Lurralde Kohesiorako Departamentuak, Herri Lan eta Azpiegituren Zuzendaritza Nagusiaren bitartez, galtzada zabalduko du NA-4150 Leitza-Goizueta-Hernani errepideko bi bihurgunetan, ikuspena eta bide-segurtasuna hobetzeko.

Nafarroako Gobernuak, gaurko bilkuran, erabaki du premiazkotzat jotzea 4+780 eta 4+970 kilometro-puntuetan dauden bi kurba horiek hobetzeko obrek ukitutako ondasun eta eskubideak okupatzea, nahitaezko desjabetzearen ondorioetarako.

Jardueraren xehetasunak

NA-4150 errepidea oso bihurgunetsua da, eta Urumea ibaiarekiko paraleloan doa. Gaur egungo galtzadak, jardun beharreko bi errepide-zatietan, ez du baldintza egokirik, zabalera estua baitu eta oso erradio txikiak baititu.

Jarduketa errepidea zabaldu eta hobetzean datza, bi bihurgune zehatzetan, gutxi gorabehera 5 metroko galtzada-zabalera dutenak. Jarduketa berriarekin, galtzadaren zabalera handituko da, zirkulazioa eta ikuspena hobetuz.

Lehenengo bihurgunean, 10 metroko erradioa du eta 4+780 pk-an dago, hobekuntza-jarduketari esker, gainzabalera emango zaio ibilbide osoan, eta 7,40 metro inguruko zabalera izango du gehienez.

Bigarren bihurgunean, 14 metro inguruko erradioa du eta 4+97 pk-an dago, gainzabalera emango zaio ibilbide osoan, 6,50 metro inguruko zabalerara iritsiz.

Jarduketaren aurrekontua 360.518 eurokoa da.