Lurralde Kohesiorako Departamentuak, Herri Lanen eta Azpiegituren Zuzendaritza Nagusiaren bitartez, hasiera eman die gaur AP-15era sartzeko errei berri bat egiteko lanei Izurdiagan, Iruñerako noranzkoan. Esku-hartze honekin Izurdiaga, Errotz, Urritzola-Galain eta Irurtzungo biztanleei zuzeneko irteera emango zaie, eta gaur egun udalerriko zeharbidetik doan trafikoa arinduko da. Gainera, denbora eta distantzia murriztuko dira ibilgailuak Iruñerako noranzkoan sartzeko.

1,2 milioi eurotan esleitu eta hiru hilabetetan amaituko diren obrak bi fasetan egingo dira, eta lanek aurrera egin ahala gainjarriko dira. Lehenengoan, biribilgune berri bat eraikiko da NA-7010 errepideko 21+400 kilometro-puntuan. Biribilgune horrek 8 metroko galtzada eta 20 metroko diametroa duen erdiko irlatxoa izango ditu.

Bigarren fase batean, AP-15erako sarbide berri bat eraikiko da biribilgune berritik 111. kilometro-puntuan. Errei horrek guztira 815 metroko luzera izango du, hasierako 370 metroak galtzada bakarrekoak izango dira, eta gainerakoa azelerazio-erreiari dagokio, azken falka barne.