Nafarroako Gobernuko Lehendakariorde eta Memoria eta Bizikidetzako, Kanpo Ekintzako eta Euskarako kontseilari Ana Ollok, Lucas Vallecillos argazkilariaren "Hiroshima eta Nagasaki: historiako eraso atomiko bakarrak" argazki-erakusketa bisitatu du. Memoria historikoaren ikuspegia duen ikus-entzunezko saiakera bat da, bakearen kultura sustatzen duena eta giza eskubideen urraketa salatzen duena. Erakusketa duela 80 urteko Hiroshima eta Nagasaki hiri japoniarretako bonbardaketa atomikoei buruzko argazki-saiakera bat da, 1945eko abuztuaren 6an eta 9an jasandakoak hurrenez hurren, herritar guztiei armamentua ezabatzeko beharraz hausnartzeko gonbita egiten diena.

Memoria eta Bizikidetzako Zuzendaritza Nagusiak Memoria, Bizikidetza eta Giza Eskubideei buruzko "Begirada bat arteetatik" IX. Jardunaldien testuinguruan antolatutako erakusketara hainbat ikastetxetako ikasleak hurbildu dira. Zehazki, Ollo lehendakariordeak Julio Caro Baroja BHIko DBHko 4. mailako ikasleekin partekatu du bisita. Lehendakariordeak belaunaldi gazteenen aurrean azpimarratu duenez, “memoria aktiboa lantzea garrantzitsua da, inplikaziotik abiatuta, banakako zein taldeko analisiak eta hausnarketak eginez, "ez errepikatzeko bermearen alde lan egitea gizarte osoari dagokigu. Horretarako, ezagutzea ezinbestekoa da, baina ez nahikoa, giza eskubideen urraketen aurreko konpromisoan haratago joan behar da".

Erakusketa bi bloketan banatzen da. Lehenengoak, "Testigantzak" izenekoak, aurpegia jartzen die bonbardaketa atomikoei. Bonba atomikotik bizirik atera ziren 8 hibakusharen edo bizirauleen erretratuak eta testigantzak. Bigarren blokea, "Gaur" izenekoa, bi hirien egungo erretratua da, oraina bizi dute, iragana ahaztu gabe, eta erresilientziaren adibide dira. Irudi-sail honek irudimen kolektiboa piztu nahi du, 1945eko abuztuko bonbardaketa atomikoetatik Hiroshima eta Nagasakiri jazartzen zaien estigma gainditzen saiatzeko.

"Hiroshima eta Nagasaki: historiaren eraso atomiko bakarrak" erakusketa apirilaren 8ra arte egongo da ikusgai Iruñerriko Mankomunitatearen egoitzako Pinaquy aretoan, Salestarren komentuko eliza zaharrean. Bisita asteartetik ostiralera 18:00etatik 20:30era, larunbatetan 11:00etatik 13:30era eta 18:00etatik 20:30era eta igandeetan 11:00etatik 13:30era egin daiteke. Apirilaren 12tik (larunbata) apirilaren 27ra (igandea), San Andres errotako interpretazio zentroan (Atarrabia) kokatuko da, honako ordutegian: larunbat, igande eta jaiegunetan, 11:00etatik 21:30era.

Lucas Vallecillos argazkilaria

Geografian lizentziatua Bartzelonako Unibertsitatean, eta fotokazetaritzako graduondokoa Bartzelonako Unibertsitate Autonomoan (BUA), argazkilari profesionala da 2000. urteaz geroztik, eta erreportaje dokumentaletan espezializatuta dago lankidetzan, giza eskubideak, antropologia, geografia zein natura bezalako gaietan. Gaur egun, BUAko Fotokazetaritza Graduondoko irakaslea da, eta bere erreportajeak National Geographic, GEO, Lonely Planet magazine, El País, El Periódico, El Mundo, Ashahi Shimbun, Altair, La Repubblica, The Guardian, The New York Times, The Wall Street Journal bezalako hedabideetan agertu dira.

Argazkilariak Iruñea bisitatzen duen hirugarren aldia da. 2021eko azaroan Vallecillos Iruñean izan zen "Arrapatuak. Infantzia ustiatuak" erakusketarekin, eta 2024ko otsailean "Larrialdi klimatikoa. Ezinbesteko erronka soziala" lanarekin.

"Begirada bat arteetatik" jardunaldiak

Memoriari, Bizikidetzari eta Giza Eskubideei buruzko "Begirada bat arteetatik" IX. Jardunaldiak aurrera doaz.. IES Navarro Villosladako Antzerki Tailerraren “Personajas. "remake-a” antzezlanerako eta pertsonen salerosketari buruzko dtproject-en "Valientes" kontzerturako doako sarrerak eskuragarri daude jada Baluarteko leihatilan. Jardunaldietako jarduerei buruzko informazio guztia Memoria eta Bizikidetzako Zuzendaritza Nagusiaren webgunean kontsulta daiteke.