Lurralde Kohesiorako Departamentuak eta Berako Udalak lankidetza-hitzarmena sinatu dute Berako zeharbidea Eztegara-Altzate tartean berrurbanizatzeko lanak egiteko. Guztira 2.371.810 euroko inbertsioarekin (BEZa barne), proiektu honek zeharbidea azpiegitura berrituaz hornitzeko beharrari erantzuten dio, irisgarriagoa eta seguruagoa, egoera ezin hobean dagoen galtzada batekin, espaloi egokituekin eta zerbitzu- eta argiteria-sareak hobetzearekin. Horri esker, inguruko zirkulazioaren irisgarritasuna eta segurtasuna hobetu ahal izango dira.

Testua Oscar Chivite Lurralde Kohesiorako kontseilariak eta Aitor Elexpuru Berako alkateak berretsi dute, eta Jesús María Rodríguez Toki Administrazioko eta Despopulazioko zuzendari nagusia ere bertan izan da.

Chivite kontseilariak nabarmendu du Nafarroako Gobernuak zeharbideak hobetzeko duen konpromisoaren barruan sartzen dela jarduera hori. “Hitzarmen honen bidez, Berako Udalaren eskaera bati erantzuten diogu, tokiko mugikortasunerako funtsezkoa den zati bat berrituz eta gidarientzako zein oinezkoentzako segurtasuna eta erosotasuna indartuz. “Hobekuntza hori funtsezkoa da herriarentzat, segurtasunari eta hiri-kalitateari dagokienez, administrazioen arteko lankidetzari esker”, ondorioztatu du Chivite kontseilariak.

Lurralde Kohesiorako Departamentuak, 2026ko aurrekontuaren kargura, 596.812 euro jarriko ditu Herri Lan eta Azpiegituren Zuzendaritza Nagusiaren bidez, eta 600.000 euro Toki Azpiegituren Planaren (PIL) dirulaguntza baten bidez, Toki Administrazioaren eta Despopulazioaren Zuzendaritza Nagusiarena; eta Berako Udalak gainerako 1.174.998 euroak jarriko ditu.

Proiektu honekin, Nafarroako Gobernuak udal azpiegiturak hobetzeko konpromisoa berresten du, hiriguneek herritarren mugikortasuna eta ongizatea erraztuko duten bide seguru eta funtzionalak izatea bermatuz.