Jarduneko Nafarroako Gobernuak, gaurko bilkuran, Foru Dekretu berria onartu du Ikastetxe Publikoen Sarea berrantolatu eta hala Nafarroako Foru Erkidegoko hezkuntza sistema zerbitzua bermatzeko, geografia eta biztanlego irizpideak oinarritzat hartuz. Dekretu berriak martxoaren 30eko 109/1998 Foru Dekretua aldatu du, zeinak era berean aurreko dekretua aldatu zuen. Arau berria datorren aurrematrikula kanpainarekin batera sartuko da indarrean, 2020ko otsailean, eta bereziki, atxikipen, garraio eta jangela zerbitzuari eragingo dio.

Foru Komunitateko Ikastetxe Publikoen Sarea antolatzen duen arauaren azken egokitzapena 1998koa da. Harez geroztik, ikastetxe publikoen sarea antolatzeko egin behar izan diren egokitzapen guztiak Gobernu Erabakien bidez egin dira, sarean aldian-aldiko aldaketak eginez ikasleak ikastetxeei esleitzeko. Horren harira, urte hauetan guztiotan, hezkuntzari buruzko lau Lege Organiko ere onartu dira: 9/1995 Lege Organikoa, azaroaren 20koa, Ikastetxeetako Partehartze, Ebaluazio eta Gobernuari buruzkoa; 10/2002 Lege Organikoa, abenduaren 23koa, Hezkuntzaren Kalitateari buruzkoa; 2/2006 Lege Organikoa, maiatzaren 3koa, Hezkuntzari buruzkoa; eta 8/2013 Lege Organikoa, abenduaren 9koa, Hezkuntzaren Kalitatearen Hobekuntzari buruzkoa. Horren guztiaren kariaz, komenigarria eta beharrezkoa zen ikastetxe publikoen sarea berrantolatzea, ikasleak eskolaratzeko bideak ikastetxe publikoen sarera eta ikasleen bizilekura egokitzeko. Hartara, gaur onetsitako erabakiaren ondoren, Foru Dekretua indarrean izanen da Foru Komunitateko ikasleen hurrengo aurre-matrikulazio kanpainarako eta zuzen-zuzenean eragingo die ikasleen esleipenari, garraioari eta jantoki zerbitzuari.

Zenbait arrazoi hartu dira kontuan Eskola Mapa antolatzen duen arauaren beharrezko eguneratzeari ekiteko: eskaintza hizkuntza-ereduen gorakada edo beheradaren arabera garatzea, zenbait herrik kokapen geografikoa nahiz errepide-azpiegituren garapena aintzat hartuz eskola-adskripzioa aldatzeko egin duten eskaera, populazioa Iruñerrian, Tuteran eta hirigune handien inguruan biltzeak eragindako biztanleria-aldaketak, eta Foru Komunitateko landa-eremuetako biztanleriaren jaitsiera, besteak beste. Inguruabar horiek guztiak aintzakotzat hartuz, nahitaezkoa zen Eskola Mapa antolatzeko arau berri bat lantzea. Izan ere, Nafarroako Foru Komunitateko Ikastetxe Publikoen Sareak 272 udalerritako ikastetxeak biltzen ditu, 972 herri, kontzeju eta leku barne hartuz.

11 Eskola Departamentu

Eskola Mapa berriak kontuan hartzeko hobekuntzak sartu ditu aurrekoaren aldean. Horrela, eskola barrutiaz gaindiko eremu berri bat sortu da, Eskola Departamentua deritzona, lurralde handiagoa barne hartu eta nafar herri guztiei ikasleen eskakizunen araberako hizkuntza-ereduetara egokitutako hezkuntza eskaintza bermatuko diena, Nafarroako eremu desberdinetan ikasleei emandako arreta bistaratuz eta dagokion testuinguruan kokatuz. Hortaz, Eskola Departamentua deritzon unitate geografiko eta populazionalak bere gain hartuko ditu Nafarroako Foru Komunitateko hezkuntza Administrazioaren menpeko irakaskuntza maila guztietako ikastetxeak, horietan ofizialak diren hizkuntza-eredu guztiak (A/G/D ereduak eremu mistoan eta ez-euskaldunean eta A/B/D ereduak eremu euskaldunean) barne hartuz. Guztira, 11 Eskola Departamentu zehatzu dira (Sakana-Burunda, Baztan-Bidasoa, Burlata-Atarrabia/Uharte, Lizarra-San Adrian-Lodosa, Iruñea Erdialdea, Iruñea Ipar-Ekialdea, Iruñea Ipar Mendebaldea-Barañain-Leitza, Zanoza-Irunberri, Tafalla-Azkoien-Martzilla, Tutera-Corella, Zizur Nagusia-Zizur) eta bere horrexetan mantendu dira martxoaren 13ko 69/1995 Foru Dekretuan zehaztutako lurralde-antolaketa eta honi atxikitako Eskola Barrutiak, Aldeak eta Eremuak, eskola-ibilbide zehatzak esleitzea ahalbidetzen duen antolaketa-egitura taxutzea xede dutenak, baita lurralde-antolaketa horretan zehaztutako ikastetxeen banaketa ere, ikasleen familia-unitateen ohiko bizilekuaren kokapen geografikoa aintzat hartuz. Antolaketa-egitura honi esker, aldez aurretik jakin daiteke, ikasleen bizilekuaren kokapen geografikoaren bidez, zeintzuk diren hezkuntza-etapa eta hautaturiko hizkuntza-ereduaren arabera dagozkien ikastetxe publikoak.

Gainera, ez dira udalerriak adskribatzen, herriak, kontzejuak eta lekuak baizik. Horrela, Nafarroako edozein tokitan bizi diren ikasleen gurasoek segurtasun osoz jakiten ahalko dute non dagoen seme-alabek bermatua duten eskola-plaza. Halaber, ikastetxeen adskripzio bikoitza desagertu da, indarrean dagoen Dekretuan bezalaxe. Azkenik, hizkuntza-eredu guztietarako adskripzioak zehaztu dira.

Bestalde, administrazio-prozedurak azkartzeko eta interes publikoaren ikuspegitik hobetzeko, Hezkuntza Departamentuari eman zaio eskuduntza ikastetxeen zein hezkuntza ildo eta unitateen eraldaketa, fusio, integrazio eta adskripzio prozeduretarako, eskuduntza Nafarroako Gobernuari ematen zion aurreko araua aldatu delarik.

Eskola Mapa berria aho batez onetsi zuen Nafarroako Eskola Kontseiluak ekainaren 27an egindako bilkuran. Aurretik, apirilaren 29an, Toki Erregimenaren Foru Batzordearen aldeko txostena lortu zuen.