Datorren astelehenetik, irailaren 30etik, aurrera eta 4 astez, AP-15era sartzeko bide berria jarriko da Tafallan, Tuterako noranzkoan, obra batzuk medio N-121 errepidetik autopistara sartzeko adarra itxi egingo baita.

Trafikoarentzat itxita egongo da AP-15era sartzeko adarra Tuterako noranzkoan, N-121 errepideko 36. kilometroan dagoena, San Gregorio ermitaren inguruan.

Mozketa horren aurrean, datozen lau astetan, AP-15era sartzeko behin-behineko sarbidea prestatuko da Tuterako noranzkoan, orain erabiltzen ez den adar baten bidez; hain zuzen ere, Iruñerako noranzkoan autopistara sartzeko egungo adarretik ateratzen dena, Tafallako hegoaldeko loturatik.

N-121 errepideko hegoaldeko loturatik iristen diren ibilgailuek Tutera aldera joateko AP-15 hartu nahi badute, loturako biribilgunera iritsi eta kartel berrien adierazpenak jarraitu beharko dituzte, informazio honekin batera doan planoan zehazten den moduan.

Seinale berrien arabera, trafikoak biribilgunetik Iruñera alderako bidean joan behar du eskuin aldean Tutera aldera prestatutako adarra hartzeko; hots, orain arte itxita zegoena.

N-121 errepidetik Tutera aldera joateko AP-15erako sarbidearen mozketa gertatu da Tafallako hegoaldeko saihesbidearen lehen fasea eraikitzeko obrak medio kaltetutako telefono-linea bat berritzeagatik; saihesbidearen lanak pasa den maiatzean esleitu zituzten 15 hilabeteko denboraldian gauzatzeko, 8.218.488,73 euroren truke.

AP-15era, hegoalderako noranzkoan, sartzeko adarra prest izango da astelehenetik, irailaren 30etik, aurrera, eta 4 astez egongo da.