Foru Gobernuak Nafarroako Markaren eta haren jarduera-ardatzen definizio berria adostu du gaurko bilkuran, Foru Komunitatea erreferentziazko ekosistema sozioekonomiko gisa berrabiarazteko. 2019an proiektu horren inguruan hasitako hausnarketa- eta partaidetza-prozesuaren ondoren, Gobernuak ahalegin publiko eta pribatuak bilduko ditu, lurralde berritu, sendo eta finkoaren irudia indartzeko, Foru Komunitatearen barruan eta kanpoan konfiantza eta erakargarritasuna sortuko duena.

Helburua da inbertsio berriak erakartzea eta etorkizuneko Nafarroako bizi-kalitatea bermatuko duten gizarte-proiektuak bultzatzea; baita indarrean daudenak finkatzea ere, garapen jasangarriaren ikuspegitik. Aurreikusitako ekintzen artean, nabarmentzekoa da ildo horretan egindako hausnarketa laburbilduko duen identitate berri baten jaurtiketa.

Gaurko asteroko bilkuran, Nafarroako Gobernuak erabaki du aintzat hartzea Nafarroako Foru Komunitateko Administrazioko departamentuetan Nafarroako Markaren ezarpena bultzatzeko helburuaz Komunikaziorako eta Proiekzio Instituzionalerako Zuzendaritza Nagusiak orain arte egindako jarduerak; horrek esan nahi du proiektu honi behin betiko hasiera emango zaiola.

Felix Taberna lehen lehendakariorde eta Lehendakaritza eta Berdintasun kontseilariak nabarmendu duenez, Nafarroako Markaren proiektua “ez da gobernu proiektu bat, ibilbide luzeko herrialde proiektu bat baizik”. Horri dagokionez, herritarrei eta gizarte- nahiz enpresa-eragileei eskatu die euren ahaleginak batu ditzatela erakundeekin, Foru Komunitatearen irudia eta aberastasuna erakartzeko hala nola haren indarguneei eusteko gaitasuna berrindartzeko. Aldaketarako palankak lau izango direla gogorarazi du: “Nafarroako ondare historikoa, etorkizuna dena, bere aberastasun naturala, gizarte arkitektura konprometitua, gure ongizate adierazleekin, eta gure hizkuntz aniztasuna”.

Erronka kolektiboa

Hain zuzen, foru Exekutiboak gaur eman die oniritzia 2019ko eta 2021eko txostenetan oinarritutako egoeraren diagnostikoa eguneratzen duten hiru txostenei, zehaztutako estrategiari eta indartu nahi den kontakizunari, eta Nafarroako Markaren komunikazio- eta dibulgazio-ardatzen proposamenari.

Nafarroako Markak definitzen duen posizionamendu estrategiko berria Foru Komunitatearen interkonexioa eta erakarpen-gaitasuna bultzatzeko pentsatuta dago; Nafarroaren irudiaren funtsezko alderdia duten erakunde publiko eta pribatu guztien ahaleginak koordinatu eta bideratzeko; lurraldearen alderdi positiboak modu egiazkoan eta errealitatera egokituta zabaltzeko, hainbat kanalen bidez; eta barneko zein kanpoko irudia hobetzeko, zabaltzeko eta sustatzeko ardura duten politika instituzional aktiboak garatzeko.

Gaur lortutako akordioaren testuak jasotzen duenez, Nafarroako Marka proiektua “erronka kolektibo” gisa planteatzen da, nafar guztiak batzen dituzten elementuetan eta “elkarrekin egiten jakitearen balioak indartzean” oinarrituta. Komunikazioko eta Proiekzio Instituzionaleko Zuzendaritza Nagusiak hasieran egindako lanaren ondoren, Foru Komunitatearentzako irudi berri baten hedapenean inplikatu nahi dira Gobernuko beste unitate batzuek, baita funtsezko kolektiboak ere, esaterako unibertsitateak, tokiko sektoak, enpresa publiko eta pribatuak eta gizarte zibila.

“Aterki” komunikatibo komuna

Irudi grafiko berria eta “Prodigioso Volcán” enpresarekin (proiektuaren esleipenduna) lankidetzan azken hilabeteetan definitutako komunikazio-plana funtsezkoak izango dira ahaleginak bateratzeko.

Nafarroako Gobernuak arreta berezia jarriko du babes- eta publizitate-ekimenen koordinazioan, komunikazio-estrategia komun bat bilatuz, non Nafarroako Marka “aterki” gisa finkatuko den, perspektiba, baliabideak nahiz topaguneak eskainiz.

“Guztion eta guztiontzako proiektu bat da. Koordinazioaren bidezko posizionamendu hobeago batean oinarritutako etorkizuneko proiektua da. Funtsezkoa da ahaleginak ez sakabanatzea eta mezuetan koherentziari eustea Nafarroaren irudia eraikitzeko, haren proiekzioa hobetzeaz gain, errealitate politiko, sozial zein kulturala transmititu dezan, modernitate, dinamismo eta potentzia ekonomiko, hezigarri eta kulturalaren ezaugarriak tarteko izanik”, planteatzen du gaurko akordioak.

Foru Komunitatearen ezaugarri bereizgarrien artean, Nafarroako Marka berriak bere aberastasuna eta kontrasteak nabarmenduko ditu hainbat mailatan; kultura, nortasuna, sustraitzea eta tradizioak; kultura kooperatiboa, ohore zentzua, hitza, inplikazioa eta lana, baita bere bizi-kalitatea eta bi hizkuntza ofizialak ere. Lurralde ‘nortasunaren’ ezaugarri gisa, Nafarroaren irmotasuna, zintzotasuna, grina, osotasuna, irekitasuna eta izaera esploratzailea azpimarratuko dira.

Foru Komunitatea oparotasun-ingurune gisa erakutsiko da, berrikuntzaren kulturarekin, erantzukizunen betekizunarekin eta etekinarekin konprometituta, balio partekatuekin eta talentua erakartzeko eta kanpoko lankidetza-sareak ehuntzeko interesarekin.

2019an irekitako prozesua

Lurraldearen irudi berri bat martxan jartzeko lehen urratsak 2019. urtean eman ziren, Nafarroako markaren kudeaketari buruzko hasierako azterlan batekin. Gero, 2021ean, beste Analisi eta Esplorazio arloko azterketa bat amaitu zen, beste azterlan batzuetako informatzaileen eta erreferentzien informazio kualitatiboan oinarritua.

2023an zehar, Nafarroako Marka sustatzeko estrategia bat definitzeko lizitazio bat sustatu zen, Foru Komunitateari lotutako “Bizi Kalitatea” kontzeptuan oinarrituta. Kontzeptu hori behin eta berriz agertzen da aurretiazko txosten eta prozesu parte-hartzaileetan.

Urtarrilean, otsailean eta martxoan zehar, unibertsitateak, enpresaburuen konfederazio eta elkarteak, udal eta kontzejuen federazioa zein gobernuaren zuzendaritza nagusiak kontuan hartuz lan egin da, Nafarroako Marka berriaren funtsezko elementuak zehaztu, diseinatu eta proposatzeko.

Orain arte egindako prestaketa-lanari buruzko Foru Gobernuaren oniritzia jaso ondoren, Nafarroako Marka berria gobernuko departamentu orotan hedatzen hasteko ahaleginak egingo dira, eragile publiko eta pribatuekin lankidetzan. Aurreikuspena da Nafarroako irudi grafiko berria ekainaren erdialdean aurkeztea.