Oscar Chivite Nafarroako Gobernuko Lurralde Kohesiorako kontseilariak iragarri du onartu egingo duela Belateko tunel berria eta Almandozeko tunel berria lotzen dituen zatia eraikitzeko proiektua. N-121-A errepidea bikoizteko beste urrats bat, Nafarroako Gobernuak “asmo handiko eta lehentasunezko” bide-azpiegitura horrekin duen “konpromisoa indartzen” duena. 

Obren aurrekontua 18,7 milioi eurokoa da, eta aurreikusitako egikaritze-epea 20 hilabetekoa. Oraingoz, obrak datozen asteetan lizitatuko dira, eta horrela “inbertsioek eta horien gauzatzeak etenik ez duen proiektuei jarraipena emango diegu”, zehaztu du Chivite kontseilariak.

Lurralde Kohesiorako Departamentuko titularrak nabarmendu duenez, N-121-A errepidea bikoiztea “Nafarroako errepide sareko azken aldiko proiekturik handizaleenetako bat da, eta hala islatzen ari dira martxan dauden inbertsioak”. Sunbillarako lotura berriaren proiektua idazteko eta Arraitzeko Bentetako saihesbidea eraikitzeko proiektua idazteko egin berri diren lizitazioak gogorarazi ditu. Laster, Burutaingo saihesbidea esleitzea aurreikusita dagoela aurreratu du.

“Foru Komunitatean mugikortasuna eta segurtasuna erraztea eta lehiakortasunean irabaztea da gure helburua. Horretarako, 2019an, aurrekaririk gabeko obra plan bati ekin genion, N-121-A errepidetik hasita, Nafarroan jende gehien dabilen eta trafiko gehien duen bideetako batetik, esanez amaitu du Chivitek.

1,6 kilometro eta 210 metroko biaduktua
Tunel berriak lotzeko proiektatutako obrek egungo galtzada bikoiztea eta biaduktua eraikitzea aurreikusten dute. 1,6 kilometroko zatia izango da, eta nabarmentzekoa da 210 metroko luzera eta 27 metroko altuera izango dituen zubibidea eraikitzea.

Proiektuaren deskribapen teknikoak egungo galtzadaren eskuineko ertzetik lur-erauzketa egitea proposatzen du, hormigoizko hesi batez bereizteko bi galtzada egiteko adinako zabalgunea izan dadin. Zabalduta dagoen galtzada berria egungo errepidearen eskuinaldean kokatuko da, lur-erauzketaren zatian, eta gaur egun Iruñeko noranzkoan zirkulatzeko erabiliko da.

Zubibide berriaren egitura sei baotan oinarrituko da. Aukeratutako konponbide integralak Goldaburu errekaren ibilgu naturalari eragingo liokeen altuera handiko lubeta egitea saihestuko du. Biaduktua etorkizuneko Almandozeko tunelaren inguruan kokatuko da, eta tunelaren hegoaldeko ahoa dauden tunelen eskuinaldean geratuko da. Bai Belateko tunelaren eta bai Almandozeko tunelaren ahoek bat egiten duten tokian, galtzadak banandu egiten dira tunel horiekin ahokatzeko, baina tartearen gainerako zatian berdintzea partekatzen dute, eta elkarren ondoan doaz.

Tarte horretan zehar harri-lubetari eusteko hormak egingo dira, lur-erauzketako ezpondak egonkortzeko eta luizien aurrean babesteko neurriak hartuko dira, eta Mendiola auzora sartzeko bideak berrituko dira.