Nafarroako Kirol eta Jarduera Fisikoaren Institutuak (NKUFIk) gaur goizean aurkeztu du Nafarroako Foru Komunitateko I. Futbol 8 Txapelketa Inklusiboa, datorren apirilaren 17an, osteguna, egingo dena Club Amigóren instalazioetan. Ekimen honek Aspace Nafarroaren laguntza du eta helburu nagusitzat hartzen du desgaitasuna duten pertsonen kirolaren praktikaren normalizazioa, haien talentuak ikusaraztea eta desgaitasuna duten eta ez duten kirolarien arteko topaguneak sustatzea.

Aurkezpenean, Kultura, Kirol eta Turismo kontseilari Rebeca Esnaolak nabarmendu du desgaitasuna duten pertsonen kirolaren praktikaren garrantzia. “ Zalantzarik Gabe- esan du-, beharrezkoa da kirol egokituaren alde egitea eta bultzatzea. Desgaitasuna duten pertsonek kirola modu normalizatuan egitea, haien talentuak ikusaraztea eta desgaitasuna duten eta ez duten kirolarien arteko topaketarako espazioak sortzea ezinbestekoa da. Izan ere, Foru Komunitateko Txapelketa hau ez dadila izan futbolarien ahalegina, gaitasuna eta dedikazioa ikusarazteko soilik, baizik eta gizarteak haiekin kirolarekiko duten grina partekatzeko aukera ere izan dadila.”

Halaber, kontseilariak azpimarratu du Nafarroako Gobernuak kirol inklusiboa sustatzeko duen konpromisoa, pertsonen arteko berdintasuna bultzatuz. “ Txapelketa honekin, Gobernuaren eta NKJFIk duten konpromisoa berresten da, kirol inklusiboaren bidez aukera-berdintasuna sustatzeko- adierazi du-. Azken urteotan hainbat proba eta lehiaketa antolatu ditugu emakume kirolarien lana ikusarazteko —txirrindularitzan edo pilotan, adibidez—; eta orain kirol inklusiboaren txanda da.”

Aurkezpenean izan dira, halaber, David Erice, Aspace Nafarroako lehendakaria, baita kirolari hauek ere: Eduardo Larumbe (Aspace Nafarroako jokalaria) eta Vanesa Vera (Osasuna Genuine taldeko jokalari eta kapitaina).

Kirol inklusibo eta solidarioko jardunaldia

Jardunaldi osoan zehar hiru partida jokatuko dira, 11:30ean, 16:45ean eta 18:35ean, eta parte hartuko dute Aspace, C.A. Osasuna, Real Sociedad eta beste talde gonbidatuek. Aldi berean, Haurren Futbol Txapelketa Solidarioaren XI. edizioa ospatuko da, topaketa hau kirolaren eta gizartearen balioen aldeko erreferentziazko hitzordu bihurtuz.

Txapelketa honek Nafarroako Gobernuak eta NKJFIk aukera-berdintasuna eta jarduera fisikorako sarbide unibertsala sustatzeko duten konpromisoa berresten du. Halaber, aukera paregabea da Nafarroako gizartearentzat desgaitasuna duten kirolarien ahalegina, gaitasuna eta grina bertatik bertara ezagutzeko.