Garapen Ekonomiko eta Enpresarialeko Departamentuak dirulaguntzen deialdia argitaratu du industriagune berriak sustatu, eta ekonomia jarduera berrietarako egun dauden udal poligonoak eta beren azpiegiturak egokitzeko.

Diru-laguntza guztira 1.460.309,47 eurokoa izango da bi ekitalditan, eta Nafarroako toki-erakundeek, haien sozietate publikoek eta Nasuvinsak irailaren 15era bitarte egin dezakete eskaera.

Deialdia astelehen honetan argitaratu da NAOn, eta horren bitartez Nafarroako Gobernuaren asmoa da Komunitateko toki-erakundeen eskaerari erantzuna ematea, jarduera ekonomikorako espazio berriak sustatu edo lehendik daudenak hobetzearren, izan industriaguneak edo udal-titulartasuneko lokalak, lehendik dauden enpresei ere azpiegitura hobeak eskaintze aldera. Abeltzaintza jardueretarako espazioak ez dira diruz lagunduko.

Diru-laguntzak norgehiagoka eran emango dira, eta irailaren 15era bitarte eskatu ahal izango dira Nafarroako Gobernuaren web orrialdean jarritako fitxaren bitartez.

Foru Exekutiboak gastua bi ekitalditan banatzeko konpromisoa hartu du; modu horretan, 660.30,47 euro jarriko dira 2019ko Aurrekontuaren kontura eta beste 800.000 euro 2020rako jarritako gastuen partidaren kontura.

Diru-laguntza lortu ahal izango da ondorengo gastuetarako: poligonoak garatzeko lursailak erostea, obra-proiektuak idaztea, partzelak urbanizatzeko lanak egitea, eraikin berriak eraikitzea eta obren zuzendaritza fakultatiboa burutzea. Poligono berrien sustapenerako edo udal-eraikinak prestatzeko, gastuen %30eko diru-laguntza emango da. Lehendik dauden poligonoetan azpiegiturak konpontzeko edo berriak prestatzeko, inbertsioaren %50eko diru-laguntza emango da.