Foru Gobernuak bultzada berri bat eman die, gaurko bilkuran, Mutiloako eta Iruñeko errondaren arteko loturan biribilgune berri bat eraikitzeko eta Elizondon Baztan ibaiaren gainean zubi berri bat jartzeko, udalerrira sartzeko eta bertatik irteteko puntu berri bat sortzeko, beharrezko izapideei. Lurralde Kohesiorako Departamentuak sustatutako bi esku-hartze dira, Nafarroako bide-sareko bi puntu horietan segurtasuna handitzeko eta trafikoaren arintasuna hobetzeko.

Bi obrak lehenbailehen hasi ahal izateko, Foru Gobernuak urgentziazkotzat jo du ukitutako ondasun eta eskubideak okupatzea, nahitaezko desjabetzea egin ahal izateko. Ondasun eta eskubide horiek erosteko zenbatetsitako gastua ere ezarri du, 3.705,28 eurokoa Aranguren Ibarreko obraren kasuan, eta 211.005,48 eurokoa Elizondoko esku-hartzearen kasuan.

Aranguren Ibarrean aurreikusita dagoen biribilgune berriaren helburua da X formako elkargunearen tipologia aldatzea, gaur egun NA-2310 errepidea PA-30eko Noainerako noranzkoan galtzadaren irteera eta sarrerako adarrekin lotzen denean. Horren ordez, glorieta motako elkargune bat jarriko da, STOP geldialdiak egin behar diren egungo ezkerrerako birak kentzeko. Horrela, eremuan trafikoa seguruagoa eta arinagoa izatea lortuko da.

Bigarren proiektuak Irurita-Elizondoko saihesbidea NA-8307 (lehengo N-121-B) errepidearekin lotzeko zubi bat eraikitzea aurreikusten du, baita hori egiteko obra osagarriak ere. Helburua da herrira sartzeko adar berri bat prestatzea, bide berri bat eraikiz, Baztanberriko plazan dagoenaren jarraipena, Baztan ibaiaren eskuineko ertzean. Adar horrek tipologia mistoko zubi baten bidez gurutzatuko du ibaia bere bao nagusian, eta zubi hori gaur egungo NA-8307 errepidera iritsiko da. Zubi horrekin biribilgune baten bidez lotuko da, hiri-bideetako trafikoa saihestuz, eta, ondorioz, bide-segurtasuna hobetuz.

Azterlan eta Proiektuen Zerbitzuak egindako txostenen arabera, bi esku-hartze horiek dakartzaten hobekuntzen ondorioz, komeni da obrei ahalik eta lasterren ekitea. Horregatik, lehenbailehen okupatu behar dira ukitutako ondasun eta eskubideak, obrak egiteko behar diren lurrak eskuratzeko izapideak arintzeko.