30 bat pertsonak parte hartu dute gaur goizean genero-indarkeriari buruzko prestakuntza espezifiko batean, Nafarroako Gazteriaren Institutuak (NGI) eta Gobernuaren Ordezkaritzak Gazte Informazio Zerbitzuak "Puntu Bioleta" gisa identifikatzeko sinatu berri duten lankidetza-protokoloaren barruan. Txema Burgaleta NGIko zuzendari gerenteak adierazi duenez, “prestakuntza horrek indarkeria matxistaren biktima diren emakumeentzako leku seguruak etiketatzeko balioko du, eta leku horietan entzun eta artatu ahal izango dira, egunetik egunera entzuten ditugun diskurtso negazionisten aurrean”.

‘Puntu Bioletak’ gisa definituak, gizarte osoa indarkeria matxistaren aurkako borrokan inplikatzeko eta emakumeen aurkako indarkeria-kasu baten aurrean nola jokatu jakiteko beharrezko informazioa zabaltzeko ezinbestekoak izango diren Berdintasun Ministerioak sustatutako tresna bat da. Joan den otsailean, hirugarren lehendakariorde eta Etxebizitzako, Gazteriako eta Migrazio Politiketako kontseilari Begoña Alfarok eta Gobernuaren Nafarroako ordezkari Alicia Echeverriak jarduera-protokolo bat izenpetu zuten. Protokolo horren bidez, NGIk “Puntu Bioleta” horiek sartu zituen Gazte Informazioko Zerbitzuen Sareko 29 bulegoetan, gazteen artean genero-indarkeriaren prestakuntza, sentsibilizazioa eta prebentzioa lantzeko.

Hala, Espainiako Gobernuak Nafarroan duen Ordezkaritzako Emakumearekiko Indarkeriaren aurkako Koordinazio Unitateko zuzendari Estrella Lamadridek eta Genero Indarkeriaren Biktimei Arreta Integrala emateko Taldeko (EAIV) langileek prestakuntza-saio bat eman dute gaur goizean zeinetan alderdi hauek landu diren: poliziaren eskumenak Nafarroako eremu geografikoaren arabera, 14 eta 30 urte bitarteko biztanlerian atzemandako genero-indarkeria kasuak, genero-indarkeriaren motak, indarkeria mailak eta indarkeriaren zikloa, eta indarrean dauden estatuko zein eskualdeko baliabideak.

Burgaletak saioaren inaugurazioan nabarmendu duenez, “beharrezkoa da biktimak entzunak, artatuak, ulertuak eta lagunduak sentitzeko espazioak eratzea”. Adierazi duenez, espazio horiek “Puntu Bioletak” izan litezke, orain Gazte Informazioko Zerbitzuen Sareko bulegoak izango liratekeenak alegia. “Indarkeria matxistak oso presente jarraitzen du gure gizartean, eta zeharkako modu batean jardun behar dugu indarkeria desagerrarazteko, eta, horregatik, garrantzitsua da ahalik eta arretarik onen eskaintzea, zuek zaretelako bulego horretan lan egiten duzuenak, emakume biktimak seguru sentitzeko eta justizia egiteko toki batera bideratuko lituzketen argi-izpi baten modukoak”, azpimarratu du NGIko zuzendari gerenteak, amaitzeko esanez “berdintasuna eta indarkeria mota hauen aurkako borroka zeharkako ildo bat izango dela hemendik aurrera gauzatuko diren gazte-politika guztietan”.