Hezkuntza Departamentuak larunbat honetan egingo du III. eTwinning Topaketa “eTwinning denontzat” goiburuarekin. Horrela, Nafarroako ikastetxeek 2019an lortutako 28 kalitate-zigilu sarituko dira. Hezkuntza kontseilari Carlos Gimenok gaur goizean aurkeztu du jardunaldiaren programa; helburua da Europako programak hezkuntzako etapa guztietan eskaintzen dituen aukerak ezagutzera ematea.

Jardunaldiaren aurkezpenean, Hezkuntzako kontseilariarekin batera izan dira Eleaniztasunaren eta Arte Ikasketen Zerbitzuko zuzendaria, Ignacio Catalán; Europako Proiektuen Negoziatuko aholku-emailea, Elisa Echenique; eta Iruñeko Iturrama BHIko Fisika eta Kimikako irakaslea eta eTwinning enbaxadorea, Izaskun Jorajuria.

eTwinning ekimenak eskola-arteko lankidetza sustatzen du Europan, Erasmus+-eko eskola-senidetze birtualen bitartez, eta, modu horretan, herrialde ezberdinetako ikastetxeak harremanetan jartzen ditu informazioaren eta komunikazioaren teknologien bitartez (IKT), baterako proiektu bat lantzearren.

Gaur egun, Nafarroak 1.340 irakasle ditu, 270 ikastetxe baino gehiagokoak, eta proiektuak garatzerakoan oinarri bezala erabiltzen den plataforman erregistratuta daude. Foru Erkidegoan, egun, 35 proiektu garatzen ari dira, eta horietan 1.950 bat ikaslek hartzen dute parte. Nafarroan 2005ean jarri zen ekimena abian, eta, geroztik, 20.000 ikaslek baino gehiagok hartu dute parte Europako beste herrialdeekin elkarlanean garatutako 883 proiektutan.

Carlos Gimeno Hezkuntza kontseilariak nabarmendu du programak Europan sartzeko aukera eskaintzen diela parte hartzen duten ikastetxe, irakasle eta ikasleei, eta informazioaren eta komunikazioaren teknologia berriak (IKT) erabiltzeak Nafarroako hezkuntza-sistemari balio erantsia ematen diola. Horrez gain, kontseilariak eTwinning programaren beste birtualtasun garrantzitsua aipatu du; alegia, “diziplina anitzeko programa da, hezkuntzako etapa guztietara egokitzen dena, eta hezkuntza ezberdinetan makina bat gai garatzen dira”, gehitu du.

eTwinning programak irakasleen lana saritzen du; hau da, Hezkuntza, Kultura eta Kirola Ministerioaren Laguntzako Zerbitzu Nazionalak balorazio bat egiten du, eta, ondoren, estatuko eta Europako kalitate-zigiluak ematen dituzte. Aurten, honako ikastetxe hauek lortu dituzte 28 zigiluak: Ablitasko San Babil HLHIP, Azagrako Reyno de Navarra BHI, Burlatako Hilarión Eslava HLHIP, Castejongo BHI, Fustiñanako Santos Justo y Pastor HLHIP, Navarro Villoslada BHI, Salestar Ikastetxea, Cuatrovientos Institutua, Jesuitinak Ikastetxea, Iturrama BHI, Iruñeko Gurutze Plaza BHI, Garesko Seminario Padres Reparadores Ikastetxea, Tafalla LHI, Tuterako Huertas Mayores HLHIP eta Atarrabiako Paz de Ziganda Ikastola.

eTwinning proiektuaren garapenean honako hauek har dezakete parte: bi irakaslek edo gehiagok, irakasle-taldeek edo departamentuek, liburutegietako arduradunek, ikasketa-zuzendariek eta Europako ikastetxe guztietako ikasleek. IKTeak erabilita, diziplina anitzeko gaia garatu daiteke, hezkuntza-etapetara egokitzearekin batera, eskolaurretik batxilergora bitarte. Ildo horretan, programa honetan etorkizuneko irakasleak prestatzearren, Nafarroako Unibertsitate Publikoak Espainiako beste bi unibertsitateekin batera parte hartu du aurten, Irakasleentzako Hasierako Prestakuntzako proiektu pilotuan.

Jardunaldiaren programa

“eTwinning denontzat” larunbat honetan egingo da, urriaren 17an, Iruñeko Musika Hirian. 10:00etan hasiera emango dio Ignacio Catalanek, Eleaniztasunaren eta Arte Ikasketen Zerbitzuko zuzendariak. Jarraian, Juan Carlos Garridok, eTwinning Laguntzako Zerbitzu Nazionalekoak, programaren ezaugarrien berri emango du. Ondoren, berriz, ikastetxeetako arduradunek proiektuen prozesua agertuko dute; alegia, zuzendaritza-taldeen lana, parte-hartzaileen dinamizazioa nahiz ikasleek egindako lanen adibideak azalduko dituzte. Goizean, halaber, Euskal Autonomia Erkidegoko ordezkariek parte hartuko dute proiektu eleaniztunak ezagutzera emateko.

16:00etatik aurrera, jarduera ezberdinak egingo dira; hala nola, etorkizuneko gelari buruzko hitzaldiak, eTwinning enbaxadoreen parte-hartzea, green rooma, hezkuntza-etapa ezberdinetako jardunbide egokien aurkezpena edota IKT erremintak, diziplina anitzeko proiektuak edo Europako proiektuetan barneratzeko beharrezko lehen urratsak ezagutzera emateko tailerrak.