Nafarroak Neguko Barazkien I. Astea ospatuko du urriaren 1etik 7ra, Madrilen, tokiko produktuaren kalitatea sustatzeko. Landa Garapeneko eta Ingurumeneko Departamentuak bultzatutako ekimena da, eta Michelin izarra duten 3 sukaldari nafarrek parte hartuko dute. Nafarroako barazkiak prestatuko dituzte Madrilgo beste 3 sukaldari ezagunen jatetxeetan, Foru Erkidegoko kalitate handiko nekazaritzako elikagaiak sustatzeko.

Horrela jakinarazi du Itziar Gomez kontseilariak, eta esan du ekimenaren helburua “gure barazkiak Foru Komunitatetik kanpo ezagutzera emateko aukera irekitzea dela”, kalitate altuarekin lotuta, eta, aldi berean, Nafarroako barazkiak urte osoan eta ez soilik udaberriko kanpaina tradizionalenetan kontsumi daitezkeela erakustea”.

Kontseilariak gehitu du “Nafarroa barazki onaren sinonimoa bada, ekitaldiaren asmoa dela duen balioa indartzea eta dieta orekatuan funtsezkoak diren balio osasungarriez eta zaporez eta sukaldaritza-aniztasunez ere betetako generoari zabalkunde handiagoa ematea, ospe handiko sukaldarien eskutik, haien plateren talentu sortzailea erakutsiko baitute”.

Zehazki, programan honako sukaldari nafarrek hartuko dute parte: Leandro Gil, Iruñeko Alma Hoteleko La Biblioteca jatetxekoa; Iñaki Andradas, Iruñeko Baserriberri jatetxekoa; eta Natxo Gómara, Baluarte Nafarroako Biltzarren Jauregiko eta Auditorioko Verduarte jatetxekoa. Era berean, Madrilen kokatutako hauek ere bertan izango dira: Adolfo Muñoz, Cibeles Jauregikoa; Ricardo Gil, Madrilgo La Huerta de Tudela jatetxekoa; eta Juan Miguel Sola, La Manduca de Azagrakoa.

Aste honetan protagonistak izango diren barazkiez gain, Nafarroa JDko ardoak edo Idiazabal JDko gazta eta Erronkari JDkoa, aurten 40. urteurrena betetzen duena, bertan izango dira.

Neguko Barazkien Asteari hasiera emateko, aurkezpen instituzionala egingo dute datorren astelehenean, hilak 27, Madrilgo Lazaro Galdiano Museoan; bertan bilduko dira edizio honetan parte hartuko duten chef guztiak eta Nafarroako Unibertsitateko Nutrizio irakaslea ere bai, Marta Cuervo. Urriaren 1etik 7ra, berriz, erakustaldi gastronomikoak egingo dira Madrilgo erreferentziazko espazio ezberdinetan; hala nola, San Miguel Merkatutik hasi eta Fenix Gran Melia Hotela edo Plateara bitarte, Europako aisialdi gastronomikoko gunerik handiena.

Ekitaldian, Nafarroako produktuek duten garrantzia nabarmenduko da, bereziki barazkiena, nutrizioaren ikuspegitik zein ingurunerako duten ikuspegi ekonomiko eta sozialetik, eta, horrekin batera, Nafarroako gastronomiaren garrantzia azpimarratuko da. Parte hartuko duten sukaldariek labur-labur azalduko dituzte garatutako menuak eta espazio bakoitzean zerbitzatuko direnak. Aurkezpenaren ondoren, aperitibo bat eskainiko zaie bertaratutakoei Nafarroako produktuarekin.

Behin ekitaldiaren astea hasita, urriaren 1ean, ostirala, 13:00etatik 15:00era, Erronkariko Gaztaren dastatzea izango da San Miguel Merkatuan, eta, gauean, Iñaki Andradas sukaldariak afari berezia prestatuko du Krapula jatetxean. Hurrengo egunean, berriz, chef berak menu bat prestatuko da San Miguel Merkatuan, eta, gauean, La Manduca de Azagra jatetxearen txanda izango da.

Igandean, Nafarroako ardoak izango dira protagonistak, San Miguel Merkatuak ardoen dastaketa eskainiko baitu; gauean, berriz, Fénix Gran Meliá Hotelak Nafarroako Ardoen Jatorri Deituraren dastatze profesionala eskainiko du. Astelehenean zehar, bazkaria eta afaria eskainiko dira Palacio de Cibeles jatetxean Leandro Gil eta Adolfo Muñoz sukaldariekin. Asteartean, Natxo Gomarari egokituko zaio bere sukaldea erakustea goizez San Miguel Merkatuan, eta, gauean, ikuskizun eta afaria eskainiko ditu show cooking batean, Platean.

Asteazkenean, La Huerta de Tudela jatetxeak antolatuko du menu berezia, eta, azkenik, astea ostegunean, urriaren 7an, amaituko da Mexiko Etxean egingo den ekitaldi instituzionalarekin eta Mexikoko eta Nafarroako anaitasun gastronomikoarekin.

Landa Garapen eta Ingurumeneko Departamentuak bultzatutako kanpaina sortzeko, INTIAk eta Reyno Gourmetek parte hartu dute Nafarroako produktuak hornituaz, eta, besteak beste, honako hauek esku hartu dute: aipatu sukaldariak; Nafarroako Unibertsitatea; Erronkariko Jatorri Deitura; Nafarroako Ardoen JD; Fénix Gran Meliá Hotela; San Miguel Merkatua; La Manduca de Azagra jatetxea; La huerta de Tudela jatetxea; Zoko Taldeko Krapula jatetxea; Palacio de Cibeles jatetxea, Adolfo Muñoz Chefarena; eta aisialdi gastronomikoaren Platea espazioa.