Baztan - Bidasoako Helmugaren Iraunkortasun Turistikorako Plana (HTIP) abian jarri da dagoeneko, Kultura, Kirol eta Turismoko Departamentuak eta inguruko udalek sinatutako hitzarmenari esker. Next Generation funts europarretatik jasotako 4,74 milioi euroko inbertsio horrek turismo aktibo eta jasangarria bultzatzen du, batez ere mugikortasuna, Bidasoako bide berdean eta bizikleta-pistetan egingo den inbertsioa dela eta.

Kultura, Kirol eta Turismoko kontseilariak, Rebeca Esnaolak, hitzarmena sinatu berri du Etxalarren, eta bertan planaren barruan burutuko diren ekintzetako batzuk ezagutzeko aukera ere izan du. Ekitaldian Ana Rivas Turismoko zuzendari nagusia, Amets Inda; Sunbillako alkatea, Xabier Etxarte, Etxalarko alkatea; Arantxa Arregi, Cederna Garalur elkarteko presidentea, lurraldeko udaletako ordezkariak, turismo sektoreko eragileak eta Cederna Garalurreko ordezkariak izan dira.

Bere hitzaldian, kontseilariak eskualdeko sektore turistikoarentzat suposatzen duen "erronka eta aukera" azpimarratu ditu, baita enpleguan, garapen ekonomikoan eta zerbitzuen hobekuntzan dituen ondorio positiboak ere. Era berean, proiektu berriek "industria turistiko errespetuzkoa, planifikatua, lurraldearekin eta bertako jendearekin koherentea eta iraunkorra garatzea" dutela helburu nabarmendu du.

Ekitaldian, plan berriaren esparruan gauzatuko diren proiektuetako bi bisitatu ziren. Etxalarren, aduanen eraikin zaharra bisitatu zen, Lizarrieta gainean. Bertan, ingurumena eta hegazti migratzaileak interpretatzeko zentro bat sortuko da. Lekarozen, bestalde, Bidasoako bide berdearen luzapen berriaren zati bat bisitatu zen, Doneztebe/Santesteban eta Elizondo udalerriak lotuko dituena. Baztango alkate Fernando Anbustegik bide berri horrek Baztan eta Malerreka eskualdeetako biztanleentzat izango duen garrantzia azpimarratu zuen, bereziki, Bidasoak lurraldean duen bide berdea egituratzen duelako.