Lurralde Kohesiorako kontseilaria den Óscar Chivitek lankidetza-hitzarmena sinatu du Baztango Udaleko alkate Fernando Anbustegirekin, Almandozeko kale nagusiko zeharbidean sareak berritzeko eta zolatzeko lanak egiteko. Obren aurrekontua 1.042.075 eurokoa da, eta Lurralde Kohesiorako Departamentuak eta Baztango Udalak finantzatuko dute, 755.304 euro eta 286.771 euro jarrita, hurrenez hurren. Jarduerak 2023-2025 plangintza-denboraldirako Tokiko Inbertsioen Planean (TIP) sartzen dira. Era horretan, Toki Administrazioaren eta Despopulazioaren Zuzendaritza Nagusiak 471.477 euro jarriko ditu eta Herri Lanen eta Azpiegituren Zuzendaritza Nagusiak beste 283.827 euro.

Egingo diren obrek, lau hilabeteko epean, Almandozeko bide nagusiaren narriadurari eta gabeziei erantzungo diete. Aldi berean, hornidura-sareak, ur beltzak eta euri-urak berrituko dira, bai eta zeharbidetik igarotzen diren telefonia- eta argiteria publikoko kanalizazioak ere.

Gaur egun, Almandozeko zeharbideko zorua egoera txarrean aurkitzen da, denboran zehar trafikoak eragindako narriaduraren ondorioz. Berritu beharreko zatiak, Lurralde Kohesioaren eta Baztango Udalaren arteko hitzarmenaren sinaduraren ondoren, 510 metro inguruko luzera du.

Era berean, sareak berritzea eta bideratzea planteatzen da. Ur beltzen araztegia berritu egingo da. NILSAk herriko araztegi berria egiteko ezarritako baldintzak bete ditzan. Gainera, gaur egun aireko linea bidez egiten diren sare elektrikoan eta telefonian jardungo da, fatxadetan eta herriak jarritako zutoinetan atxikita daudenetan. Telefono bidezko banaketa-sarearen kanalizazioa lurpekoa izango da aurrerantzean.

Almandozen egingo diren jarduketek Nafarroako Gobernuak herritarren bizi-kalitatea bermatzeko eta despopulazioaren aurka borrokatzeko lurralde kohesioaren arloan eta Foru Komunitateko toki entitateetako azpiegituren hobekuntzan aurrera egiten jarraitzeko hartutako konpromisoari erantzuten diote.