da legea bera aplikatzeko berme nagusietariko bat. Era berean, Foru Lege horretan garatzen den Ekintza Planean, printzipio gidari moduan agertzen da erakunde publikoek duten erantzukizuna, prestakuntza-prozesuak ezarri beharko baitituzte emakumeen eskubideak modu eraginkorrean gauzatzea ziurtatzeko erantzukizuna dutenek behar bezala joka dezaten.