Nafarroako Gobernuak ekintzailetzan inbertitzeko 160.000 euroko laguntzak deitu ditu Pirinioetako Planaren barruan, erdia aurten eta beste erdia hurrengoan, Toki Administrazioaren eta Despopulazioaren zuzendari nagusiaren ebazpena Nafarroako Aldizkari Ofizialean argitaratuz.

Lurralde Kohesiorako Departamentuaren deialdi honen xedea da Pirinioetako Planaren aplikazio-eremuan pertsona fisiko eta juridikoek inbertsio produktiboko proiektuak egin ditzaten sustatzea. Bere helburu nagusia da lurraldean jarduera ekonomikoa dinamizatzea eta enpleguaren jarraipena eta sorrera bultzatzea, baita berrikuntza ere, jadanik dauden enpresak garatuz eta hobetuz, edota ekimen ekintzaile berriak sortuz eta martxan jarriz.

Laguntzak eskatu ahal izango dituzte 2024 eta 2025 urteetan Pirinioetako Plana aplikatzen den lurraldean inbertsio edota jarduera produktiboak egiteko interesa duten pertsona fisikoek zein juridikoek. Mikroenpresetara (10 langiletik behera, 2 milioi euro baino gutxiago fakturatzea eta bere balantzean 2 milioi euro baino gutxiagoko aktiboa izatea) eta enpresa txikietara (10 milioi euro baino gutxiago fakturatzea, 50 langile baino gutxiago izatea eta bere balantzean 10 milioi euro baino gutxiagoko aktiboa izatea) zuzenduta dago.

Honako gastuak lagundu ahal izango dira diruz: ondasun higiezinak erostea; ondasun higiezinak eraikitzea edo hobetzea (behar berriarekin egokitzea ahalbidetzen duten inbertsioak, konponketa xumeak eta mantentze-lanak izateko beharrik izan gabe); ekipamendu-ondasunen hornidura (makineria eta ekipo berriak erosi eta instalatzea, ekipo informatikoak, tresneria, altzariak, eta garraiorako edo banaketarako egokitzapena); eta b eta c atalei lotutako kostu orokorrak (proiektuaren idazketak, obra-zuzendaritzak, analisiak, entseguak, muntaia- eta eragiketa-ingeniaritza, prestakuntza- eta/edo informazio-jarduerak, bideragarritasun- eta merkatu-planak eta -azterlanak, aholkularitza juridiko eta finantzarioa, peritazioa, ingurumen-aholkularitza eta ekonomia- eta ingurumen-iraunkortasunari buruzko aholkularitza).

Diru-laguntzaren xede diren proiektuak gauzatzeko aurtengo epea 2024ko urtarrilaren 1etik urriaren 31ra bitartekoa izango da. Ekitaldi bakoitzean proiektu bakoitzeko diruz lagunduko den gehieneko kopurua, aurkeztutako proiektuaren guztizko kostua alde batera utzita, % 80koa izango da, gehienez 15.000 euro artekoa eta gehienez 30.000 euro artekoa, bi urteetan.

Toki-erakundeen ekintzak

Pirinioetako Planaren lurralde-eremuan egiten den bigarren deialdia da hau. Eta aurten argitaratu da NAOn, 2024an Plan horrekin lotutako ekintzak gauzatzeko toki-entitateei diru-laguntzetarako deialdia egin ondoren. Aurtengoa, 2020an abian jarri ziren laguntza horien bosgarren deialdia izan da; eta aurten haren zuzkidura % 33,3 hazi da, iazkoarekin alderatuta, 120.000 eurora iritsi arte.

Deialdiaren helburua da Pirinioetako Planaren lurralde-eremuan izena emanda dauden toki-erakundeei diru-laguntzak emateko araubidea ezartzea, erakunde horien helburu eta proposamenekin lotutako ekintzak finantzatzeko. Planean planteatutako eskaerei eta premiei erantzuten lagunduko duten ekintzak diruz lagunduko dira, honako sektore-eremu hauetan koka daitezkeenean: turismo jasangarria, hurbileko merkataritza eta zerbitzuak; industriak, ekintzailetza berdea eta lurralde-garapen jasangarria, abeltzaintza, nekazaritza hala nola basogintza; etxebizitza, garraioa eta azpiegiturak.

Diru-laguntza justifikatutako gastu subentzionagarrien % 80koa izango da, baldin eta proiektua tokiko erakunde batek banaka aurkezten badu, gehienez 15.000 euroko diru-laguntzarekin, eta % 90koa eta 20.000 euroko mugarekin, 2 toki-erakundek edo gehiagok edo bestela mankomunitate batek aurkeztutako proiektuen kasuan.