Lurralde Kohesiorako Departamentuak, Herri lanen eta Azpiegituren Zuzendaritza Nagusiaren bitartez, Elizondotik N-121-B errepiderako sarbide zuzena eraikitzeko lanak egin ditu, 670.000 euroko inbertsioarekin. Jarduketa horri esker, saihestu egingo da ibilgailuek herriko ipar-mendebaldetik beste distantzia bat egin behar izatea egungo saihesbidera Iruñerako noranzkoan iristeko.

Sarrera berria Foruzain-etxearen alboko Menditurri kaletik abiatzen da. Lehenengo zatia, N-121-B errepidearen azpiko pasabidera iritsi arteko 170 metroko luzera, 6 metroko galtzada eta 1,80 metroko espaloia dituen hiri-bide bat da. Haren atzetik, 130 metroko luzera duen adar bat dago, N-121- B errepidearekin bat egiteko trantsizio-adar gisa balio duena, 50+040 puntu kilometrikoan. Azken zatian, 4 metroko zabalerako galtzada bat dago, metro bateko ezkerreko bazterbidea eta 1,5 metroko eskuineko bazterbidea dituena.

Bideetan baimendutako abiadura 30 km/h-koa da, eremua erdi-hiritarra izateagatik. N-121 B errepideak, gaur egun Elizondoko saihesbidea denak, 80 Km/h-ko abiadura-muga du, eta ia 4.000 ibilgailuko batez besteko intentsitatea 42+970 puntu kilometrikoan eta 3.000 ibilgailukoa 54+580 puntu kilometrikoan; horietatik % 3 trafiko astunari dagokio.

Bisitan izan dira Chivite kontseilaria, Pedro López Herri Lan eta Azpiegituren zuzendari nagusia, Guillermo Vallejo obra-zuzendaria, Rubén Dallo Obrak Egin eta Kontrolatzeko Bulegoko burua, Fernando Anbustegi Baztango alkatea, Florentino Goñi Herri Lanetako zinegotzia, Aitor Bazterrika Elizondoko alkatea, Marcelino Martín-Buitrago obra-burua, eta Miguel Mariezcurrena ‘Obras Especiales Edificación e Infraestructuras, S.A.U.’ enpresako obra-arduraduna.

Elizondoko komisariarako sarbide arinago eta eraginkorragoa
Azpiegitura berri honi esker, Elizondoko Foruzain-etxetik saihesbiderantz zuzenean sar daiteke; horrek polizia gorputzaren jarduna arinagoa eta eraginkorragoa izatea erraztuko du, herritarren segurtasuna areagotuz. 

Gainera, gogoratu behar da Elizondok ez zuela zuzeneko irteerarik saihesbidera; beraz, inbertsio honen eskutik, Lurralde Kohesiorako Departamentuak erantzuna ematen dio zerbitzu publikoen hobekuntzan, turismoentzako alternatiba azkar eta seguruago batean eta Nafarroako errepide-sarearen garapena sustatzen jarraitzeko apustuan islatuko den eskaera bati.