Milioi bat inguru toki entitateendako laguntzetarako

Toki entitateei dagokienez, Batzordeak aintzat hartu du administrazio horiek egindako 890.593 euroko laguntza eskaerak berehala tramitera onartu izana, 2017-2019ko Tokiko Inbertsioen Planaren barne. Laguntzak aurreikusitako epearen barnean eskatu dituzte zazpi udalek (Erriberri, Oloritz, Orisoain, Pitillas, Puiu, Tafalla eta San Martin Unx) eta Mairagako Manlomunitateak.

Halaber, gogoratu behar da Nafarroako Gobernuak zenbait zerga salbuespen onartu zituela uztailaren 30ean horrelako fenomenoek kalteturiko pertsona fisiko eta juridikoendako, baita salbuespen horiek aplikatuak dituzten udalei egin beharreko ordainak ere. Salbuespenak arautzen dituen Foru Aginduaren arabera, lurralde kontribuzioaren zerga ordaintzetik salbuetsiko dira kalteturiko higiezinak, Jarduera Ekonomikoen gaineko Zerga eta Eraikuntzan, Instalazio eta Obren gaineko Zerga barne, kalteari dagokion portzentajean. Nafarroako Gobernuak neurri honen bitartez jasotzeari utzi dioten zerga-sarrerak konpentsatuko dizkie toki entitateei.

Halaber, Nafarroako Zerga Ogasunak gogorarazten du, uholdeen ondorioz hondamen-eremutzat hartutakoari dagokionez, erabiltzaileek mahaigaineratutako zalantza fiskalak jasotzen dituen informazio ohar bat argitaratu dela Nafarroako Gobernuko web orrialdean.

Santsoainerako zubi berria

Santsoainerako sarbidea emanen duen zubi berriaren eraikuntza da aurreikusitako beste ekintzetako bat. Azpiegitu berriak bi errei izanen ditu noranzko bakoitzean, eta horrela, egungo zubiak duen 5,10 metroko zabaleraren ordez, zubi berriak 9,20 metroko zabalera izanen du. Hasieran 700.000 euro inguruko aurrekontua kalkulatu arren, ibai-ibilguan egin beharreko zimendatze-lanek, behin-behineko pasabidea kentzeko lanek eta ezarri beharreko desbideratzeek aurreikuspen hori gehituko dute seguru aski.

Halaber, Batzordearen bilkuran, uholdeek kalteturiko errepideetan egindako lanen berri eman dute, 625.659 euroko inbertsioa tarteko: N-121, Iruñea-Tutera; NA-8607, Tafallarako sarbidea; NA-5100, Garinoain-Uzkita; NA-5151, Soltxaga; NA-5152, Orisoain; NA-5161, Amatriain; NA-5310, Uxue; NA-5330, Pitillas-Santakara-Melida; NA-2420, Dorre-Esa; NA-5110, Puiu-Lerga; NA-5301, Erriberri-Beire; eta NA-5163, Santsoain.

102 laguntza eskaera Gobernuaren Ordezkaritzan

Bestalde, Gobernuaren Nafarroako ordezkari José Luis Arastik ezagutzera eman dio Batzordeari, Gobernu zentralari eremua “babes zibileko larrialdi batek larri kalteturiko” edo “hondamen-eremu” izendatzeko aukera emanen liokeen administrazio espedientearen egoera. Izendapen horren harira, Gobernu zentralak beste laguntza ekonomiko batzuk ere emanen lituzte, baina Ministroen Kontseilutik igarotzeko zain dago.

Halaber, Arastik adierazi du Gobernuaren Ordezkaritzak 102 laguntza eskaera jaso dituela: 75 espediente etxebizitzetan izandako kalteei dagozkie, 2 eskaera toki korporazioek egindakoak dira, 9 eskaera auzokideen komunitateek egindakoak eta 16 espediente establezimenduetan izandako kalteei loturikoak dira. Eskaera horiek guztiak larrialdi edo hondamendi izaerako egoerek eragindako zenbait beharretarako dirulaguntzak eta hauek banatzeko prozedura zehazten dituen martxoaren 18ko 307/2005 Errege Dekretuari (apirilaren 13ko 477/2007 Errege Dekretuak aldaturikoa) atxikita daude.

Errege Dekretu horretan aurreikusitako laguntzak bost motatakoak dira, nagusiki. Alde batetik, familia unitateei eta bizikidetza ekonomiko unitateei zuzendutakoak, kalte pertsonalak zein etxebizitzetan edo etxe barneko gauzetan izandako kalte materialak estaltzeko; bigarrenik, jabetza horizontaleko araubideari atxikitako jabeen komunitateei zuzendutakoak erabilera orokorreko elementu komunetan izandako kalte materialetarako; hirugarrenik, toki korporazioei zuzendutakoak, larrialdi egoeretan egindako ekintzen gastuak estaltzeko; laugarrenik, gehienez 50 langile dituzten merkataritza, industria zein zerbitzuetako establezimenduen titularrak diren pertsona fisiko edo juridikoendako laguntzak daude negozioaren lokaletan eta ondasunetan izandako kalteak estaltzeko; eta azkenik, dekretuak laguntzak aurreikusi ditu, larrialdian ondasunak edo zerbitzuak emateko agintari eskumendunaren manua jaso duten pertsona fisiko edo juridikoendako.

Gainera, dekretuak bete beharreko baldintzak eta laguntza horien gehienezko kopuruak finkatu ditu. Hartara, laguntzak 5.160 eta 15.120 euro bitartekoak dira ohiko etxebizitzan izandako kalteetarako; 2.580 eurorainokoak etxe barneko gauzarik oinarrizkoenetan izandako kalteetarako, eta 9.924 eurorainokoak auzokideen komunitateko erabilere orokorreko elementuetan izandako kalteetarako. Laguntzak 18.000 eurokoak dira kalte pertsonalen kasuan, 9.224 eurorainokoak industria, merkataritza eta zerbitzuetako establezimenduen kasuan, eta udalek egindako gastuen ehuneko 50 eta 100 bitartekoak larrialdi egoeren kasuan.

Eskaerak modu telematikoan edo Gobernuaren Nafarroako Ordezkaritzaren nahiz foru exekutiboaren edozein erregistrotan aurkeztu behar ziren hilabateko epean, larrialdia eragin zuen gertaera bukatu eta hurrengo egunetik kontatzen hasita. Barne Ministerioak ebatziko ditu sei hilebeteko gehienezko epean.