Amparo López Barneko, Funtzio Publikoko eta Justiziako kontseilariak Tafallako suhiltzaileen eskualdeko parke berria eraikitzeko lanak hasi diren gunea bisitatu du gaur. Nabarmendu duenez, “instalazio horrek izaera estrategikoa du Nafarroa osoan larrialdiari aurre egiteko, bai geolokalizazioagatik, bai funtzionaltasunagatik, eta erreferentzia bat da komunitateko etorkizuneko parkeentzat”. Era berean, adierazi duenez, “parke horrek inguruko 24 udalerri eta kontzejuetako 30.000 biztanleri baino gehiagori emango die zerbitzua”.

Lópezek adierazi duenez, baliabide berriak 5,19 milioi euroko inbertsioa izango du eta obrak 18 hilabeteko iraupena izatea aurreikusten da. Baliabide berria Departamenduak larrialdiaren eremuan espazioak eta baliabideak berritzeko egindako apustuaren barruan kokatzen da. "Nafarroako Erdialdea larrialdietako azpiegitura moderno eta egokiz hornituko da, egungo beharretara egokituta", azaldu du.

Nafarroako Gobernuak eta Tafallako Udalak lankidetza-hitzarmena sinatu zuten Arquitectura y Gestión ADC Arquitectos S.L.P. enpresak diseinatutako parke berria eraikitzeko.

Horren arabera, Tafallako Udalak Foru Exekutiboari laga zion instalazio berriak eraikitzeko eremua. 4.875 m2-ko lursaila da, Florencio Alfaro kalean (Abaco poligonoa, kirol-eremuaren ondoan), AP-15etik gertu, eta horrek irisgarritasuna eta kaudimena errazten ditu erantzuteko garaian.

Geolokalizazio estrategikoa da, parke berria N-121 errepidea eta A-15 autobia igarotzen diren iparraldeko/hegoaldeko korridorean baitago. Garrantzitsua da, halaber, Foru Erkidegoko ekialdean eta mendebaldean dauden herri nagusiekin (Zangoza eta Lizarra) lotura egitea NA-132 errepidearen bidez. Horiei eta Azkoiengo eremuari babesa ematen zaie.

Diseinu funtzionala eta iraunkorra

Instalazioek, parkeko eraikinaz eta praktiketarako guneaz gain, 10 badiako kotxetegia, maniobra-dorrea eta helikopteroak lurreratzeko azalera izango dituzte. Arkitekturari dagokionez, hainbat eremutan bananduta egongo da. Batetik, eremu publiko, pribatu eta entretenimenduzkoetan; eta, bestetik, deskontaminazio-zirkuitu baten bidez, gune "zikin" eta "garbi" artean.

Etorkizuneko instalazioek erreferentzia eta eredu izan nahi dute Foru Erkidegoko etorkizuneko eskualde-parkeentzat. Horien diseinuak funtzionaltasun-irizpideei jarraitzen die eta langileei eta ekipamendu teknikoei dagokienez, gaur egungoaren eta etorkizunekoaren beharrei erantzuten die. Era berean, jasangarritasun eta efizientzia energetikoko irizpideei ere erantzuten die, autokontsumorako panel fotovoltaikoen instalazioa izango baitu.

Bisitaldiko parte-hartzaileak

Kontseilariaz gain, Iñaki Elías Suhiltzaileen Zerbitzuko zuzendariak, Xabier Alcuaz Tafallako alkateak, Udaleko zinegotziek eta Fermín Osés Excavaciones enpresako langileek parte hartu dute gaur goizeko bisitan.