Nafarroako Gobernuak gaur goizean aurkeztu ditu nekazaritzako edo abeltzaintzako ustiategi bati lotutako produktuen zuzeneko eta hurbileko salmenta ikusarazteko balioko duten zigilu berriak. Identifikazio berri hori Nafarroako Nekazaritzako Elikagaiak Merkaturatzeko Kanal Laburrei buruzko Foru Legeak jasotzen dituen neurrietako bat da. Lege hori iaz onartu zen neurri txikiko nekazaritza-ekoizpenei laguntzeko, lehiakortasuna hobetzeko eta dibertsifikazioa sustatzeko.

Berritasun nagusi gisa, legeak "hurbileko salmenta" deritzonaren bidez merkaturatzeko aukera jasotzen du, bitartekari bakarrak diren merkaturatze-puntuetarako. Hau da, dendek, harategiek, jatetxeek, jantoki kolektiboek edo nekazalturismoek erakutsi ahal izango duten bereizgarri berri horrek bermatzen du establezimendu horrek zuzenean erosi diola ekoitzi duenari.

Aurkezpen ekitaldian Jose Mª Aierdi Nafarroako Gobernuko Landa Garapeneko eta Ingurumeneko kontseilariak; Ruben Goñi Landa Garapeneko zuzendari nagusiak; Natalia Bellostas INTIAko zuzendari kudeatzaileak; Nerea Mortalena Arraiozko ardi ekoizleak eta Baztango Zaporeak ekoizleen elkarteko kideak; Xabier Barrutia, Barrutia 12 harategiaren jabeak eta Bertan Baztan, Baztango Merkatari, Ostalaritza eta Zerbitzu Enpresen Elkartearen ordezkaria; eta Belen Urrutia La Posada de Elbeteko ordezkariak parte hartu dute. Fernando Anbustegi Elizondoko alkatea ere aurkezpen-ekitaldian izan da, eta zuzeneko eta hurbileko salmentarako irudi korporatibo berria estreinatu duten establezimenduak bisitatu dituzte.

Aierdi kontseilariaren hitzetan, "zigilu berri horiekin, alde batetik, nekazaritza-ustiategien titularren eta azken kontsumitzailearen artean produktuak zuzenean edo hurbiletik merkaturatzea sustatu nahi da, bai lehen mailakoak bai eraldatuak, eta, bestetik, salmenta-kanal horiek ikusaraztea, sortutako identifikatzaile berriei esker".

"Gizarteak, gero eta gehiago, produktu horien jatorria ezagutzea eskatzen du, eta bertakoak, freskoak, sasoikoak eta kalitatezkoak izango diren ziurtasuna izan nahi du", adierazi du Natalia Bellostas INTIAko kudetzaileak. Seinaleztapen horrek produktu horien kontsumoa bultzatzen eta landa-eremuetako bizimoduari eta paisaiei eusten lagunduko diela azpimarratu du ere.

Anaia diren bi logotipo

Bi salmenta motek logotipo desberdinak dituzte, eta bakoitzak euskarazko eta gaztelaniazko izenak eta kolore desberdinak ditu. Horrela, "zuzeneko salmenta" urdina da, eta "hurbileko salmenta" berriz, horia, biak ere hiru elementu grafikotan oinarrituta garatuak: geolokalizazioaren ikonoa, norabidearen data eta landa-paisaia.

Seinaleztapen berri hori establezimenduetako sarbideetan, errepideetako eta bidegurutzeetako sarbideetan edo inguruetan jarri ahal izango da, salmenta-puntu horiek non dauden adierazteko. Era berean, logotipo horiek zuzenean nekazaritza-ustiategiari erositako tokiko produktu hori duten jatetxe edo sukaldaritza kolektiboko menuetan erakutsi ahal izango dira. Logotipo horiek erabiltzea borondatezkoa da, eta beti izango da bateragarria nekazaritzako elikagai horien kalitate-markekin.

Kanal laburren erregistroan izena ematea

Identifikazio berri horri esker, azken kontsumitzaileek produktuaren jatorriari eta merkaturatze-motari buruzko informazioa jaso ahal izango dute, eta, horrez gain, ekoizleek hainbat abantaila izango dituzte merkaturatze-kanal laburren erregistroan izena emanda. Horrela, logotipoari eta garatzen ari den web orri berri bati esker gehiago ikusarazteaz eta sustatzeaz gain, bi salmenta-kanal horiek bultzatzeko laguntzak izango dituzte eta merkaturatzeari buruzko prestakuntza jasoko dute.

Bestalde, bai nekazaritza-ustiategiek, bai inskribatutako establezimenduek, Nafarroako Gobernuaren konpromisoa dute beren produktuak Turismoaren sustapen-ekintzen bidez merkaturatzea sustatzeko, edo Kanal Laburren Foru Legearekin lotutako gaietan solaskide izateko.

Legearen beste berrikuntza batzuk

Legeak mugatu egiten du kanal laburren bidez merkaturatu dezakeen nekazaritza-ustiategiaren gehieneko tamaina. Ustiategiek Nafarroako Nekazaritza Ustiategien Erregistroan izena emanda egon behar dute, eta ez dituzte bost NLUak (nekazaritzako lan-unitatea) gainditu behar. Elkarteentzat, lehentasunezkotzat kalifikatuta egon behar dute, eta ez hamar NLUtik gorakoak. Horrela, ustiategi txikiei lehenetsi egin nahi zaie.

Gainera, merkaturatzea Nafarroako Foru Komunitatearen eremura mugatuta izan behar da, edo nekazaritza-ustiategitik gehienez 100 km-ra.

Nekazaritzako elikagaiak merkaturatzeko bide laburren erregistroak ordezkatu egiten du nekazaritzako eta abeltzaintzako ustiategiari lotutako produktuak zuzenean saltzen dituzten Nafarroako nekazaritzako elikagaien operadoreen errolda. Tresna horren bidez, dinamizazio- eta sustapen-jarduerak egin ahal izango dira, bai eta merkaturatutako ekoizpen-bolumenari eta -motari buruzko informazioa lortu ere; horri esker, Administrazioak hobeto kudeatu eta bultzatu ahal izango du merkaturatze-kanal mota hori.