Nafarroako Liburutegiak hiru hitzaldi ziklo programatu ditu udaberri honetarako: “Muga difusoak”, “Natura inspirazio gisa” eta “Emakumea eta konpromiso soziala XX. mendearen lehen erdialdean”. Hitzaldiak apirileko azken astean eta maiatzean eta ekainean eginen dira. Horiez gain, bestelako saioak ere antolatu ditu; hala nola, liburu aurkezpenak, dastaketak eta solasaldiak, besteak beste.

"Muga difusoak" zikloak autofikzioak literatura garaikidean izan duen goraldiari buruz gogoeta egitera gonbidatzen du eta Iruñeko Nafar Ateneoarekin batera antolatu da. Berrikitan “Una cierta edad” deritzon dietarioa argitaratu duen Marcos Ordóñez idazle eta antzerki-kritikariak niaren inguruko generoei buruz (egunerokoak, gutunak, etab.) hitz egingo du asteartean, apirilak 29, 19:00etan. Biharamunean, apirilak 30, ordu berean, bizitzako esperientzietan inspiratuta “El invitado amargo” eta “El joven sin alma” gisako eleberriak sortu dituen Vicente Molina Foix idazleak “Escribir la propia vida” izenburuko hitzaldia emanen du. Ziklo honen aurreko saioetan, hitzaldi bana eman zuten Anna Caballé ikertzaileak eta Fernando Marías idazleak.

Bigarren zikloa, “Natura inspirazio gisa” deritzona, maiatzaren 7an abiatuko da arkitekturan aditua den Anatxu Zabalbeascoa kazetariaren hitzaldi batez, naturak diseinuaren zein hirigintzaren arloko inspirazio iturri gisa izan duen garrantzia aztertzeko. Maiatzaren 14an, eko-nekazaritza izanen da hizpide Marc Badalen hitzaldian. Badalek landa munduak historian izandako bilakaera aztertu du “Vidas a la intemperie” liburuan.

Santiago Beruetek naturaz eta arteaz hitz egingo du maiatzaren 20an, Arte Plastikoen Sari Nazionala irabazi duen Eva Lootz artistarekin. Hilaren 21ean, Beruete, “Jardinosofía” eta “Verdolatría” liburuen egilea, naturak filosofian eta pentsamenduan izandako garrantziaz solastatuko da. Sorkuntzan aditua den Angélica Sátiro pedagogoa, “Juanitaren lorategia” delako proiektuaren arduraduna, eskolan natura kontuan hartzearen garrantziaz mintzatuko da maiatzaren 28an.