Nafarroako Gobernuak, Nafarroako Gazteria Institutuaren bitartez, +26 Gazte Txartela atera du. Txartel hori 26 eta 30 urte arteko gazteentzako da eta Eyca sare europarrean egongo da. Txartelarekin gazteek 50.000 establezimendu baino gehiagotan beherapenak izango dituzte, estatuan eta Europar Batasuneko beste herrialde batzuetan. Era horretan, gazte gehiagok izango dute txartela, orain arte 14 eta 26 urte bitartekoek bakarrik eduki baitzezaketen.

Nafarroako Gazteria Institutuko zuzendari gerenteak azaldu du programa berria zertan den, gaur goizeko prentsaurrekoan. Alde horretatik, jakinarazi du establezimendu berriak erakartzeko kanpaina egingo dutela laster, gazteek eskatzen dituzten alorretakoak: osasuna, kirola, prestakuntza, kultura eta teknologia berriak, besteak beste. Kanpainaren helburua izango da “programaren berria ematea eta bezeroak lortzea”.

Gaur egun, Nafarroan 14 eta 30 urte arteko 110.601 gazte daude (biztanleriaren %26,88) eta horietatik 50.000 26 eta 30 urte artekoak dira.

Friasen arabera, NGIren asmoa da ekimen honen bitartez gazte nafarrei aukera berriak ematen jarraitzea, pertsona gisa garatu daitezen eta gizartean errazago parte har dezaten. Orobat, xedea da merkataritza dinamizatzea, gazteek ondasunak eta zerbitzuak eskura ditzaten sustatuz.


+26 Gazte Txartel berriaren abantailak

Nafarroan, +26 Gazte Txartelaren abantailak 26 urtetik beherako gazteentzako txartelaren berberak dira, bai eremu publikoan, bai pribatuan. Programa berrian, atxikitako establezimenduak eguneratu dira eta 30 urte arterainoko gazteei beherapenak edukitzeko aukera eman zaie. Gauzak horrela, <26 Gazte Txartelari atxikitako establezimendu ia guztiek adostu dute dauzkaten abantailak +26 Gazte Txartelaren titularrei ere ematea.