Nafarroako Gobernuko Eskubide Sozialetako, Ekonomia Sozialeko eta Enpleguko Departamentuak laguntzen deialdia onartu du Foru Komunitateko sindikatuentzat, laneko arriskuak prebenitzeko proiektuak abian jartze aldera, 400.000 euroren truke.

Deialdiaren xedea da Nafarroan lantokia duten enpresetan prebentzioaren kultura sustatzea, eta laneko ezbehar-tasa murrizten laguntzea. Erkidegoko enpresa eta administrazio publikoetan ordezkarien % 10 duten sindikatuek pate hartu ahal izango dute.

Zehazki, erakunde bakoitzeko proiektu batera arteko dirulaguntza emango da, eta diruz lagun daitezkeen gastutzat hartuko dira arlo horretan espezializatutako langile teknikoak kontratatzearen ondoriozkoak, 50.000 euro arte urte osoan lanaldi osoan kontratatako pertsona bakoitzeko. Era berean, administrazio-langileen gastuak, langileen joan-etorriak eta eginbeharreko ekintzekin lotutako edukiak zabaltzeko beharrezkoak direnak ere hartuko dira kontuan. Nolanahi ere, diruz lagundu daitezkeen proiektuak iazko abenduaren 1etik aurtengo azaroaren 30era bitartean garatu behar dira.

Eskaerak aurkezteko epea apirilaren 24an amaituko da, eta nahitaez telematikoki izapidetu beharko dira, Nafarroako atariko izapideen katalogoko fitxa honen bidez.

Deialdi honek eguneratu egiten du 2024an onartu zena. Haren bidez, 355.009,43 euro eman zitzaizkien UGTk, CCOOk, ELAk eta LABek aurkeztutako hainbat proiekturi, laneko arriskuen arloko sentsibilizazio-, aholkularitza- eta informazio-ekintzak barne.

Sindikatuek egindako jardueren artean, adibidez, langileek lan-osasunaren arloan egindako kontsultak ebaztea bultzatu den, arrisku psikosozialak, kontingentzia-aldaketak edo lan-arriskuen prebentzioa bezalako gaietan. Halaber, iaz onartutako laguntzen bidez prestakuntza-jardunaldiak antolatu ziren langileentzat eta prebentzio-ordezkarientzat.

Bestalde, komunikabideen bidezko zabalkunde-ekintzak ere diruz lagundu ziren, prebentzioaren kultura zabaltzeko, bai eta ezbehar tasari buruzko txostenak egiteko ere.

Enplegu Plana, ezbehar-tasaren aurka

Dirulaguntzen deialdi hau Jaurlaritzak eta gizarte-eragileek sinatu berri duten 2025-2028 Enplegu Planaren ekintza-ardatz estrategikoetako baten barruan kokatzen da. Plan horretan, laneko ezbehar-tasa murriztea lehentasunezko helburuen artean dago. Izan ere, % 20ko murrizketa ezarri da, neurri integralekin enpresaren eremuan eta sindikatuetan.