Sergio Pérez Nafarroako Gobernuko Herritarrekiko Harremanetako Departamentuko Kanpo Ekintzarako zuzendari nagusiak, atzo eta gaur Bruselan egiten ari den Eskualdeetako Europako Komitearen 149. Osoko Bilkuran parte hartu du,  eskualdeek eta landa-eremuek Europako New European Bauhaus (Europako Bauhaus berria) politikaren ezarpenean pisu handiagoa izan dezaten eskatzeko.

Batzordearen Osoko Bilkuran onartutako “Europako Bauhaus berria: ederra, iraunkorra, elkarrekin” txostenaren aurkezpena dela-eta egin da esku-hartzea.

Perezek gogorarazi du Nafarroak Europako Bauhaus Berriaren alde egindako apustua irmoa dela eta eskualdeko politikak Europakoekin oinarrietatik lerrokatu behar direla, “Gobernuarentzat politika estrategikoa izateaz gain, Nafarroako gizarteak babestutako politika ere badelako, eta horrek izugarri pozten gaitu”.

Era berean, gogoratu du Europako Batzordeak Nafarroako 2 erakunde onartu zituela: NASUVINSA enpresa publikoa eta Nafarroako Unibertsitatea (UNAV), Europako Bauhaus Berriko erakunde bazkide ofizial gisa. NEB-en lehen sarietan, Nafarroa irabazle suertatu zen Nafarroako Unibertsitateko Arkitekturako Eskolaren bitartez, eta Europa osoko 10 sarituen arteko 1 izan zen.

Sergio Perezek, halaber, gainerako eskualdeei jakinarazi die Nafarroak Europan aitzindaria izan nahi duela, 5 milioi euroko finantzaketa-deialdi batera aurkeztu delako, politika hori eskualdeetan ezarriko duen 5 lurralde faroetako bat izateko. Hautagaitza hori Nafarroako Gobernuak eta NASUVINSAk gidatzen dute, eta bi unibertsitateak (NUP eta UNAV) biltzen dituen kontsortzio publiko-pribatuak osatzen du, Euskadirekin eta Akitania Berriarekin partekatuta. “Mugaz haraindiko lurraldeak gara, eta onartutako txostenean zuzen adierazten den bezala, eskualdeak, euroeskualde-espazioak, mugaz haraindiko lurraldeak, udalak eta bereziki landa-eremuak NEB ezartzeko funtsezko zeregina betetzera deituta gaude, Europa iraunkorragoa, inklusiboagoa eta ederragoa lortu nahi badugu”, ondorioztatu du zuzendari nagusiak.

Gainera, jakinarazi du Europako Batzordeak Nafarroa onartu duela New European Bauhaus Jaialdian zehar ekitaldiak antolatzeko egiaztatutako bazkide ofizialetako bat bezala; jaialdia 2022ko ekainaren 9tik 12ra bitartean izango da.

Nafarroa Europan

Ekintza Kanpo Ekintzako 2021-2024 Planaren barruan kokatzen da, eta 1. Ardatzak —Nafarroa Europan— parte-hartze aktiboa lortu nahi du Europako sare eta erakundeetan;  hala nola, Batzordean, Komitologiaren bitartez, edota Eskualdeen Europako Batzordean, besteak beste.

Eskualdeen Europako Batzordea (CdR) Europar Batasuneko eskualdeen eta hirien ahotsa da. Europako Batzordeak Ministroen Kontseiluak eta Europako Parlamentuak kontsulta egin behar dioten organo aholku-emailea da, EBko legegintza-ekoizpenaren bi heren baino gehiago ordezkatzen duten erkidego-eremuetan eskualde-eragina duen edozein gairi buruz. Halaber, ekimen-irizpenak eman ditzakeenez, tokiko eta eskualdeko erakundeak kezkatzen dituzten gaiak sar ditzake Europako agendan.

Europako eskualdeko eta tokiko agintarien 353 ordezkarik osatzen dute, 27 estatu kidetakoak. Espainiako ordezkaritzan, autonomia-erkidegoetako lehendakariak eta alkateak daude. Foru Komunitateko ordezkaria Gobernuko Lehendakaria da, eta, gainera, Nafarroa ECON Batzordeko (Commission for Economic Policy) eta SEDECeko (Commission for Social Policy, Education, Employment and Culture) sei batzordeetako bitan dago.  Kanpo Ekintzako zuzendari nagusia Nafarroak Europako erakunde horretan duen ordezko bazkidea da.

Nafarroa Bauhaus

Nafarroak lanean jarraitzen du foru-mailako ekimenean, Nafarroa Bauhausen, Nafarroako Gobernuko Kanpo Ekintzako Zuzendaritza Nagusiak NASUVINSA sozietate publikoari egindako enkarguari esker. Ekimena honako jarduera hauen bidez garatzen da: Komunikazio Plana eskala ezberdinetan (Europa, Estatua eta eskualdea), funtsen zaintza estrategikoa eta toki-erakundeentzako eta enpresentzako laguntza etorkizuneko proiektuetarako.

Beraz, helburua da NEB Foru Komunitatean txertatuz joatea, proiektu ezberdinak abian jarriaz eta haren ardatz tematiko nagusiak jarraituz: naturarekin birkonektatzea, kide izatearen zentzua berreskuratzea, gehien behar duten lekuak eta pertsonak lehenestea eta epe luzerako bizi-zikloa eta ekosistema industrialean integratutako pentsamendua sustatzea.