Nafarroako Lehendakari María Chivite Navascués IkasNOVA Hezkuntza Digitalizatzeko Plan berriaren aurkezpenean izan da gaur. Plan horrek aurrera egin du Foru Gobernuak hainbat ekintzaren bidez Nafarroako hezkuntzaren eten digitala murrizteko bultzatutako ekintzetan, besteak beste, azken 5 urteetan 60 milioiko inbertsioa egin da ikaskuntzarako teknologian.

Chivite presidenteak, Carlos Gimeno Hezkuntzako kontseilariak, eta Luis Calatayud Lanbide Heziketako, Digitalizazioko eta Hezkuntza Zerbitzuetako zuzendari nagusiak planaren ildo nagusiak zehaztu dituzte Baluarten egindako ekitaldi publiko batean. Ekitaldi honetan izan dira, Alicia Echeverría Gobernuak Nafarroan duen ordezkaria eta hezkuntza-komunitateko ehun bat kide. Gainera, lau ikastetxek online parte hartu dute jardunaldian (CPEIP Paderborn, BHI Mendillorri, BHI Ribera del Arga eta Etxarri Aranazko CPEIP San Donato), hezkuntza-sare publiko osoak egiten duen lanaren adierazle gisa.

Bere mintzaldian zehar, Chivite Lehendakariak hezkuntzan digitalizazioa barne hartzearen garrantzia defendatu du, izan ere, “eskolak bere garaiko baliabide eta formekin irakasten du, eskolak eta metodo pedagogikoak mundua aldatzen den erritmoan aldatzen direlako eta ikasleei “prestakuntza hobeago bat” ematea ahalbidetuko dutelako. Horrez gainera, zehaztu du teknologia ez dela “berez helburua”, “sormena ulertzen eta bideratzen laguntzen digun tresna bat” baizik.

IkasNOVAk helburu hauek ditu: irakasleen eta ikasleen gaitasun digitala garatzea, digitalki gaituak diren ikastetxeak garatzea, eduki digitalak sortzea eta behar bezala berrerabiltzea, eta zerbitzuak, azpiegiturak eta ekipamenduak hobetzea eta modernizatzea.

Planaren garapenerako, Nafarroako Gobernuak azken urteotan eta bereziki 2018tik garatu izan dituen ekimen guztiak hartu dira kontuan, Irakaskuntzako Gaitasun Digitalaren Erreferentzia Esparruaren, Europako erreferentzia-esparruen eta hezkuntza-sistema digitalizatzeko Estatuko programen orientabideei jarraituz.

Gainera, proposamen berriak, gero eta teknologikoagoa eta globalizatuagoa den mundu baten erronkei aurre egiteko prestatzeaz gain, inklusioa eta aukera-berdintasuna sustatzen ditu, azken belaunaldiko baliabide eta tresna digitalen erabilerarako sarbidea bermatzen baitu, ikaskuntza-prozesua aberasten duten eta hezkuntza-giro interaktiboagoa hala nola dinamikoagoa sustatzen duten metodologia berritzaileak ezartzeko aukera emanez. Horren harira, María Chivitek ziurtatu du planak bermatzen duela “teknologiak ez duela arrakala berririk ekarriko”, zeren “ikasle guztiek, eros-ahalmena, desgaitasuna, Iruñako erdigunean edo 30 biztanleko herri batean bizi izatea bezalako ezaugarriak tarteko izanik ere, aukera berberak izango dituzte”.

Ekimen berriak

Plan honek, besteak beste, STREAM-AI Pentsamendu Konputazionaleko Zentroen Sarea sortzea aurreikusten du. Sare hori, hasiera batean, Foru Komunitate osoko 25 ikastetxek osatuko dute, eta pentsamendu konputazionala hezkuntza-curriculumean txertatzea du helburu, ikasleei aro digitalaren erronkei aurre egiteko beharrezko tresnak eta trebetasunak emanez. Sare honek barne hartzen ditu, besteak beste, adimen artifiziala, zibersegurtasuna, ziberbizikidetza, robotika, domotika, 3D inprimaketa eta errealitate hedatuak landu dituzten zentroak. Sare horren garapen-eremuen funtsezko alderdi bat inklusioa eta aniztasuna bultzatzea eta genero-arrakala murriztea izango da.

Jardunaldian, gainera, IkasNOVA Hezkuntza Digitalizaziorako Baliabideen Zentroa ezagutzera eman da. Zentro hori Hezkuntzak IKT Teknologia eta Azpiegituren Zerbitzuko aholkularitzek eta mentoriek osatuko dute.

Zentro honen garapen-esparruetako batzuk izango dira eduki digitalak sortzea eta ebaluatzea, hezkuntza-baliabideen online biltegia, baliabide-bankuen mantentzea, lankidetza-sareak eta tresna digitalen pilotajea, gero eta digitalizatuagoa den gizarte batera egokitzeko, aurrerapen teknologiko azkarrekin eta etengabeko aldaketekin. Horrez gain, softwarearen eta hardwarearen euskarri teknikoa, EDUCA informazio-sistema, kudeaketa akademiko integrala eta Internet bidezko hezkuntza-jarraipena ahalbidetzen dituen Nafarroako hezkuntza-komunitatearen zerbitzu aurreratuen plataforma ere jasoko ditu.

Azpiegituren eta irakasleen gaikuntza digitalaren sustapena

Digitalizazio Plan berriaren beste zutabeetako bat azpiegitura eta ekipamendu teknologikoetan egindako inbertsioa da, urteak baitaramatza garatzen. Izan ere, 2019. urtetik 60 milioi euro baino gehiago inbertitu izan dira teknologian ikasten funts propioen hala nola Europako Next Generation funtsen bidez.

Gaur egun, Nafarroak 72 IkasNOVA gela ditu, ikaskuntza aktibo eta malgua ahalbidetzeko teknologia duten hezkuntza-espazioak, eta 103 izango dira 2024-2025 ikasturtearen amaierarako, Departamentuak aurreikusitakoaren arabera. Horrez gainera, Nafarroako hezkuntza sistema publikoak 77.968 ordenagailu, chromebook, eramangarri, tableta eta beste elementu digital batzuk ditu. Era berean, 3.623 ikasgela digital interaktibo daude eta, horri esker, ikasgela publiko guztiek, Lehen Hezkuntzako 4. mailatik Batxilergoko 2. mailara arte, teknologia interaktibo berriak dituzte.

Irakasleen gaikuntza digitala garatzea halaber funtsezkoa da hezkuntza digitalizatzeko. Horretarako, A1 mailatik edo oinarrizko mailatik C2 mailara edo aurreratuenera hezitzaileen gaitasun digitala egiaztatzen duen prestakuntza-ibilbide berri bat garatu da. Chivite Lehendakariak adierazi duenez, ekimen honi esker, irakasleen % 80 dagoeneko hasi dira prestakuntza jasotzen.