Nafarroako Gobernuko Ingurumen Zuzendaritza Nagusiaren Klima Aldaketaren Bulegoa prestakuntza-programa bat zabaltzen hasi da Bigarren Hezkuntzako ikastetxeen artean, klima-aldaketak hainbat eremutan – ura, basoak, nekazaritza, osasuna edo hirigintza – izaten ari den inpaktu nabarmenari eta arlo horietako bakoitzean ondorio horietara egokitzeko egiten ari diren ekintzei buruz gehiago jakiteko, LIFE NAdapta esparruan.

Landa Garapeneko eta Ingurumeneko kontseilari Jose Mª Aierdik ekimen hau aurkeztu du gaur Sarrigurengo BHIn, programa hau hartzen duen lehen zentroan, hala eskatzen duten institutu guztietara zabaltzeko. Ikasle talde batekin partekatu duen ekitaldian, kontseilariak nabarmendu du “garrantzitsua” dela “gure etorkizunerako gazteenak informatuta egotea eta dauden larrialdi klimatikoaren egoerari buruz jabetzea, eta gure bizitzeko, kontsumitzeko, mugitzeko, lantzeko eta ingurune naturalarekin harremanetan jartzeko modua aldatzeko beharraz jabetzea, zientifikoki egiaztagarria eta neurgarria den errealitate batera egokitu ahal izateko, gezurren edo fakes negazionisten gainetik”.

Prestakuntza programa Sarrigurengo institutuan txertatu da, zentroa aste honetan garatzen ari zen klima-aldaketari buruzko unitate didaktiko baten barruan. Bertan, 10 informazio-panel azaldu dira, klima-aldaketa Nafarroan izaten ari den eragin zehatzei eta ezartzen ari diren egokitzapen-estrategiei buruzko ibilbide bisual eta dibulgatiboa eskaintzen dutenak. Horiekin batera, Ingurumeneko teknikariek bost dibulgazio-hitzaldi eman dituzte –25 minutukoak bakoitza, euskaraz eta gaztelaniaz- ondoren, institutu honetako DBHko hainbat gelatan partekatzeko. Hitzaldi horietan, ikasleak galderak egitera, ekarpenak egitera edo iritziak gurutzatzera animatu dira.

Ekitaldian Landa Garapeneko eta Ingurumeneko kontseilariak eta Klima Aldaketaren Bulegoko zuzendariak parte hartu dute, baita ikastetxeko zuzendaritza-taldeak ere. Javier Goikoetxea zuzendariak adierazi duenez, "klima-aldaketak pertsona guztiei eragiten digu, baita, nola ez, ikasleei ere, eta horregatik eskertzen diot Life NAdapta proiektuari datu fidagarriak eta zorroztasun zientifikoa ematea, gazteenek, beren hizkuntzan, larrialdi klimatikoaren errealitatea azter dezaten. Sarrigurengo institutua eskola jasangarrien sarearen parte da, eta gure programan garapen iraunkorrarekin lotutako hainbat gai ditugu txertatuta, eta garrantzitsua da klima-aldaketaren errealitatea izatea hezkuntza-ikuspegi horren ardatza".

Guztira, DBHko 1. Mailako 246 ikaslek hartu dute parte astearte honetan emandako 5 hitzaldietan.

Egokitzapen-neurriei buruzko panel grafikoak

Erakusketak agerian jartzen ditu, 10 paneletan zehar, zeintzuk diren klima-aldaketaren ondorioak (esaterako bero-bolada gogorragoak, euri-jasen eta uholdeen maiztasun handiagoa, lehorte ohikoenak, suteak areagotzea edo airearen kalitatea hondatzea, besteak beste), bai eta Nafarroak LIFE IP NAdapta-CC proiektuaren bidez abian jarri dituen ekintzak ere, gure erkidegoa hobeto egokitu dadin eremu bakoitzean espero diren aldaketa horietara, barne hartuz halaber ura, basoak, nekazaritza eta abeltzaintza, osasuna, azpiegiturak edo tokiko monitorizazioa eta ekintza klimatikoa.

Erakusketa hiru hizkuntzatan dago eskuragarri (gaztelaniaz, euskaraz eta ingelesez), doan eska daiteke eta ikastetxeetan, liburutegietan, gizarte-etxeetan, udal-guneetan eta komunitateko beste leku batzuetan erakusteko pentsatuta dago. Helburua da herritarrak sentsibilizatzea, berotze globalaren ondorioak mugatzeko eta eskura dauden irtenbideei buruzko kontzientziazio handiagoa sustatzeko jardutearen garrantziaren inguruan.

Klima-aldaketara egokitzeko LIFE IP NAdapta-CC proiektua Europar Batasunak finantzatutako eta Foru Gobernuko Ingurumeneko Zuzendaritza Nagusiak gidatutako ekimena da, eta Foru Komunitatean klima-aldaketaren aurreko erresilientzia hobetzea du helburu, hainbat arlotan zenbait neurri ezarriz, esaterako nekazaritza birsortzailean, uraren kudeaketan, osasunean, basoetan edo lurralde-plangintzan eta etxebizitzan.

Ikastetxeek eta beste interesdun batzuek doan eska dezakete erakusketa, beren espazioan instalatu ahal izateko eta arazo horri buruz ikasten eta hausnartzen laguntzeko. Gainera, Nafarroako Klima Aldaketaren Bulegoak aukera ematen du erakusketa osatzeko hitzaldi edo tailer espezifikoren bat egiteko klima aldaketari buruz oro har, klima-aldaketara egokitzeari buruz Nafarroan edo LIFE IP NAdapta-CC proiektuak lantzen dituen sektore zehatzetako batean egokitzeari buruz. Informazio gehiago nahi izanez gero edo erakusketa eskatzeko, interesdunak honako helbide elektroniko honen bidez jar daitezke harremanetan: cambioclimatico@navarra.es.