Nafarroako Gobernuak gaur adierazi du ez dagoela ados Navarra Suma talde parlamentarioak erlijioko irakasleei buruz egindako lege-proposamenarekin, bertan jasotako neurriek sistemaren beharrizanak baino kontratazio handiagoa ekarriko luketelako eta, ondorioz, gastua handituko litzatekeelako, bai 2022ko aurrekontu-ekitaldian, bai hurrengo urteetakoetan.

Lege-proposamena izapidetzearekin ados ez dagoela adierazteko Foru Gobernuak egindako txostenean nabarmentzen da bertan jasotako neurriak aplikatuta baliabide publikoak behar bezala kudeatzeko printzipioak urratuko liratekeela; hau da, hezkuntza-premiak artatzeko behar-beharrezkoa dena baino gastu handiagoa debekatzen dute. Era horretan, agintzen duten agintarien eta funtzionarioen ondare-erantzukizuna ekarriko luke, Nafarroako Ogasun Publikoari buruzko apirilaren 4ko 13/2007 foru-legeko 131 eta 132 artikuluen arabera.

Nafarroako Gobernuak, Hezkuntza Departamentuaren bitartez, eta Bizikidetza, Berdintasun, Berritzaile eta Aurrerakoia den legegintzarako 2019-2023 Programa Akordioari jarraiki (PSN-PSOEk, Geroa Baik, Podemos-Ahal Duguk eta Izquierda Ezkerrak sinatua), iragarri zuen, datorren ikasturtetik aurrera, Haur eta Lehen Hezkuntzan erlijio irakaskuntzak LOMLOE Lege Organiko berrian ezarritako gutxieneko ordutegian emango direla; alegia, asteko irakastordu bat Haur eta Lehen Hezkuntzan eta asteko bi ordu Bigarren Hezkuntzan eta Batxilergoan.

Aurteko ikasturtean, erlijioko 145,2 irakasle daude Nafarroan. 2022-2023 ikasturtean, LOMLOE pixkanaka aplikatzeko egutegiaren arabera, erlijioaren ordu-murrizketa Lehen Hezkuntzako maila bakoitietara eta DBH eta Batxilergoko lehen mailara iritsiko da, eta guztira erlijioko 116,3 irakasle behar izango dira Nafarroako hezkuntza-sistema publiko osoan. Beraz, ez da erlijio-irakastordurik izango 28,8 irakaslerentzat, eta, Navarra Sumaren foru-lege proposamena aplikatuta, egungo kontratu eta lanaldiari eutsiko liokete urteko 1.315.974,92 €-ko gainkostuarekin. Horietatik 438.649,31 euroko zenbatekoa dagokio 2022ari.

Ildo berean, 2023/2024 ikasturtetik aurrera ordutegi-murrizketa aplikatuta aipatu etapetako maila guztietan, guztira 88,9 irakasle beharko dira hezkuntza-sistema publiko osoan. Horrek esan nahi du ez litzatekeela erlijioko irakastordurik izango 56,2 irakaslerentzat, eta, Navarra Sumaren lege-proposamena aplikatuz gero, egungo kontratu eta lanaldiari eutsiko liokete urteko 2.563.535,60 €-ko gainkostua izanik.

Gobernuaren txostenean gogorarazten da Estatuko 2022ko Aurrekontu Orokorren inguruko Legearen 19. artikuluan berariaz debekatzen dela administrazio publikoen zerbitzura dauden langileen soldata-masa %2tik gora igotzea. Igoera hori 2022rako Nafarroako Aurrekontu Orokorren Legean sartuta dago jada, eta horrek I. Kapituluko gastua (langileen gastuak) handitzea eragozten du.

Erlijioko irakasleen lan-harremana arautzen duen ekainaren 1eko 696/2007 Errege Dekretuan aurreikusitakoaren arabera, Exekutiboak adierazi du irakasle horien kontratazioak ikastetxeen premietara eta hezkuntza-plangintzara egokitu behar duela; hortaz, irakastorduen murrizketa langileen kontratazioan islatu behar da. Horrela, horrek eragina izan dezake dagoen kontratu-kopuruan eta horien irakastorduetan. Hezkuntza Departamentuak printzipio horien arabera jokatu du beste edozein irakasgai denean ere, ikasleen matrikulan izandako aldaketak, curriculum-aldaketak, kasu honetan bezala, edo hezkuntza-plangintzaren beste edozein gorabehera medio, erlijio-irakasleak ez diren beste irakasleen administrazio-kontratazioa murriztu behar izan bada.