Memoriaren Nafarroako Institutuaren argitalpen batek "Memoria duen Historia Hezkuntzan" Nazioarteko II. Kongresuaren ekarpenak eta ondorioak bildu ditu. Biltzarrak 10 herrialdetako eta 15 autonomia erkidegotako 400 irakasle, aditu eta ikasle baino gehiago bildu zituen Nafarroako Unibertsitate Publikoan (NUP) iazko azaroan. Memoria eta Bizikidetzako, Kanpo Ekintzako eta Euskarako departamentuak argitaratu du liburua, eta gaur arratsaldean aurkeztu dute Memoria duten Eskolen sareko ikastetxeen aurrean, Ana Ollo Nafarroako Gobernuko lehendakari ordearen eskutik.

Ollo lehendakariordeak azpimarratu duenez, "belaunaldi berriek formakuntza kritikoa eta zorrotza dute mundua hondatzen duten eta hainbat bidetatik (albiste faltsuak edo fake news-ak, buloak, desinformazioa sare sozialetan, etab.) iristen diren korronte ukatzaile eta inboluzionista berrien aurrean, eta gazteak bereziki kalteberak dira horien aurrean. Eta hori gaur egun herritarren parte-hartze prozesuan dagoen Bizikidetzarako II. Plan Estrategikoan ere jasotzen da".

Paperean eta formatu digitalean egindako argitalpenak, congresohistoriaconmemoriaenlaeducacion.org webgunean eskuragarri dagoenak, eztabaida-mahaietan sortu ziren ekarpenak jasotzen ditu, baita kongresu horretan aurkeztutako 122 komunikazioak ere. Guztira 2.255 orrialde dira, kongresuaren esparruan egindako lanaren garrantzia agerian uzten dutenak. Era horretako ekimenekin, Ollo lehendakariordeak azpimarratu duenez, "oraina arazo bihurtzen duten hezkuntza-prozesuak indartu nahi dira, herritartasun kritikoa, disidentea eta desberdintasunarekiko eta bazterkeriarekiko errebeldea eraikitzeko; historia bat proposa dezatela behetik, isildutako subjektu historikoak, emakumeak eta gizonak berdintasunean integratuko dituzten narratiba berriekin, eta herritarren oinarrizko eskubideak aitortzeko eta bermatzeko beharra aldarrikatuko dutenak".

Kongresuan hamar bat erakunde eta ikerketa-talderen lankidetza izan zen, eta Memoriaren Nafarroako Institutua horiekin batera ari da lanean Memoria duten Eskolak programaren bitartez. Horrez gain, RedMemoria-ren inguruan antolatutako irakasle askok parte hartu zuten, I. Kongresutik sortutako Estatu osoko irakasle eta ikastetxeen elkarlanerako gunea. 

Kongresua lau ardatz tematikoren inguruan egituratu zen: "Pasatzen ez diren iragan traumatikoak: indarkeria eta errebisionismoena"; "Klasea, sexua eta etnia: mendeko memoriak eta hezkuntza"; "Memoria, eskola eta gizartea: XXI. mendeko ikasle eta irakasleak"; eta "Artea, museologia eta ondarea: memoriaren hezkuntza kritikorako erabilerak". 

Ardatz bakoitzeko hizketaldiak osatuz, hainbat elkarrizketa-mahai antolatu ziren, honako gai hauen inguruan: memoriaren transmisioaren esparruan elkarte memorialistek egindako lana; irakasleen prestakuntza; ikastetxeko hezkuntza-proiektuak Haur Hezkuntzan, Lehen Hezkuntzan eta Hezkuntza ez-formalean txertatzea; edo ikus-entzunezko iturriek ikaskuntza-prozesuetan duten zeregina. Horien artean, hainbat autonomia erkidegotatik eta Nafarroatik joandako hainbat ikastetxek egindako ekarpena nabarmendu zen, iraganeko eta egungo prozesu traumatikoen memoriaren inguruan egindako lana erakutsi baitzuten.